Ekonomıka • 24 Qańtar, 2023

Ilkimdi jobalarǵa – iri ınvestısııa

35 ret kórsetildi

Ekonomıkanyń damýyna serpin beretin tetiktiń biri – ınvestısııa. Bul ishki óndiriske baǵyttalǵan naqty qarjy aınalymynan bólek eldegi jaǵdaıdyń turaqtylyǵyn da aıshyqtaıtyn mańyzdy faktor. Al sheteldik ınvestorlardyń ilkimdi jobalarǵa kóptep kele bastaýy jaqsylyqtyń nyshany. Ásirese, aımaqtarda ınvestısııalyq jobalardyń kóbeıýi jarqyn bolashaqqa bastaıtyn senim joly ekeni daýsyz.

Almaty oblysynda da shetel ınvestısııasymen jumys isteý baǵy­tynda aýqymdy is-shara atqarylý­da. Mysaly, qazir Almaty oblysy álem boıynsha 97 elmen saýda yntymaqtastyǵyn júrgizip otyr. О́tken jyldyń 7 aıynda oblystaǵy eksport aınalymy 179,9 mln dollardy qurady. Budan basqa sheteldik ınvestorlardyń qatysýymen ashylǵan, jalpy quny 1,3 mlrd dollar bolatyn 19 joba júzege asyrylyp jatyr. Bul 6 500 jumys ornyn qurýǵa múmkindik beredi. Tipti árige barmaı-aq, 2022 jyldyń segiz aıy aralyǵynda ǵana oblys ekonomıkasyna quıylǵan ınvestısııa aǵyny 19 paıyzǵa ulǵaıyp, jalpy qarjylaı kólemi 320 mlrd teńgeden asyp túskenin aıtsaq bolady. Munan bólek, oblystyń ınvestısııalyq tartymdylyǵyna álemge aty áıgili qarjy uıymdary nazar aýdaryp otyr. Byltyr Eýropalyq ınvestısııa bankiniń ókilderi aımaqqa arnaıy sapar jasap, birqatar jobany qarjylandyrýǵa nıetti ekenin bildirdi. Oblys ákimdigimen mámileli memorandým jasalǵan-dy. Al Eýropalyq ınvestısııa banki degen «eki shoqyp, bir qaraıtyn» uıym bolǵandyqtan, bul óńirdegi jobalardyń sátti júzege asatyndyǵyna kepildik bar degen sóz. Jalpy, Eýropalyq ınvestısııa bankiniń jumys baǵyty negizinen 4 salaǵa baǵyttalǵan. Innovasııalardy qoldaý, shaǵyn bıznesti damytý, klımatty qorǵaý jáne ınfraqurylym nysandaryn qurý sııaqty negizgi ustanymdary bar. Osy maqsatta bank memlekettik jáne jeke sektorǵa, onyń ishinde ınnovasııalyq startaptardy qarjylandyrý úshin kredıtter beredi.

– Ádette shaǵyn jáne orta bızneske eldiń óz bankteri de qoldaý kórsetedi. Al Eýropalyq ınvestısııa banki orta deńgeıli kompanııalarǵa, onyń ishinde ǵylymı-zertteý salasy men damýǵa qajetti ınvestısııa­ny tikeleı qoldaý retinde kórsete alady. Jalpy, biz Qazaq­stanǵa jeke ınvestorlar men mem­lekettik qarjy mekemeleriniń qara­jatyn tartyp, jumys isteýge múdde­limiz. Bul tizimde Almaty oblysy birin­shi tur deýge bolady. Qarjy uıymy EýroOdaq keńesiniń sheshimine sáıkes Azııa elderindegi jobalardy qarjy­lan­dyrý boıynsha kredıttik operasııa­lar júrgizý mandatyna ıe, – degen edi Eýro­palyq ınvestısııa bankiniń mem­le­kettik mekemelermen jumysyn damytý bóliminiń mamany Adam Brýýn.

