Kıýrı ınstıtýtynyń halyqaralyq damý bóliminiń basshysy J.Sýste, skrınıng jónindegi maman A.Lezýr, medısınalyq menedjment jónindegi keńesshi L.Montevekkı jáne alǵashqy kómek jónindegi maman L.Kıslıng sút bezi qaterli dertiniń aldyn alý, skrınıng júrgizý jumystaryn baqylap, mammograf, ýltra dybystyq zertteý men mammolog kabınetteriniń jumystaryn kórdi. Sonymen qatar mammografııalyq skrınıng kezeńderin júrgizýdiń qurylymy men dıagnostıkaǵa jáne erte emdeýge arnalǵan qoldanystaǵy apparattarmen egjeı-tegjeıli tanysty.
Oblystyq kópsalaly klınıkanyń dırektory Madııar О́mirbaev Jetisý óńiri onkologııalyq kómek kórsetý, sondaı-aq skrınıngtik baǵdarlamalardy uıymdastyrý boıynsha respýblıka boıynsha kóshbasshy oblys ekenin atap ótti.
Fransııadan kelgen mamandar Kóksý ortalyq aýdandyq aýrýhanasyna baryp, emhana sheńberinde aýdandyq deńgeıdegi skrınıngtik baǵdarlamanyń uıymdastyrylýymen jáne qaterli isikterdiń aldyn alýǵa baǵyttalǵan áıel jáne erlerdi qaraý, dárigerge deıingi kabınetter jumysymen tereńirek tanysty.
Aýrýhanada Fransııadan kelgen delegasııa ókilderine sút bezi qaterli dertiniń skrınınginiń barlyq kezeńi, sonyń ishinde tirkeý, tekserý kabınetteri, mammologter kabınetteri, mammografııa kabınetteri, ýltradybystyq kabınetter kórsetildi.
«Biz skrınıngke qatysty biraz málimet aldyq. Eki memlekettiń alǵa qoıyp otyrǵan maqsaty bir – mammografııadan ótkizý jáne skrınıng arqyly aýrýdy erte satysynda anyqtaý jáne kóp ýaqyt joǵaltpaı emdi bastaý. Sondyqtan bul baǵyttaǵy jumystardy birge jalǵastyramyz», dedi Kıýrı ınstıtýtynyń halyqaralyq damý bóliminiń basshysy J.Sýste.
Jetisý oblysy Densaýlyq saqtaý basqarmasynyń málimetinshe, óńirde sút bezi qaterli dertine shaldyqqan 159 jańa jaǵdaı tirkelip, jalpy 1 368 áıel esepte tur.
Aıta keteıik, 2018 jyly óńirde onkologııalyq aýrýlardy erte anyqtaýǵa múmkindik beretin jasandy ıntellektimen «PACS júıesin engizý» aýqymdy jobasy iske asyrylǵan edi.
Jetisý oblysy
