Zaldar «Qazaqstan halqyna» qoǵamdyq qorynyń «24 balalar sport zaly» jobasy aıasynda jaraqtandyryldy. Qor qarajaty esebinen boks, kúres jáne basqa da sport túrlerimen aınalysýǵa arnalǵan sporttyq qural-jabdyqtar satyp alyndy. Bastamany iske asyrýdaǵy qordyń seriktesi «Batyr bolamyn!» qory jobanyń uıymdastyrýshylyq máselelerimen aınalysady. Eki zaldy jabdyqtaýǵa «Qazaqstan halqyna» qory 18,2 mıllıon teńge baǵyttady.
«Zaldy osylaısha jabdyqtaǵany úshin «Qazaqstan halqyna» qoryna kóp raqmet aıtqym keledi. Men MMA-men 3-4 jyldan beri aınalysyp kelemin, endi jaqsy jattyǵý ótkizetin bolamyz», dedi Senek aýylyndaǵy zaldyń tárbıelenýshisi Islam Álimhan.
Ashylý saltanatynda bokstan álem chempıony Erdos Jańabergen, MMA chempıony Rýslan Sarıev jáne aralas jekpe-jekten jattyqtyrýshy Jeńis Qaıranov balalarǵa sheberlik sabaǵyn ótkizdi.
«Búgingi tańda birlesken qaıyrymdylyq baǵdarlamasy aıasynda Mańǵystaý oblysynda 4 zal jumys isteıdi. Tamyz aıynda Beıneý jáne Aqjigit aýyldarynda ashyldy. Aýyldyq jerlerde úıirme, jaqsy jabdyqtalǵan zaldar joq, sondyqtan balalar men eresekter sport zaldarynyń ashylýyn asyǵa kútedi», dep atap ótti «Batyr bolamyn» qorynyń jetekshisi Arman Ýahap.
Aıta keteıik, «Qazaqstan halqyna» qory iske asyryp jatqan «24 balalar sport zaly» jobasy elimizdiń shalǵaıdaǵy eldi mekenderinde nemese balalar úshin sportqa qoljetimdilik deńgeıi tómen aýyldyq jerlerde balalar sportynyń qoljetimdiligin arttyrýǵa baǵyttalǵan. Jobanyń negizgi maqsatty aýdıtorııasy – 5 jastan 18 jasqa deıingi, az qamtylǵan jáne kópbalaly otbasylardan shyqqan balalar. 24 zaldy ashýǵa arnalǵan qaıyrymdylyq baǵdarlamasynyń bıýdjeti - 183 623 000 teńge.
