EUÝ óziniń sıfrlyq servısterin endirýge basymdyq beredi. Sońǵy eki jylda ýnıversıtettiń IT mamandary 15 ónim ázirledi. Barlyq tehnologııalyq sheshimderdi JOO stýdentteri men qyzmetkerleri sátti qoldanyp keledi.
Sıfrlyq qyzmetter kúndelikti jumys úrdisin ońtaılandyryp, eńbek ónimdiligi men oqý prosesin uıymdastyrýdyń tıimdiligin arttyrdy. Máselen, qaǵazsyz qujat aınalymy júıesi jylyna 20 mln teńgeni únemdeýge jol ashty. Elektrondyq servıs 1 mıllıonnan astam baspa betin saqtaýǵa, kartrıdjder shyǵynyn, prınterlerdiń tozýyn jáne sıllabýstar men oqý-ádistemelik keshenderge jyl saıyn qaǵaz júzinde qol qoıýǵa ketetin qyzmetkerlerdiń eńbek shyǵyndaryn azaıtty.
«EUÝ-da 2021-2025 jyldarǵa arnalǵan sıfrlyq ekojúıe tujyrymdamasy iske asyrylý ústinde. Osy baǵdarlama aıasynda biz túlekterdi jumysqa ornalastyrý platformasyn, bilim alýshylarǵa oqý prosesi týraly qajetti aqparat jarııalanatyn Smart. ENU mobıldi qosymshasyn, qaǵazsyz qujat aınalymy júıesin, talapkerlerge arnalǵan elektrondyq kezek termınalyn, jappaı bilim berý kýrstary bar onlaın-oqytý platformasyn qurastyrdyq. Bizdiń barlyq IT-ónimderimiz jumys prosesterin jeńildetti, stýdentter men oqytýshylar úshin qolaıly jaǵdaılar jasaýǵa múmkindik berdi. Qazir JOO-da qyzmetkerlerdiń sıfrlyq quzyrettilikterin damytý, stýdentterdiń sıfrlyq beıinderin ázirleý jumystary qolǵa alyndy. Bul - sıfrlyq ýnıversıtetti damytýǵa jasalǵan júıeli qadam», dep atap ótti EUÝ Sıfrlyq damý jáne qashyqtyqtan oqytý departamentiniń dırektory Gúlmıra Bekmanova.
EUÝ-dyń taǵy bir biregeı sıfrlyq júıesi - «Ǵylymı-zertteý ınstıtýttarynyń josparlary men esepteri». Ol jumys josparlaryn, ǵylymı-zertteý ınstıtýttarynyń toqsandyq esepterin bekitýge, ǵylymı-zertteý ınstıtýttarynyń qyzmetine baılanysty málimetterdi jan-jaqty taldaýǵa jáne tapsyrmalardyń oryndalýyn onlaın tártipte baqylaýǵa múmkindik beredi.
Dıssertasııalyq keńesterdiń onlaın daýys berý júıesi krıptografııalyq algorıtmder negizinde jasyryn daýys berýdi ótkizýge arnalǵan jáne ýnıversıtet doktoranttarynyń dıssertasııalaryn qorǵaýda qoldanylady. Ol daýys berýdiń anonımdiligin, rásimniń ashyqtyǵyn jáne esep berýdi avtomattandyrýdy qamtamasyz etedi.
Sonymen birge ýnıversıtet óziniń platformasy negizinde onlaın-bilim berýdi belsendi túrde damytýda jáne sertıfıkattaý júıesin ázirleýdi qolǵa aldy. Búgingi tańda bilim berý resýrsyna 132 pán boıynsha 2000 dáris júktelgen. Eki jyl ishinde 40 myńǵa jýyq adam beınematerıaldardy tyńdady.
