Bul úıde 127 páter bar. Jarylys 8-qabattaǵy páterde bolǵan. Jaryq júıesinen aǵytylǵan úı turǵyndary dereý qonaq úıler men jataqhanalarǵa ornalastyrylǵan. Jarylystyń sebebi alǵashqy boljam boıynsha gaz dep habarlanǵan edi. Alaıda sońyra oqıǵa ornyn zertteý barysynda gaz qurylǵysy tabylmaǵan. Qazir jarylystyń naqty sebebi anyqtalyp jatyr.
Oblystyń tótenshe jaǵdaılar departamentiniń habarlaýynsha, 10 qańtarda saǵat 21.29-da Respýblıka dańǵyly, 18/2 mekenjaıdaǵy 16 qabatty 127 páterli turǵyn úıden órt shyqqany týraly habarlama kelip túsken.
«8-qabattaǵy páterde jalpy aýdany 30 sharshy metrdi alǵan órt boldy. Janyp jatqan páterden 1979 jyly týǵan er adam qulap ketken. Ol aýrýhanaǵa jatqyzyldy. Barlaý barysynda úsh adamnyń denesi tabyldy. Boljam boıynsha ekeýi – er, bireýi – áıel adam. Tótenshe jaǵdaılar departamenti qyzmetkerleriniń kúshimen 48 adam qutqaryldy. Onyń ishinde 9 bala bar. 82 adam evakýasııalandy, onyń 21-i bala. Saǵat 22.55-te órt sóndirildi. Tilsiz jaýdy aýyzdyqtaýǵa TJM bólimshelerinen 88 adam men 23 tehnıka jumyldyryldy.
Oqıǵa ornynan gaz qurylǵylary tabylǵan joq. Eshqandaı qıraý men qurylymdyq buzylý joq. Jylýmen jabdyqtaý júıeleri buzylmaǵan. О́rttiń sebebi anyqtalýda», dep habarlady tótenshe jaǵdaılar departamenti. Evakýasııalanǵan turǵyndar týystaryna, qonaq úılerine ornalastyryldy. Oqıǵa ornynda psıhologtar jumys istep jatyr.
«Barlyq 126 páterdiń turǵyny evakýasııalandy. Jergilikti jerde jedel-tergeý toby jumys isteıdi. Qazir úıde elektr qýaty joq. Biraq jylý bar. Jaqyn arada úı tekserilip, turǵyndardy qaıtarý jóninde sheshim qabyldaımyz. Páterlerine oralǵysy keletinder qaıtyp keledi. Tómengi jeti páter ǵana zardap shekti. Joǵarǵy, tómengi páterlerdi órt sharpyǵan joq», dedi Qaraǵandy ákimi mindetin atqarýshy Meıram Kojýhov.
Dárigerlerdiń aıtýynsha, aýrýhanaǵa túsken naýqastyń jaǵdaıy ortasha aýyr.
«Naýqas esin joǵaltqan joq, reanımasııada jatyr. Dárigerler tarapynan barlyq qajetti medısınalyq kómek kórsetiledi. Naýqastyń keýde qýysy, jilinshik súıekteri synǵan», dep habarlady Qaraǵandy oblysy densaýlyq saqtaý basqarmasynyń baspasóz qyzmeti.
Qaraǵandy oblysynyń polısııa departamenti órt boıynsha qylmystyq is qozǵalǵanyn málimdedi. Kináli anyqtalsa, oǵan eki myń aılyq eseptik kórsetkish mólsherinde aıyppul salynady nemese ol eki jylǵa bas bostandyǵynan aıyrylady.
«Kópqabatty úıde bolǵan órt deregi boıynsha, polısııa qyzmetkerleri Qylmystyq kodekstiń 204-baby 2-tarmaǵy «Otpen nemese qaýiptiligi joǵary ózge de kózdermen jumys isteý arqyly jasalǵan aýyr zardaptarǵa ákelgen bótenniń múlkin joıý nemese búldirý» boıynsha qylmystyq isti tirkedi. Bul baptyń sanksııasyna sáıkes eki myń aılyq eseptik kórsetkish mólsherinde aıyppul nemese sol mólsherde túzeý jumystaryna jiberý nemese eki jylǵa deıin bas bostandyǵynan aıyrý jazasy kózdelgen. Qazirgi ýaqytta tıisti saraptamalar taǵaıyndaldy. Tergeý amaldary júrgizilýde», deıdi Qaraǵandy oblysy polısııa departamentiniń baspasóz qyzmeti.
Qaraǵandy
