Meıirim men qaıyrym

Bul Astanadaǵy «Barys arena­da» ótken «Biz birgemiz Fest» atty mýzykalyq qaıyrymdylyq festı­va­linen kórinis edi. Onda Dımash Qudaı­bergenmen birge basqa da qazaqstandyq estrada juldyzdary men múgedektigi bar ártister ónerlerin ortaǵa saldy. Muqtaj jandarǵa páter kilti tabystalǵanda, «Barysta» meıirim men qaıyrymǵa kýá boldyq. 12 myń adam syıatyn «Barys arena» lyq tolmasa da, halyq atshaptyrym alańnyń jarymynan kóbin alyp otyrdy.

Qaıyrymdylyq konsertke óner­pazdar respýblıkanyń túkpir-túk­pirinen tartylypty. Daryndy bala­lar men múmkindigi shekteýli jas­tar elimizdiń barlyq óńirinen kelipti. Balalar jyly aıasynda uıymdas­ty­rylǵan festıval erekshe qajettilikteri bar balalardy qoldaýǵa arnalǵany osy­dan-aq belgili.

Is-sharaǵa Parlament Senatynyń tóraǵasy Máýlen Áshimbaev qatysty. Senat tóraǵasy Memleket basshysynyń tapsyrmasy boıynsha elimizde halyqtyń áleýmettik osal toptaryn qoldaý úshin barlyq shara qabyldanatynyn atap ótti. «Belgili otandyq ónerpazdarmen bir sahnada óner kórsetý erekshe ári jas talant ıelerin yntalandyra túsetini anyq. Ánshilerge shyǵarmashylyq tabys tileımin. Búgingi konsertten jınalǵan qarajat múgedektigi bar balalarǵa arnalǵan ońaltý ortalyǵyna jabdyq satyp alýǵa jumsalady. Munyń bári óner kez kelgen kedergi men taptaýryndardy buzyp, ıgi ister jolynda barlyǵyn biriktire túsetinin kórsetedi», dedi Máýlen Áshimbaev.

Konsert barysynda múmkindigi shekteýli ánshi Kenjebek Nurdol­daıǵa ekibólmeli páterdiń kilti tapsyryldy. Jeti aılyq balasymen qalǵan jal­ǵyzbasty ana Ásel Omarova da Asta­nadan bir bólmeli páterdiń kiltine ıe boldy. Oǵan demeýshilik etken birneshe kompanııa, iri bıznes ortalyqtaryna uıymdastyrýshy Perızat Qaırat hanym alǵys bildirdi.

Festıval aıasynda Kenjebek Nur­dol­daı, «Sensitive» bı toby, Altyn­shash Muqataeva syndy erekshe qajet­tiligi bar mýzykanttar men bı­shiler óner kórsetti. Sondaı-aq áıgili ánshi Dımash Qudaı­bergen, estra­da juldyzdary Tamara Asar, Na­zıma, «Bastaý» toby, Aıdyn jáne taǵy bas­qalary ónerlerin kórer­men nazaryna usyndy.

Is-sharany «Biz birgemiz, Qazaqstan» qoǵamdyq qory jáne Astana qalasynyń ákimdigi uıymdastyrdy.