– «О́zgerister joly: Ár azamatqa laıyqty ómir!» dep atalatyn partııalyq baǵdarlamanyń basymdyǵy – halyqtyń ómir súrý sapasyn arttyrý, áleýmettik ádilettilikti qamtamasyz etý, esep beretin jáne halyq únine qulaq asatyn memleket qurý. Baǵdarlamany iske asyrýǵa barlyǵy 21 trln teńge tartý josparlanǵan. Onyń qarjylyq jáne adamı resýrstarmen qamtamasyz etilgen bıik maqsaty, baıypty baǵdary bar, – dedi A.Platonov.
Búginde saılaýaldy baǵdarlamany iske asyrý sheńberinde el aýmaǵynda 90 mektep paıdalanýǵa berildi. Sonymen qatar 259 balabaqsha ashylyp, 180 kolledjde jańǵyrtý jumysy júrgizilgen. Buǵan qosa 11,7 mln sharshy metr turǵyn úı (100 myńǵa jýyq baspana) salynyp, 500 myńǵa jýyq jumys orny quryldy.
Jýyrda Memleket basshysy Qasym-Jomart Toqaev Úkimettiń keńeıtilgen otyrysynda bıyl 11 aıda ekonomıka ósimi 4,6%-dan 2,7%-ǵa deıin baıaýlaǵanyn, al ınflıasııa sońǵy 14 jylda bolmaǵan deńgeıge jetip, 19,6%-dy quraǵanyn málimdegen edi. El ekonomıkasyndaǵy osyndaı jaǵymsyz jaǵdaı partııanyń saılaýaldy baǵdarlamasyn iske asyrý sapasyna tikeleı áser etedi.
Ulttyq ekonomıka mınıstri Álibek Qýantyrovtyń aıtýynsha, bıyl josparlanǵan 18 mln sharshy metr turǵyn úıdiń jyl sońyna deıin 15,1 mln sharshy metri (137,7 myń baspana) salynady.
«Shamamen 3 mln sharshy metrdi salyp úlgere almaı jatyrmyz. Buǵan jumys kestesinen artta qalý, qarjylandyrýdyń jetkiliksizdigi sebep bolyp otyr. Alaıda eń basty kedergi – qurylys materıaldarynyń qymbattaýy. Belgili bir deńgeıde ımportqa táýeldilik bolǵandyqtan, elge qurylys materıaldaryn jetkizý kezinde qıyndyqtar oryn aldy», dedi mınıstr.
2022 jyly atqarylǵan jumysty qorytyndylaı kele, Artýr Platonov bıyl komıtet ortalyq jáne jergilikti atqarýshy organdarǵa 200-den asa naqty usynys bergenin atap ótti. Jergilikti jerlerde partııalyq baqylaý komıssııalarymen birlesip eńbek ujymdarymen, turǵyndarmen, qoǵam qaıratkerlerimen jáne taǵy basqalarmen 600-den asa dóńgelek ústel, 1 100-den asa kezdesý, sondaı-aq 5 myńnan asa kóshpeli otyrys pen reıd ótkizilgen.
«Azyq-túlik taýarlary, dárilik zattar jáne janar-jaǵarmaı baǵasynyń ózgerýine baqylaý júrgizý boıynsha 216 monıtorıng tobynyń jumysyn erekshe atap ótkim keledi. Bul jumys turǵyndardyń oń baǵasyn aldy. Sondaı-aq partııalyq baqylaý beketin qurý jumysy qolǵa alyndy», dedi A.Platonov.
Bıyl Ádep kodeksin buzǵany úshin 104 partııa múshesi, onyń ishinde qala jáne aýdan ákimderi, olardyń orynbasarlary, ortalyq jáne jergilikti memlekettik organdardyń departament jáne basqarma basshylary, túrli deńgeıdegi máslıhattardyń 22 depýtaty jaýapkershilikke tartylǵanyn atap ótken jón.
