Júktiliktiń 39-aptasynda kelinshektiń boıynda pankreonekroz órshigen, bul – jedel pankreatıttiń ómirge qaýip tóndiretin asqynǵan túri, uıqy bezi tininiń ólgenin bildiredi. Basym kópshiliginde dene múshesiniń jetkiliksiz damýyna, qannyń ýlanýyna jáne naýqastyń ólimine ákeledi. Naýqas áıeldi ishiniń joǵarǵy bóligi qatty shanshyp aýyryp, júrek aıný, qusý belgileri mazalaǵan. Naýqas shuǵyl túrde jansaqtaý bólimine jatqyzyldy. Ana men boıyna bitken sábı ómirine qaýip tóngenine baılanysty jan saqtaý bólimindegi akýsher-gınekologtar brıgadasy jedel bosandyrý týraly sheshim qabyldady.
Bosanǵannan keıin kelinshektiń jaǵdaıy aýyr boldy, aýrýhananyń bas dárigeri Nurbol Tursynbaev áriptesterimen birlese dıagnostıka júrgizip, klınıkalyq jaǵdaıdyń kúrdeliligine qaramastan hırýrgııalyq aralasýsyz emdeý týraly sheshim qabyldady.
«Júrgizilip jatqan em aıasynda jaǵdaıdy turaqtandyryp, áıeldi jalpy hırýrgııa bólimshesine aýystyrýǵa múmkindik týdy. Baqytymyzǵa oraı, operasııa qajet bolmady, kóp uzamaı áıeldiń jaǵdaıy ońaldy», dedi emdeýshi dáriger Aıdar Jumaǵalıev.
Qazir ana men bala ózderin jaqsy sezinedi jáne aýrýhanadan shyǵýǵa daıyndalyp jatyr.
