Fýtbol. Álem chempıonaty: Meksıka – Kamerýn 1:0

ASTANA. 14 maýsym. Chempıonattyń Natal qalasynda ótken ekinshi kezdesýinde Meksıka jáne Kamerýn quramalary ushyrasyp, bulardyń aldyńǵylary 1:0 esebimen jeńiske jetti. Bul týraly egemen.kz habarlady. Brazılııa mýndıalyndaǵy tóreshiler jurtty tań qaldyrýlaryn jalǵastyryp jatyr. Keshegi birinshi betashar oıynda ǵana japon referıi Iýıtı Nısımýra brazılııalyqtar paıdasyna horvattar qaqpasyna bolmaǵan penaltıdi belgilese, kelesi matchta kolýmbııalyq Vılmar Roldan úsh birdeı goldy sanamaı tastap, aıdy aspannan bir-aq shyǵardy. Ol munyń bárine «oıynnan tys qalý» degen úkimdi shyǵardy. Eger shynynda da Kamerýn fýtbolshylarynyń goly ofsaıdtan soǵylsa, Meksıka saıypqyrandary túsirgen eki gol da ta bolatyn. Degenmen, joǵarydan baqylap turǵan qudirettiń kúshi bar eken, astekter urpaqtary aqyrynda bir goldyń qarymtasyn qaıtaryp, sońǵy sátterde jeńisti qarsylastarynan tisterimen julyp áketti. Jeńimpazdardan bul kúni Djovanı Dos Santos pen Orıbe Peralta tandemi keremet óner kórsetti. Jeńis dobyn da osy jup saldy. Al aıqas barysynda jańbyrdyń quıyp turǵanyna qaramastan, olar úshin gol soǵatyn máýritter tolyp jatty. Bul matchtyń tartymdylyǵy men qyzyqtylyǵy tusaýkeser kezdesýden kem túsken joq. Álbette, táp-táýir órbip jatqan oıyndy álsin-álsin kolýmbııalyq tóreshiler buzýmen boldy. Munyń ústine, Kamerýn fýtbolshylary óte las, dóreki oınady. Biraq, soǵan qaramastan, tutastaı alǵanda, matchtyń ádemiligi men shıelenisi saqtalyp qaldy. Onyń qorytyndysy da qısynǵa saı keldi. Damır Qojamqul.