Búgin Baıanaýylda Pavlodar oblysynyń ákimi Asaıyn Baıhanov aýdannyń jańa basshysyn tanystyrdy. Aımaq basshysy Serik Batyrǵojınovke Baıanaýyl aýdanynyń ákimi laýazymyndaǵy jumysy úshin alǵysyn bildirdi. Al jańa ákim Ardaq Kisentaevqa jumysta tabys tilep, onyń aldyndaǵy basty mindetterdi belgiledi.
Aýdannyń jańa ákimi eldi mekenderdi sýmen jabdyqtaý boıynsha jobalardy jalǵastyryp, joldar men ınjenerlik ınfraqurylymdy jóndeýge nazar aýdaryp, jańa týrıstik maýsymǵa daıyndyqty bastaýy tıis. О́ńir basshysy bul jumystardyń baǵasyn turǵyndar berýi tıis ekenin, ol úshin aýdan turǵyndarymen turaqty jáne tıimdi dıalog ornatý qajettigin atap ótti.
Ardaq Kisentaev 1981 jyly Pavlodar oblysy Baıanaýyl aýdany Q. Sátbaev atyndaǵy aýylda dúnıege kelgen. Eki joǵary bilimi bar.
Eńbek jolyn 2005 jyly Baıanaýyl memlekettik ulttyq tabıǵı parkinde bastaǵan. 2011 jyldan bastap memlekettik qyzmette. 2011-2022 jyldary «Qaratomar aýyldyq okrýgi ákiminiń apparaty» MM-de ártúrli laýazymdarda jumys istedi(jetekshi maman, bas maman, aýyldyq okrýg ákimi). 2022 jyldyń qyrkúıeginen bastap qazirgi ýaqytqa deıin Baıanaýyl aýdany ákiminiń orynbasary qyzmetin atqardy.
Atap óterligi, memlekettik qyzmette uzaq jyldar eńbektenip kele jatqan Serik Batyrǵojınov Pavlodar oblysy ákiminiń orynbasary qyzmetine aýysty. Ol ónerkásip, aýylsharýashylyǵy, kásipkerlik jáne ınvestısııalar, jer qatynastary, jer qoınaýyn paıdalaný, qorshaǵan ortany qorǵaý, veterınarııa jáne týrızm salalaryna jetekshilik etetin bolady.
