Fýtbol. Álem chempıonaty: Ispanııa – Gollandııa 1:5

ASTANA. 14 maýsym. Chempıonattyń Salvador qalasynda ótken Ispanııa men Gollandııa quramalary arasyndaǵy kezdesýinde birinshi sensasııa tirkeldi. Match 5:1 esebimen golland fýtbolshylarynyń pafdasyna sheshildi. Bul týraly egemen.kz habarlady. Kezdesýdiń birinshi taımy ıspandar úshin mundaı qaýiptiń bar ekenin baıqatqan joq. Qaıta álem chempıonynyń basymdylyǵyna eshkim kúmán keltire almady. Sondyqtan 27-mınýtta ıtalıan arbıtry gollandııalyqtar qaqpasyna kúmándi penaltı taǵaıyndaǵanda da, jurt bir jaǵy munyń ádildik sııaqty kórip otyrdy. Al Dıego Kostanyń óz erkimen qulap qalǵany úshin belgilengen 11 metrlik aıyp dobyn Habı Alonso dál uryp túsirdi. Ispandar budan keıin de oıyn tizginin qoldarynan shyǵara qoıǵan joq. Biraq arasynda qarsylastarynyń qarsy qaýyrt shabýyldaryn jiberip qoıyp jatty. Gollandııalyqtardyń bul joryqtary shynynda qaýyrt jasalyp turdy. Olar ózderiniń qorǵanys shepterinen qarsy qaqpa mańyna tez jetip júrdi. Mine, solardyń birinde, 44-mınýtta Robın van Persı ıspan qaqpashysy Iker Kasılıastyń alǵa shyǵyp ketkenin ádemi paıdalanyp, alystan tý syrtyna dop asyrdy. Sol dop jibek tordyń aýmaǵyna baryp kúmp etti – 1:1. Naǵyz alaman-tasyr oıyn ekinshi taımda bastaldy. Bul kezde birneshe tájirıbeli oıynshylarymen birge jas fýtbolshylardan quralǵan Gollandııa quramasyn tipti tanymaı qaldyq. Ol jańa qalyptasyp kele jatqan komandanyń emes, bolyp-tolǵan tolymdy toptyń tegeýrinin kórsetti sol kezde. Alaıda, aldymen 52-mınýtta Aren Robben óz ujymyn alǵa shyǵarǵanda da, jurt álem chempıondary úshin áli kóp nárse joǵala qoımaǵandaı, bul olqylyqtyń orny tez tola qalatyndaı kórip otyrǵan. Biraq 64-mınýtta Stefan de Vreı «Qyzǵaldaqtar eli» quramasyn ekinshi ret ilgeri órletkende (3:1), bir daýyldyń shynynda úıirilip kele jatqanyn júrek sezdi. Budan ári qarsy shabýyldyń qyzyǵyna túsip qana qoımaı, odan sát saıyn nátıje shyǵarýǵa beıimdele bergen gollandtar olań ústinde barynsha senimdi kórine bastady. Sonyń arqasynda dýblge qol jetkizgen Robın van Persı 72-shi, Aren Robben 80-shi mınýttarda Ispanııa quramasyn jermen-jeksen etýdi jaqyndata tústi. Osylaısha esep 5:1-ge jetti. Damır Qojamqul.  Derekkóz: Chempıonat.Rý. Foto: Chempıonat.Rý.