«Tuńǵysh Prezıdent – Elbasy týraly» Konstıtýsııalyq zańnyń kúshi joıyldy dep taný týraly» Konstıtýsııalyq zańnyń jobasyn usyna otyryp, depýtat Erlan Saırov ótken jyly búkilhalyqtyq referendým nátıjesinde elde jańa Konstıtýsııa qabyldanǵanyn eske saldy. Jańa Konstıtýsııaǵa Qazaqstan halqynyń 77%-y daýys berdi.
«Konstıtýsııalyq reforma - Táýelsizdiktiń 30-shy jylyndaǵy bılik tarmaǵynyń ınstıtýttaryn nyǵaıtýdaǵy jáne qoǵamda demokratııany qalyptastyrýdaǵy úlken qadam. Konstıtýsııaǵa engizilgen ózgeristerge sáıkes Tuńǵysh Prezıdent - Elbasynyń mártebesi men ókilettikteri Respýblıka Konstıtýsııasynda jáne konstıtýsııalyq zańda aıqyndalatyny týraly normany kózdeıtin Konstıtýsııanyń 46-babynyń 4-tarmaǵy alynyp tastaldy. Tereń saıası transformasııa kezeńinde Qazaqstan demokratııa men plıýralızmdi ustanady, jeke tulǵanyń bılikti basyp alýyna yqpal etetin qandaı da bir tetikterdi alyp tastaý mańyzdy», dep atap ótti Erlan Saırov.
Onyń aıtýynsha, Májilis depýtattarynyń toby halyqtyń basym kópshiliginiń pikirin eskere otyryp, osy zań jobasyn usyndy.
О́z kezeginde «Jańa Qazaqstan» depýtattar toby osy másele boıynsha Konstıtýsııalyq sotqa júgindi. Konstıtýsııalyq Sot «Qazaqstan Respýblıkasynyń Tuńǵysh Prezıdenti - Elbasynyń mártebesi týraly» zańnyń eldiń jańa Konstıtýsııasyna sáıkes kelmeýi týraly sheshim shyǵardy.
«Barlyq bılikti óz qolyna alýǵa tyrysý, Qazaqstannyń saıası prosesinde saıası ınstıtýttardy monopolııalaý, tájirıbe kórsetkendeı, saıası qundylyqtardy qunsyzdandyrýǵa jáne memlekettiń damýyna teris áser etýge qabiletti. Sondyqtan bolashaqta mundaı olqylyqtarǵa qoǵamdyq-saıası ımmýnıtetti qalyptastyrý óte mańyzdy. Joǵaryda aıtylǵandardy basshylyqqa ala otyryp, saıası, quqyqtyq negizdiń joqtyǵyn eskere otyryp, «Qazaqstan Respýblıkasynyń Tuńǵysh Prezıdenti - Elbasynyń mártebesi týraly» Konstıtýsııalyq zańnyń kúshi joıyldy degen Konstıtýsııalyq zań jobasy usynyldy», dep naqtylady Erlan Saırov.
Depýtattar qujatty eki oqylymda qarady. Talqylaýdan keıin olar ony biraýyzdan qoldady.
Osylaısha, Elbasy mártebesin joǵaltý týraly zań qabyldandy dep esepteledi. Aldaǵy ýaqytta ol Memleket basshysyna qol qoıýǵa jiberiledi.
