Temirlan Ekibastuzǵa qarasty Qoıandy aýylynyń orta mektebin bıyl bitiredi. Bolashaqta IT salasynyń mamany bolýdy maqsat bıiginde ustaǵan óreli bozbalanyń biri. Jýyqta ol vırtýaldy oıyndardy qurastyrý konkýrsyna qatysyp, Roblox onlaın-baǵdarlamasy negizinde Ekibastuzdaǵy kómir kenishteri jaıly avtorlyq oıynyn usyndy. Roblox, bul – qoldanýshylarǵa óz oıynyn qurastyryp, oıyndar oınaýǵa, júıede otyratyn ózge adamdarmen sóılesýge múmkindik beretin vırtýaldy platforma. Oıynǵa kúnine 800 myń oıynshy kiredi eken. Al Roblox-tyń álem boıynsha 16 mln qoldanýshysy bar. Vırtýaldy oıynqumarlar úshin bul jer aıryqsha álem, qanshama adam bos ýaqytyn onlaın keńistikte belgili bir keıipker retinde ótkizedi. Mysal úshin tanymal Adopt Me oıyndar pleısinde qoldanýshy belgili bir janýardy óz kútimine alyp, ony baǵyp-qaǵady. Al Tower of Hell oıyny kedergilerden turatyn oıyndardy unatatyndar úshin naǵyz ǵajaıyp ortanyń ózi.
Qysqasy geım-developerler (oıyn qurastyrýshylary) úshin Roblox óte tartymdy platforma, bul jerde jaqsy tabys tabýǵa da bolady. Mundaǵy vırtýaldy júıe úshin álem boıynsha 2 mln-nan astam qurastyrýshy oıyndar qurastyrady.
Temirlan Mustafın kishkene kezinen kompıýterge jaqyn bolyp ósipti. О́ziniń alǵashqy oıynyn nebári 2-synypta oqyp júrgende qurǵan eken.
– Ol óte qarapaıym oıyn edi. Dese de, ol meniń vırtýaldy oıyndar ındýstrııasyna jasaǵan alǵashqy qadamym. Ýaqyt óte kele bul salaǵa degen qyzyǵýshylyǵym arta tústi. Bolashaqta osy baǵytta damyp, bilim alsam degen josparlarym bar, – deıdi jas talant.
Qarapaıym ǵana aýyl balasyna jýyqta AQSh-tan óńirimizge arnaıy kelgen kásipker Maksım Mıheenkomen kezdesý úlken áser etken. Maksım kásipker ǵana emes, 2D, 3D aýtsorsıngimen tanymal ári iri jobalarǵa anımasııalar men baǵdarlamalar qurastyratyn «1518 Studios» stýdııasynyń negizin qalaýshy. Byltyr kúzde IT maman Ekibastuzda jastar úshin sheberlik saǵatyn ótkizgende sabaǵyna qatysyp, paıdaly dúnıelerdi úırengenin aıtady. «Mıheenkomen kezdesý meni shabyttandyrdy. Shara sońynan tanymal mamanǵa jaqyndap, ózimdi mazalap júrgen ıdeıalar jóninde oı bólistim. Aıtqandarym ony qyzyqtyryp, oıyn qurý boıynsha testileýden ótýdi usyndy. Jasaǵan baǵdarlamam ózim úshin áli pisip-jetilmegen, resýrstary jetkiliksiz bolyp kóringenimen, konkýrsta baǵalaýshylardyń joǵary baǵasyn alyp, jeńip ketti», dep bólisti áserimen Temirlan.
M.Mıheenko 16 jasar oqýshynyń bul salaǵa ıkemi zor ekenin aıtady. IT salasynyń tolyqqandy mamany bolýǵa degen umtylysyn qoldap, Roblox jáne Sandbox platformalary úshin jasaǵan baǵdarlamalarynyń nátıjeli shyqqanyna qýanyshty ekenin jetkizdi.
Jýyqta konkýrs uıymdastyrýshylary Temirlandy Astana qalasyna arnaıy shaqyrtyp, «1518 Studios» stýdııasynyń atqarýshy dırektory Maksım Mıheenko jeńisimen quttyqtady. Jas órenge makbýk syıǵa tartyp, anasyna balasyna senim artyp, qoldaǵany úshin alǵystaryn aıtty. Al Temirlan úshin bárinen mańyzdysy, atalǵan kompanııadan onlaın rejimde synaq merziminen ótýge shaqyrtý tústi. Bul múmkindikti daryndy bozbala múlt jibermeımin dep otyr. Aldaǵy ýaqytta ol oqýyn jalǵastyryp, qashyqtan jumys istep tabys tabýdy maqsat etip júr. Buǵan qosa ózi úshin aıaqtalmaı qalǵan joba – Ekibastuzdaǵy kómir kenishteri jaıly vırtýaldy oıynyn jetildirý qajet dep sanaıdy. Temirlannyń oıyny arqyly álemniń oıynshylary jergilikti alyp kenishter, ondaǵy kúndiz-túni bir tynym tappaıtyn ekskvatorlar, alyp mashınalar men kómir óndiretin ózge de tehnologııalar jóninde keńinen tanysyp, bilmek.
Pavlodar oblysy,
Ekibastuz qalasy,
Qoıandy aýyly
