Vedomstvo basshysynyń aıtýynsha, 2017 jyly jer qoınaýyn ıgerý salasynda júrgizilgen zańnamalyq ózgeris jańa ken oryndaryn ashýǵa jáne bul baǵytta ınvestısııalardy tartýǵa oń áser etti. Atap aıtqanda, «birinshi ótinim» qaǵıdaty boıynsha lısenzııalar berýdiń jalpy tártibi engizilip, Memlekettik jer qoınaýy qoryn basqarý baǵdarlamasy qabyldandy, sondaı-aq lısenzııa berý merzimi qysqartylyp, halyqaralyq eseptilik standarttaryna (KAZRC kodeksine) kóshý bekitildi.
Máselen, qabyldanǵan sharalardyń nátıjesinde Qazaqstanda geologııalyq barlaýmen aınalysatyn 700-den asa ıýnıor kompanııa qurylyp, Rio Tinto, Fortescue jáne «Iyldyrym» syndy álemdik naryqtaǵy iri holdıngter elimizge tartyldy.
Qaıyrbek О́skenbaev 2018 jyldan bastap qatty paıdaly qazbalardy barlaýǵa 1 myń 922 lısenzııa berilgenin, sondaı-aq kishi (ıýnıor) kompanııalardyń úlesi 90%-dan asqanyn jetkizdi. Áıtse de bul amaldarǵa qaramastan atalǵan salanyń tıimdi damýyn tejep turǵan faktorlar da bar. Sol sebepti elimizdiń aýmaǵyndaǵy jer qoınaýyn ıgerýge arnalǵan 1,4 mln sharshy shaqyrymdaı ýchaskeniń tek 5% paıyzy ǵana lısenzııalanǵan.
«Memleket basshysy Qazaqstan halqyna arnaǵan Joldaýynda aıtqandaı, jer qoınaýyn ıgerýge ınvestısııa tartý úshin tıisti zańnama men belgilengen tártipti barynsha ońtaılandyrý qajet. Sondyqtan Geologııa salacyn damytý tujyrymdamasy arqyly jer qoınaýyn paıdalaný baǵytynda lısenzııa alý jónindegi tártipti barynsha jeńildetip, ınvestorlar men ýákiletti organdardyń arasyndaǵy bıznes-prosesti avtomattandyrý, sondaı-aq qatty paıdaly qazbalardy barlaý men óndirýge lısenzııa berý prosesiniń «ashyqtyǵyn» qamtamasyz etý josparlanyp otyr. Bul baǵyttaǵy jumys qazir qolǵa alyndy», dedi Q.О́skenbaev.
Sonymen qatar mınıstr bıyl qarasha aıynan bastap minerals.gov.kz jer qoınaýyn paıdalanýshylardyń biryńǵaı platformasynda qanatqaqty rejimde lısenzııa berý modýli iske qosylǵanyn atap ótti. Buǵan qosa elektrondy habarlamalar boıynsha arnaıy fýnksııanyń jumysy jolǵa qoıylyp, barlaýǵa arnalǵan ýchaskelerge baılanysty elektrondy aýksıondardy ótkizý prosesi avtomattandyryldy (e-qazyna.kz -Memlekettik múlik tiziliminiń veb-portaly). Taǵy bir aıta keterligi, aýksıon jeńimpazy lısenzııa berilgenge deıin qol qoıý bonýsyn tóleýi tıis. Qajetti soma tólenbegen jaǵdaıda oǵan sanksııa qoldanylýy múmkin. Bul alǵash ret engizilip otyrǵan tetik.
Budan basqa «óndirý» ýchaskelerinde aýksıondy avtomattandyrý boıynsha tıisti jumystar júrgizilip jatqany aıtyldy (iske asyrý merzimi 2023 jylǵy 1 toqsan). Osy baǵyttaǵy zańnamany jetildirý úshin qajetti rásimderdi avtomattandyryp, ońtaılandyrý bóliginde Jer qoınaýy týraly kodekske túzetýler paketin engizý kózdelip otyr.
