Is-sharaǵa Qadyr Myrza Áli atyndaǵy mádenıet jáne óner ortalyǵynyń jetekshisi, aqyn Baýyrjan Halıolla, Qadyr Myrza Áli atyndaǵy qordyń dırektory, ánshi-sazger Donedil Qajymov, ardager-ustaz Úzildik Eleýbaeva, Oral qalasy ákiminiń orynbasary Mırbolat Nurjanov, Oral qalalyq bilim bóliminiń basshysy Aqjarqyn Temirhanovalar qatysty.
Mektep dırektory Nurlan Sattyqovtyń aıtýynsha, bilim ordasynyń shákirtteri aqyn esimin maqtanysh tutyp, óleńderin jatqa aıtady. Mektepte Qadyrtaný fakýltatıvtik sabaǵy synaqtan ótýde. Bolashaqta ol sabaq búkil qala mektepterine taratylmaq.
Qadyr aqyn – shyn máninde eńkeıgen káriden eńbektegen balaǵa deıin tanymal bolǵan qalamger. Ábish Kekilbaı aıtqandaı, «Qadyrdyń ózin bilmese de, sózin bilmeıtin qazaq joq». Ádebıettiń ár salasynda jemisti eńbek etken Qadyr balalar ádebıetine de ólsheýsiz úles qosty. Mektep oqýshylary onyń talaı jyryn jatqa aıtatyny sondyqtan.
Erekshe oqıǵa – mektep ǵımaratynda Qadyr aqynnyń barelef beınemúsini ornatylǵany boldy. Endi mektep tabaldyryǵyn attaǵan ár shákirtti, árbir jandy Qadyr aqynnyń oıly júzi qarsy alatyn bolady.
Búginde Batys Qazaqstan oblysynyń ózinde úsh mektepke Qadyr Myrza Áliniń esimi berilgen. Odan bólek, Astana qalasynda eki mektep, Atyraý oblysynda bir bilim ordasy aqyn atyn ıelengeni belgili boldy. Nurlan Sattyqov bolashaqta Qadyr atyn ıelengen mektepter ózara baılanys ornatyp, ortaq bastamalardy qolǵa alý múmkindigin aıtty.
Batys Qazaqstan
