Vedomstvonyń málimetinshe, oqýdan tys ýaqytta Taldyqorǵan qalasyndaǵy páterlerdiń birinde oqys oqıǵa bolǵan.
«Oblys ákimdiginiń, bilim basqarmasynyń, quqyq qorǵaý organdarynyń, bilim berý salasyndaǵy sapany qamtamasyz etý departamentiniń ókilderinen turatyn arnaıy komıssııa quryldy. Olar oqıtyn oqý oryndarynyń tárbıe jumysyna tekserý júrgiziledi. Zardap shekkenderge barlyq qajetti psıhologııalyq kómek kórsetiledi. Budan basqa, dene kúshin qoldanǵan adamdardy odan ári oqytý máselesi qaralady», dep habarlady óńirlik bilim basqarmasy.
Qazirgi ýaqytta atalǵan fakt boıynsha ákimshilik is júrgizý bastalǵany atap ótildi.
Buǵan deıin polısııa qyzmetkerleri janjalǵa Taldyqorǵan men Qaratal aýdanynyń túrli oqý oryndarynda oqıtyn jetkinshekter qatysqanyn aıtqan edi. Quqyq qorǵaý organdary jábirlenýshi qyz óziniń ókilimen (ájesimen) birge polısııaǵa resmı ótinish berýden úzildi-kesildi bas tartqanyn atap ótti.
