Ashylý saltanatynda Mádenıet jáne sport mınıstri Dáýren Abaev, Almaty ákimi Erbolat Dosaev, halyqaralyq shahmat federasııasynyń prezıdenti Arkadıı Dvorkovıch quttyqtaý sóz sóıledi.
Rásim barysynda Dáýren Abaev Memleket basshysy Qasym-Jomart Toqaevtyń quttyqtaýyn oqydy.
«Mundaı bedeldi jarystar bizdiń elimizde shahmatty nasıhattaýǵa kúshti serpin beretini sózsiz. Búginde qazaqstandyq shahmatshylar balalar men eresekter arasyndaǵy Álem jáne Azııa chempıonattarynda joǵary nátıjelerge qol jetkizýde. Olardyń jetistikteri óskeleń urpaqty zııatkerlik sportpen aınalysýǵa, úlken maqsattar qoıýǵa jáne olarǵa qol jetkizýge shabyttandyrady. Biz Qazaqstanda shahmattyń dáıekti damýyn jalǵastyramyz jáne Halyqaralyq shahmat federasııasymen jemisti yntymaqtastyqqa daıynbyz. Bul bizdiń adamı áleýetti nyǵaıtý jáne zııatkerlik ultty qalyptastyrý jónindegi strategııalyq mindetimizge tolyq sáıkes keledi», delingen Prezıdenttiń quttyqtaý hatynda.
Mádenıet jáne sport mınıstri seriktester men qala ákimdigine álem chempıonatyn qoldaǵany úshin alǵys bildirdi.
«Bul týrnırdiń áseri zor bolatynyna senimdimin. Búkil el boıynsha myńdaǵan balalar týrnırdi baqylap, shahmat oınaıdy. Bolashaqta bul jas daryndar chempıon atanatynyna senimdimin», dedi Dáýren Abaev.
Almaty ákimi Almatyda Álem chempıonatyn ótkizý qala úshin úlken mártebe ekenin aıtty. Ol barlyq qatysýshylarǵa jeńis pen sáttilik tiledi.
Bıyl birinshilik úshin kúreste álemniń 50 elinen 290 shahmatshy kúresedi. Ashyq týrnırlerge 176 oıynshy qatysady.
Áıelder týrnırinde 100-den astam sportshy baq synaıdy. Qazaqstan namysyn álemge áıgili shahmatshylar Jansaıa Ábdimálik pen Bıbisara Asaýbaeva qorǵaıdy.
Chempıonat 26-28 jeltoqsan aralyǵynda rapıd oıyndarymen bastalady, al blıs oıyndary 29-30 jeltoqsan aralyǵynda ótedi. Sol kúni jeńimpazdardy marapattaý jáne chempıonatty jabý rásimi ótedi.
Aıta ketsek, 2022 jyl FIDE shahmattaǵy áıelder jyly dep jarııalandy.
Jarys kúnderi tóreshiler korpýsyna arnalǵan FIDE semınarlary, balalar men barlyq áýesqoı áýesqoılarǵa arnalǵan bir mezgilde oıyn seanstary men blıster, IT-sektordaǵy baǵdarlamashylar úshin jeke týrnır ótedi.
Týrnırdiń uıymdastyrýshylary - FIDE jáne Qazaqstan shahmat federasııasy. Chempıonat Almaty qalasy ákimdiginiń jáne Qazaqstan Respýblıkasy Mádenıet jáne sport mınıstrliginiń qoldaýymen ótkiziledi.
