Jambyl oblysy Tótenshe jaǵdaılar departamentiniń habarlaýynsha, Jýaly aýdanyndaǵy Shaqpaq asýynda Respýblıkalyq mańyzy bar Almaty-Termez-Tashkent avtojolynyń 574-ten 587 kılometrge deıingi ýchaskesiniń jabylýyna baılanysty TJD kúshterimen (10 qyzmetker jáne úsh birlik tehnıka) júrgizýshiler men jolaýshylarǵa kómek kórsetý úshin patrýldeý júrgizilýde.
«Patrýldeý barysynda qarda qalǵan jeńil avtokólikterden 110 adam qutqaryldy, onyń ishinde 37-si - bala. Barlyǵy M.Jumabaev atyndaǵy №29 mektepte ornalasqan jaqyn jerdegi jylytý pýnktine jetkizildi. Barlyǵyna psıhologııalyq kómek kórsetildi, zardap shekkender joq», delingen vedomstvo habarlamasynda.
Trassalarda patrýldeýge 61 adam jáne 27 birlik tehnıka jumyldyryldy. Bul - TJD-nyń 18 qyzmetkeri, «Qazaqavtojoldyń» 28 qyzmetkeri, 6 polısııa qyzmetkeri men jergilikti atqarýshy organdardyń 9 qyzmetkeri.
«QazAvtoJol» UK» AQ Jambyl oblystyq fılıalynyń málimetinshe, qysqy kezeńge óńirdiń problemalyq trassalarynda bes jylý pýnkti, bes óndiristik baza jáne 58 birlik tehnıka daıyndalǵan.
Aýa raıynyń qolaısyzdyǵyna baılanysty Jambyl oblysynyń polısııa departamenti júrgizýshilerge jol qozǵalysy erejeleri men qaýipsizdik normalaryn saqtaýdy, avtokóliktiń tehnıkalyq jaı-kúıine muqııat qaraýdy, múmkindiginshe qala syrtyndaǵy trassalarǵa shyqpaýdy usynady.
