Tabystyń jańa múmkindikteri

– Silkway Accelerator jobasy­nyń ekinshi kezeńi sátti aıaqtaldy. Star­taptar úlken jumys atqardy: bı­znes-josparlary men eksport naryǵyn qaıta qarastyryp, jańa klıenttermen kelisimsharttar jasady, aýdıtorııacyn keńeıtip, ki­risteri ósti. Baǵdarlamanyń oń ná­tı­jesi onyń tıimdiligin kórsetip otyr, – dedi Astana Hub bas dırektory Maǵjan Mádıev.

Máselen, baǵdarlama nátıje­sinde Biometric bıometrııalyq de­rekterdi tekseretin dıjıtal on­bordıng jáne KYC servısiniń aılyq tabysy 2 mln teńgeden 23 mln teńgege deıin ósti.

Demensııanyń bastapqy bel­gileri men qaýpin anyqtaıtyn neı­rokognıtıvti synaqqa negiz­delgen myMind vırtýaldy klınıkasy Qazaqstannyń eń iri klınıkalyq-dıagnostıkalyq zerthanasymen kelisimshart jasasty. Sondaı-aq Qyrǵyzstannyń naryǵyna shyqty. Taldaýlarǵa túsinikteme beretin jańa ónim, sondaı-aq oflaın-ónim jasap, eki dárihana jelisi arqyly taratý kelisimine qol jetkizdi.

Dúkender men meıramhanalarǵa «saǵattyq qyzmetkerler» usy­na­tyn EasyTap onlaın servısiniń quny 4 mln teńgeden 15 mln teńgege artty, al startaptyń aılyq tabysy 20 myń dollardan 40 myń dollarǵa ósti. Sonymen qatar kom­panııa shtatynyń 19 adamnan 9 adamǵa qysqarǵanyna qaramastan, tıimdiligi artyp, 14 jańa seriktes qosyldy. Al qyzmet kórsetý marjasy 5 paıyzdan 15 paıyzǵa deıin ósti. Qoldanbalardy paıdalanýshylar sany nóldik marketıngtik bıýdjetpen 5 500-den 10 myńǵa deıin ulǵaıǵan.

– Men birinshi ret eki batchty birinen soń birin daıyndadym. Rasyn aıtsam, ońaı tıgen joq. Jo­bany bastap, sátti júzege asyr­ǵan búkil akselerator komanda­syna jáne mınıstrlikke alǵys aıtamyn. Barlyq startap pen qu­ryltaıshylarǵa sáttilik tileımin. Kóp eńbek etip, úlken jolǵa tústi­ńizder. Jaqsy nátıjeler men jetistikter tileımin, – deıdi Silkway Accelerator júrgizýshisi, ónim­derdi, qyz­metterdi jáne kom­­panııalardy ázirleý, damytý ári naryqqa shyǵarý boıynsha ha­lyq­aralyq keńesshi Álisher Hasanov.

Akselerator aıasynda Neuron Oil baǵdarlamalyq kesheniniń negizin qalaýshylar satý sıklin 18 aıdan 3 aıǵa deıin qysqartty, 50 myń dollarǵa aldyn ala kelisim jasasty. Sátti júzege assa, 450 myń dollarǵa negizgi shart jasalady.

Gúl ónimderin satyp alýshylar men satýshylardy baılanys­tyratyn Floboom onlaın platfor­masy akselerator kezinde AQSh-ta zańdy tulǵa quryp, Nıý-Iork­tegi alǵashqy florısterdi qos­ty, ónim­di jergilikti naryqqa shy­ǵardy.

Tutynýshyny turaqtandyrý qyzmeti Flowsell.me klıentterdiń ketýin 8 paıyzdan 4 paıyzǵa deıin tómendetti jáne satylymdardy 30 paıyzǵa arttyrdy.

InStroy qurylys-jóndeý saýda alańy 3 mln teńgege alǵashqy satylym jasap, taýar aınalymyn 30 mln teńgege ósirdi.

Akselerator kezinde «Davaı shodım» kompanııasy tabysyn edáýir eselep, akseleratordyń 3 aıynda 141 mln teńge paıda tapty, al aldyńǵy 8 aıdaǵy tabysy nebári 170 mln teńge bolatyn. Kom­panııanyń bılet satý qyzmeti aı saıynǵy turaqty tabysyn 15 mln teńgeden 50 mln teńgege deıin arttyryp, medıakeńistikten túsken tabys 30 mln-nan 40 mln teńgege deıin ósken.

