Halyqaralyq konferensııanyń ashylý saltanatynda Ankara Qajy Baıram Velı ýnıversıtetiniń Ádebıet fakýlteti, qazirgi túrik dıalektileri men ádebıetteri bóliminiń meńgerýshisi M. Fatıh Kırıshchıoǵlý, Eýrazııa jáne Túrki álemi ǵylymı-zertteý ortalyǵynyń basshysy Nadjıe Ata Iyldyz, M.O. Áýezov atyndaǵy Ádebıet jáne óner ınstıtýty Táýelsizdik dáýirindegi ádebıet bóliminiń bas ǵylymı qyzmetkeri, fılologııa ǵylymdarynyń doktory Nurdáýlet Bábıhanuly Aqysh jáne elshilik qyzmetkeri Nyshankúl Qarataeva sóz sóıledi.
Konferensııa barysynda M.O. Áýezov atyndaǵy Ádebıet jáne óner ınstıtýty tarapynan Muhtar Áýezovtiń jazǵan kitaptary, kıgen kıimderi jáne sırek kezdesetin sýretterinen quralǵan kórme uıymdastyryldy.
Fatıh Kırıshchıoǵlý óziniń sózinde XX ǵasyrdyń basynda qazaq ultynyń asa iri ádebıetshileriniń biri Muhtar Áýezovke bıyl 125 jyl tolǵan mereıtoıyna oraı uıymdastyrylyp otyrǵan búgingi halyqaralyq konferensııanyń Ankara Qajy Baıram Velı ýnıversıtetinde ótip jatqany úlken mártebe ekenin atap ótti. Tanymal qazaq ádebıetiniń klassıgi M. Áýezov aýyz ádebıetiniń túrli janrlarynda mańyzdy shyǵarmalar qaldyrǵanyna nazar aýdaryp, onyń shyǵarmalarynyń ishindegi eń kúrdelisi jáne atyn álemge pash etken 15 jyl boıy jazǵan «Abaı joly» tarıhı roman epopeıasy qazirgi urpaqqa óshpes iz qaldyrǵan mańyzdy shyǵarma dedi.
Nadjıe Ata Iyldyz óz sózinde Muhtar Áýezov jáne «Manas» dastany týraly sóz qozǵap, onda álemge áıgili qyrǵyz jazýshysy Shyńǵys Aıtmatovtyń «Dúnıeniń qaı jerine barsań da qasymda eki nárse bolady, biri Manas, ekinshisi Muhtar Áýezov» degen sózderine nazar aýdaryp, M. Áýezov Tashkenttegi Orta Azııa ulttyq ýnıversıtetiniń Shyǵystaný fakýltetinde doktorlyq jumysy barysynda «Manas» dastanyna qajetti zertteý materıaldaryn jınaqtap, «Qazaq ádebıeti» gazetinde jarııalaǵanyn, keıinnen 4 tomnan turatyn «Qyrǵyz halqynyń batyrlyq dastanynyń» jazylý tarıhy jóninde baıandady.
N. Bábıhanuly Aqysh óz sózinde M. Áýezovtiń eńbekterinde qazaq halqynyń XIX ǵasyrdaǵy mádenı, saıası, áleýmettik jáne turmystyq rýhanı ómirin jan-jaqty kórsete bilgenin, jazýshynyń ádebı shyǵarmalarynyń tili kúrdeli ekenin, onyń shyǵarmalary 116 tilge aýdarylǵanyn, jazýshynyń jazǵan eńbekteri orys tiline aýdarý barysynda kezdesken máselelerge toqtalyp ótti.
M. Áýezov atyndaǵy Ádebıet jáne óner ınstıtýty dırektorynyń orynbasary, fılologııa ǵylymdarynyń kandıdaty Álmıra Qalıeva óziniń baıandamasynda M. Áýezovtiń jazýshy retinde qalyptasýyna, sol kezdegi mádenı, áleýmettik jáne saıası jaǵdaılardyń áser etkenin, Muhtar Áýezovtiń azamattyq tuǵyrynyń qalyptasýy men qalamynyń ushtalýyna «Abaı» jýrnaly men «Saryarqa gazeti» erekshe yqpal etkenin atap ótti.
