Atalǵan is-sharaǵa Premer-mınıstr Álıhan Smaıylov, Parlament Senaty men Májilis depýtattary, memlekettik organdar men kompanııalardyń basshylary, sondaı-aq qurylymdyq bólimshelerdiń, vedomstvolyq baǵynysty uıymdardyń jáne IIDM qoǵamdyq keńesiniń, «Atameken» UKP-nyń, kásipkerlik qoǵamdastyq pen bıznes-qaýymdastyqtardyń ókilderi qatysyp jatyr.
О́z baıandamasynda Indýstrııa jáne ınfraqurylymdyq damý mınıstri Marat Qarabaev 2022 jyldaǵy vedomstvonyń qyzmetindegi negizgi nátıjelerge qysqasha toqtalyp, osy jylǵa arnalǵan josparlardy tizbektep shyqty.
Birinshi kezekte IIDM-niń basshysy bıyl orta jáne joǵary bólinistegi ónimderdi óndirý maqsatynda ónerkásiptik damý salasyndaǵy qoldanystaǵy zańnamany jetildirý jónindegi jumys jalǵastyrylatynyn aıtty. Sondaı-aq salalyq josparlar men ımportty almastyrýdyń óńirlik baǵdarlamalary qabyldanady dep kútiledi. M.Qarabaevtyń aıtýynsha, jyl sońyna deıin 1,1 trln teńgege 16,3 myń turaqty jumys ornyn ashýdy kózdeıtin 149 jańa jobany iske asyrý josparlanǵan.
Memleket basshysynyń tapsyrmasyna sáıkes byltyrǵy jeltoqsan aıynda mınıstrlik Qazaqstan Respýblıkasynyń kólik-logıstıkalyq áleýetin damytýdyń 2030 jylǵa deıingi tujyrymdamasyn bekitti. Bul salany odan ári damytyp, aldaǵy is-qımyldy aıqyndaıtyn negizgi qujat sanalady.
Elimizdiń tranzıttik áleýetin arttyrý úshin byltyr temirjol salasyndaǵy iri ınfraqurylymdyq jobalar júzege asyryla bastaǵanyn aıta keteıik. Atap aıtqanda, 2022 jyldyń qarasha aıynda temirjol kóligi salasyndaǵy iri jobalardyń biri – «Dostyq-Moıynty» temirjol ýchaskesiniń ekinshi torabynyń qurylysy bastalǵan bolatyn. Atalǵan jobany iske asyrý osy ýchaskedegi jyljymaly quramdy ótkizýdi 5 esege arttyrýǵa múmkindik beredi (12-den 60 jup poıyzǵa deıin).
«2023 jyly Almaty stansasyn aınalyp ótetin temirjol jelisiniń qurylysyn bastap, sondaı-aq tranzıttik ýchaskelerdegi tar sheńberli jerlerdi joıý jónindegi jumysty jalǵastyrýdy josparlap otyrmyz. Osy jyldyń sońyna deıin «Darbaza–Maqtaral», «Baqty – Aıagóz» syndy jobalardyń tehnıkalyq qujattamalaryn ázirleý jumystary aıaqtalýy tıis. Sodan keıin atalǵan jobalardy iske asyrýdy bastaımyz», dedi vedomstvo basshysy.
Bıyl avtojol salasynda jalpy kólemi 10,5 myń shaqyrym (onyń ishinde respýblıkalyq jeli boıynsha - 7,3 myń shaqyrym, jergilikti jeli boıynsha - 3,2 myń shaqyrym) joldy qurylys jáne jańǵyrtý jumystarymen qamtý jalǵastyrylady.
Elimizdiń Prezıdenti Qasym-Jomart Toqaevtyń tapsyrmasy boıynsha salynatyn joldyń sapasyn arttyrý úshin osy jyldyń sońyna deıin FIDIC halyqaralyq erejeleriniń sharttary engizilmek. Negizgi 50 normatıvti qurý arqyly qoldanystaǵy 1200-den astam salalyq normatıv ońtaılandyrylady.
Budan basqa EPCM-kelisimshart qaǵıdasy boıynsha avtojol jobalaryn iske asyrýǵa kóshý júzege asyrylyp, bul bir oryndaýshyǵa jobanyń tolyq ómirlik sıklin, atap aıtqanda jobalaý satysynan bastap osy ýchaskeni 10 jyl boıy kútip ustaýǵa múmkindik beredi.
Qurylys salasynda 2023 jyly 15,3 mln sharshy metr turǵyn úıdi nemese 143,5 myń baspanany paıdalanýǵa berý josparlanyp otyr.
«Mınıstrlik ekonomıka salalarynyń turaqty damýyn qamtamasyz etý men halyqtyń ál-aýqatyn arttyrý jónindegi jumysty jalǵastyrady. Prezıdent Qasym-Jomart Toqaev aldymyzǵa qoıǵan mindetterdi sapaly ári ýaqytyly iske asyrý úshin barlyq qajetti sharany qabyldaımyz», dedi Marat Qarabaev.
Mınıstrdiń baıandamasynan keıin Indýstrııa jáne ınfraqurylymdyq damý vıse-mınıstrleri E.Daýylbaev, I.Sharhan jáne A.Ydyrysov ózderiniń quzyryna kiretin salalar boıynsha byltyr atqarylǵan jumystar jóninde muqııat aıtyp beredi.
