Onyń aıtýynsha, Qazaqstan álemniń 186 memleketimen dıplomatııalyq baılanys ornatqan.
«2022 jyly vızasyz elderdiń tizimi ártúrli sanattaǵy tólqujattar boıynsha 80 memleketke deıin keńeıtildi. Pasporttardyń ártúrli sanattary boıynsha 9 jańa elmen ózara kelisimder jasaldy: Maldıv araldary, Andorra, Nıkaragýa, Venesýela, Bolıvııa, Paragvaı, Domınıkana, Albanııa jáne Belız. Budan basqa, osy jyldyń 12 qazanynda Katarmen dıplomatııalyq jáne arnaıy pasporttardyń ıeleri úshin vızalardan ózara bosatý týraly úkimetaralyq kelisimge ózgerister engizý týraly hattamaǵa qol qoıyldy, ol jalpy azamattyq pasporttardyń ıelerin vızalyq talaptardan bosatady», dedi Aıbek Smadııarov.
Sondaı-aq ol qolaıly ınvestısııalyq ahýaldy qurý, iskerlik baılanystardy jandandyrý jáne eldiń týrıstik áleýetin arttyrý úshin Qazaqstan Úkimeti Iran Islam Respýblıkasynyń, Qytaı Halyq Respýblıkasynyń jáne Úndistannyń azamattary úshin vızasyz rejım engizgenin jetkizdi. Atalǵan elderdiń azamattaryna Qazaqstan aýmaǵynda 14 kúnge deıin bolýǵa múmkindik berilgen.
