Tótenshe jaǵdaılardy aldyn alý maqsatynda kólik júrgizýshilerine turaqty negizde daýyl týraly habarlamalar jiberiledi. Alys saparǵa shyqpaýǵa keńes alatyn júrgizýshiler nemquraılyq tanytyp, qar qursaýynda qalyp jatady.
Máselen jol salasynyń mamandary kúre joldardyń boıynda 600-ge jýyq adamǵa kómek kórsetken. Atap aıtqanda aýa raıynyń qolaısyzdyǵyna baılanysty 232 kólik jyly bokstarǵa ornalastyrylsa, 563 adam jylytý pýnktterine jetkizildi.
Bul rette avtomobıl joldaryn kútip ustaıtyn qyzmetkerlerdiń tehnıkasy kólikti qar qursaýynan shyǵarýǵa nemese evakýasııalaýǵa beıimdelmegenin eskerte ketken jón. Soǵan qaramastan sala mamandary tıisti eskertýdi elemegen júrgizýshilerdiń batyp qalǵan kólikterin shyǵarýǵa májbúr bolady.
Aıta ketsek, bıyldan bastap aýa raıynyń qolaısyzdyǵyna qatysty kólik qozǵalysyn shekteý jónindegi habarlamany eskermegen tulǵalarǵa ákimshilik jaýapkershilik qarastyrylǵan. Tıisti ózgeris Úkimettiń «Joldardaǵy kólik quraldarynyń qozǵalysyn toqtatý nemese ýaqytsha shekteý qaǵıdalaryn bekitý týraly» qaýlysyna engizildi.
