Taldyqorǵandyq ekoerikti Ǵazız Amanjoluly oblys ortalyǵyndaǵy ǵana emes, óńirdegi ıgi isterdiń, qaıyrymdy qadamdardyń, mádenı sharalardyń bel ortasynan kórinip, únemi belsendiligimen erekshelenip júredi. Jáne ondaı isterin jarnamalaýǵa da qushtar emes. Sodan da bolar Ǵazızdiń óz úıinen shyǵatyn turmystyq qaldyqtardy suryptap, bólektep jınap, qaǵaz, sellofan, plastık, metall syndy qaıta óńdeýge keletinderin arnaıy mekemelerge ótkizip kele jatqanyna 2 jyl bolǵanyn jurt endi bilip jatyr.
Ekoeriktiniń aıtýynsha, suryptalǵan qoqystan sońǵy iriktelgen shıkizatty qabyldap alýshy kompanııalarǵa ótkizip, túsken qarjyny qaıyrymdylyq qorlaryna aýdarady. Olardyń arasynda talaı janǵa úı tartý etken «Hareket» qory da bar.
«Meniń bul bastamam bir oqpen birneshe qoıandy atqandaı paıdaly. Úıden shyqqan qaǵaz, metall, plastık, sellofan sııaqty qaıta óńdeýge jaraıtyn qaldyqtardy suryptap, bóshkeler tolǵan kezde arnaıy mekemelerden qabyldaýshylarǵa habarlasamyn. Olar kelip, jınalǵan qaldyqtardy ólshep, menen satyp alady. Al túsken qarjyny birden qaıyrymdylyq qorlaryna jiberemin. Ár kelgende ortasha eseppen 2000-3000 teńgege qaldyq ótkizemin. Ákem jolaýshy tasymaldaıtyndyqtan, kúndelikti kóliginde jolaýshylardan qalǵan 5-6 plastık bótelkeni ákelip beredi. Sondyqtan plastıkke arnalǵan bóshke tez tolady. Sonymen qatar densaýlyqqa qaýipti sanalatyn jaryq bergish shamdar men batareıalardy da bólek suryptap, arnaıy konteınerlerge tastaımyn. Qaǵazdar bir bólek, sellofandar bir bólek degendeı. Osy isim arqyly ekologııaǵa da óz úlesimdi qosamyn, qaıyrymdylyqty da nazarymda ustaımyn», degen Ǵazız barsha azamattardy osyndaı saýapty ári paıdaly iske shaqyrady.
Jalpy, barlyǵymyz biletindeı, tabıǵattyń qoqyspen lastanýy bizdiń eldegi ǵana emes, búkil álemdegi basty problemanyń birine aınalyp otyr. Dúnıe júzindegi memleketterdiń aýmaqtaryna, tipti aıdyn-shalqar teńizder men muhıttarǵa, asqar taýlar men ormandarǵa orny tolmas zardap tıgizýde. Janǵan qoqystardan ýly hımıkattar bólinip, aýany búldirip, jany barlardyń tirligine qaýip tóndire bastady.
О́kinishke qaraı sonyń bárin kúndelikti kórip, estip, oqyp júrgen adamdar qoqysty suryptaý mádenıetin damytý arqyly tabıǵatty qorǵap, qorshaǵan ortany saqtap qalatynymyzdy esten jıi shyǵaryp alady. Sondyqtan taldyqorǵandyq ekoeriktiniń qaıyrymdy ári qaıyrly qadamyn búkil el bolyp quptaǵan jón. «Taza bolsa tabıǵat – aman bolsa adamzat» degendi jadyda ustap, qorshaǵan ortany qorǵaıyq!
Jetisý oblysy
