Kúdikti retinde ustalǵan adam – buryn sotty bolmaǵan 29 jastaǵy áıel. Kelinshek Astana qalasynan oblys aýmaǵynda satý úshin jasandy esirtki ákelgen kezde ustaldy. Sarǵysh tústi 20 túıinshekke salynǵan aq untaq sıntetıkalyq esirtki bolyp shyqty. Kúdiktiniń turǵylyqty jerin tekserý barysynda taǵy da sondaı untaqtar tabylǵan. Olardy usaqtap, bólektep salyp qoıatyn jyltyr qaǵazdar, elektrondyq tarazylar da tabyldy. α-PvP formýlasymen belgilenetin bul sıntetıkalyq esirtki qylmys áleminde «tuz» dep atalady. Tabylǵan barlyq esirtkiniń salmaǵy – 1 kg 113 gramm. Bul júzdegen adamdy esinen aıyrýǵa jetetin zııandy zat.
Qylmyskerdiń ákesi de kúdikke iligip, onyń úıi men garajyna tintý júrgizilgen. Tintý kezinde 51 jastaǵy er azamattyń garajynan PPSh avtomatynyń mýlıajy, IJ-K tegis uńǵyly ańshy myltyǵy, «IJ-38» pnevmatıkalyq vıntovkasy, «Perfecta» gaz tapanshasy, eki myńnan astam qurylys-montaj oq-dárileri men basqa da oq-dári, «F-1» oqý-jattyǵý granatasy shyqty. Eshqaıda tirkelmegen osynsha qarý-jaraqty adamnyń kimnen qorǵaný úshin jınaǵany ázirge belgisiz. Sarapshylar onyń bári de atýǵa qaýqarly ekenin dáleldedi. Qazir sarapshylar bul qarýlardyń qylmys áleminde buryn qoldanǵan-qoldanylmaǵanyn zerttep jatyr.
Oblystyq PD bastyǵynyń orynbasary Rýslan Nazarovtyń aıtýynsha, kúdiktiniń esirtkini satyp, taratý úshin basqa jerden alǵany, tasymaldaǵany jáne saqtaǵany Qylmystyq kodekstiń 297-babyna sáıkes sotqa deıingi tergeýdiń biryńǵaı tizilimine engizilgen. «Polısııa qyzmetkerleri esirtkini jetkizý arnalarynyń jolyn kesý, satý faktilerin joıý boıynsha jumys júrgizip jatyr. О́tken jyly esirtkige qatysty qylmystary úshin 123 adam jaýapkershilikke tartylsa, onyń 35-i esirtki satqany úshin jazalandy. Zańsyz aınalymnan 415 kılodan astam psıhbelsendi zattar alyndy», dedi ol.
PETROPAVL