– Buǵan deıin biz akselerasııa baǵdarlamalaryna qatysqan joqpyz, sondyqtan bizdiń kompanııa neni jaqsartý kerek jáne qalaı ke­ńeıtý qajet degen talqylaýlar bolady dep oıladyq. Biraq eń bas­tysy, sanany ózgertý kerek eken. Júrgizýshi Álisher oıymyzdy ózgertý arqyly bizge jaqsy áser etti. Jańasha kózqarasymyz ónim­derimizge oń áserin tıgizdi. Dú­nıege jáne bizdiń ónimge degen oıymyz ben kózqarasymyzdyń ózgerýi búkil ómirimizdi jaqsy ar­naǵa burady dep oılaımyz. Ak­seleratordan alǵan tájirıbemiz osyndaı. Jalpy, biz unicorn-ǵa aı­nalmaqpyz, – dedi «Davaı shodım» kompanııasynyń dırektory Álisher Toıgýlıev.

Silkway Accelerator baǵdarla­masyna qazaqstandyq startaptar ǵana qatysqan joq. О́zbekstandyq Avlo.shop shaǵyn jáne orta bıznes­ke arnalǵan ınternet-dúkenderdi qurýǵa kómektesetin SaaS platformasy bıznes úlgisin ózgertti. Aı saıynǵy kiristi 570 dollardan 3 myń dollarǵa deıin arttyrdy, sonymen qatar iri sharttar boıynsha kelissózder júrgize bastady.

Tájikstandyq neobank Planet9 startapynyń satylymy 0-den 70 myń dollarǵa deıin ósti. Kom­­panııa jańa naryqqa shyǵý jumystaryn bastady jáne jańa kelisimsharttarǵa qol qoıdy.

Mońǵolııalyq Metaver mıkro­oqytý platformasy Silkway Accelerator kezinde Úndistan nary­ǵyna shyqty. 400 dollar jumsap, jalpy somasy 3 200 dollarǵa 800 satylymǵa qol jetkizdi. Ak­sele­ratorǵa deıin startap Fı­lıppın naryǵynda baq synap kórgen edi, alaıda 8 myń dollar jumsaǵanymen, bir satylym da bolmaǵan.

Ázerbaıjandyq Metatesk bilim berý platformasynyń aılyq tabysy 4 myń dollardan 18 myń dol­larǵa, stýdentter sany 200-den 260-qa ósti, sondaı-aq Qytaı na­ry­ǵyna shyqty.

– Bul baǵdarlamaǵa qatysý biz úshin keremet tájirıbe boldy. Men barlyǵyna osy akseleratorǵa qatysýǵa keńes beremin. Bul – ónimdi ázirleýden bastap basqarý keze­ńine deıin túrli taqyrypty qamtyp, jumys tájirıbesin jı­naýdyń bire­geı múmkindigi. Qytaı­daǵy sa­tý kólemin ulǵaıtý­men qatar, biz AQSh pen Afrıkaǵa shyǵýdy kóz­dep otyrmyz, – dep josparymen bó­listi Metatesk dırektory Gıýnaı Imanzada.

Silkway Accelerator baǵdar­lamasynyń ekinshi legi bıyl 2 qyrkúıekte bastalyp, oqytýdyń birinshi legindegideı Astanada oflaın tártipte ótti jáne úsh aıǵa sozyldy. Akselerator qaty­sýshylary tálimgerlikpen qatar, Astana Hub mańynda tegin bas­pana men jumys ornyna ıe bolyp, Seed Money baǵdarlamasy boıynsha 55 myń dollarǵa deıin qarjylandyrýǵa múmkindik aldy.

Eske salaıyq, bıyl Sıfr­lyq damý, ınnovasııalar jáne aero­­ǵarysh ónerkásibi mınıstr­li­giniń qoldaýymen Astana Hub teh­noparki Google for Startups baǵ­dar­la­masynyń Ortalyq Azııadaǵy birin­shi seriktesi atandy. Bıyl­dyń ózinde baǵdarlamanyń eki legi sátti aıaqtaldy. Oǵan Orta­lyq Azııa elderinen, sondaı-aq Ázer­baıjan men Mońǵolııadan star­taptar qa­tysty.

Google for Startups – 2011 jyly Google korporasııasy iske qosqan startap baǵdarlamasy. Ol 125 eldegi 50-den astam kovorkıng pen akseleratordan turady jáne bıznesti jańa bastaǵan kásip­kerler úshin praktıkalyq sabaqtar usynady.