Al kúni keshe Almaty oblysyna Dúnıejúzilik bank ókilderi kelip, óńirdegi ınvestısııalyq joba­larǵa qoldaý tanytýǵa nıetti ekenin jarııa etti. Oblystyń áleýetin baǵam­dap, negizgi ınvestısııalyq joba­larǵa qol­daý kórsetýdi kózdegen Dúnıe­júzi­lik banktiń portfeline 11 joba kiredi. Qarjy uıymy jalpy 4,37 mlrd dollar kóleminde nesıeleýge qaýqarly. Dúnıejúzilik bank óńirlerdi damytý­ǵa baǵyttal­ǵan ın­vestısııalyq joba­lardyń júzege asýyna yqpal etýde tájirıbesi mol. Máselen, kórshi Qyr­ǵyzstan mem­le­keti­men qatar, Grýzııa, Albanııa jerin­de de jumys jasap jatyr. Qazaq­stan onyń ishinde, Almaty oblysyna at basyn burýdaǵy kózdegen nysanasy óńirdegi adam basyna shaq­qandaǵy ekonomıkalyq damý deńgeıin anyqtaý, aımaqtyń áleýetin qarastyrý hám ınfraqurylym men memlekettik qyzmetke qatysty jobany biriktirý arqyly oblystyń ekonomıkalyq básekege qabiletin arttyrýǵa baǵyttalǵan jumystardy iske asyrý bolyp otyr. 

– Qarjy uıymynyń negizgi kóz­degen múddesi – Qazaqstannyń aımaq­tyq áleýeti men ondaǵy másele­ler týraly aqparattardy jınaqtaý. Jańadan qurylǵan 3 oblys pen tórt jańa oblys ortalyǵynyń ekono­mıkalyq draıverin anyqtaı oty­ryp, jumysty jalǵastyrý. Al­daǵy ýaqyt­ta oblystardan jınaq­taǵan málimet­ter men óz zertteý­leri­mizdi biriktire kele, jańa joba usynamyz degen oıdamyz, – deıdi Dúnıejúzilik banktiń qalalyq damý jáne tabıǵı apattar táýekelderin basqarý jónindegi aǵa mamany, jobalaý komandasynyń basshysy Hýang Chı-Iýn.

Bank ókilderimen kezdesýde aı­maq­ta­ǵy ınvestısııalyq tartymdy­­lyq týraly sóz órbitken oblys ákimi Marat Sultanǵazıev óńirdiń 2020-2025 jyldarǵa arnalǵan jáne 2030 jylǵa deıingi strategııalyq damý baǵdarlamasy bekitilgenin alǵa tartty. Ol aımaqta 4 qala baryn tilge tıek etti. Sonyń biri – oblys ortalyǵy Qonaev qalasy bolsa, ekin­shisi – Almaty shaharyna jaqyn turǵan – Qaskeleń. Bul aımaqtarda ınfraqurylymnyń tozyǵy jetkenin aımaq basshysy búkpesiz baıandady. Iаǵnı bolashaqta osy baǵyttaǵy jańǵyrtý jumystaryna Dúnıejúzilik banktiń qarjy salýynan úmittenemiz.

– Biz jańa oblys ortalyǵynda otyrǵanymyzben, Almaty oblysy burynnan bar. Oblysta aýyl sharýashylyǵyn jetildirýge basym­dyq berilgen. Áýelde sý máse­lesiniń kúrmeýin tarqatsaq, artyn­sha aýyl­dyq jerlerdiń jaǵdaıyn jaqsartý­ǵa múmkindik jeterlik. Oblystaǵy halyqtyń 83 paıyzy aýyldyq jerde turady, sol sebepti aýyl sharýa­shy­lyǵyn damytý mańyzdy. Ol úshin eń aldymen sýarmaly jerlerdi keńeı­týge den qoıǵan abzal. Aımaq mal sharýashylyǵynda respýblıkada úshinshi orynda, al qus sharýashylyǵy boıynsha birinshi orynda keledi. Bul baǵytty ári qaraı jetildirýge múmkindik mol. Negizgi másele óndiristi eksportka shyǵarýmen astasyp jatyr, – deıdi oblys ákimi.

 

Almaty oblysy 

Sońǵy jańalyqtar

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar