Jıynda respýblıkalyq qoǵamdyq birlestik tóraǵasy Tóleýbek Muqashev Memleket basshysynyń máslıhattar aldyna qoıǵan «Jańa Qazaqstannyń qurylysy», jergilikti halyqtyń ómir súrý jaǵdaıy men sapasyn jaqsartý jónindegi jańa mindettemeleri depýtattardyń saılaýshylarmen aradaǵy jumysyn qaıta qurý men saılaýshylar tártibi jáne máslıhatshylardy keri shaqyryp alý ınstıtýttaryn engizýdi iske asyratynyn atap ótti.
– Jańa jaǵdaıda máslıhattar men olardyń depýtattarynyń negizgi qyzmeti – óz aýmaǵynda sapaly áleýmettik ınfraqurylymdy: balabaqshalardy, abattandyrýdy, saýda nysandaryn, joldardy, kitaphanalardy, mektepterdi, turǵyn úıler men áleýmettik nysandardy jáne t.b.salý men jóndeýdi uıymdastyrýdan kórinbek. Mysaly, aldaǵy ýaqytta elimizde kóptegen áleýmettik ınfraqurylym nysandary saılaýshylardyń talaby men jergilikti memlekettik baǵdarlamalar negizinde qurylatyn bolady. Degenmen bul ózgeristerdiń barlyǵy máslıhatshylardyń belsendi azamattardy tarta otyryp turaqty monıtorıng pen baqylaý jasaý jaýapkershiligin arttyrady, – dedi T.Muqashev.
Sondaı-aq qoǵamdyq birlestik tórǵasy depýtattyń jumys jaǵdaıynyń jasalýy máselesine toqtaldy. Iаǵnı máslıhatshylardy úzdiksiz oqytý jáne depýtattar qyzmetiniń ózge de túrleri tujyrymdamasyn sapaly iske asyrý máslıhattar tarapynan birqatar uıymdastyrýshylyq shartty qamtamasyz etýdi qajet etedi. Depýtattyń qyzmetin quqyqtyq, uıymdastyrýshylyq jaǵynan, kásibıligin qamtamasyz etýge jekeleı toqtalǵan T.Muqashev: «Depýtattyń qyzmetin qarjylyq qamtamasyz etýdiń mazmuny mynada: bul depýtat qyzmetiniń (jumysynyń) qysqasha sıpattamasy kórsetilgen tizbesi, sondaı-aq bul máslıhattyń jumysy men ókilettikterin júzege asyrý úshin máslıhat depýtattary qyzmetiniń barlyq túrlerine qajetti aqshalaı shyǵyndardyń esebi bolyp tabylady. Mysaly, Germanııada bir jergilikti depýtattyń úzdiksiz oqýyn uıymdastyrýǵa jergilikti bıýdjetten jyl saıyn 12 myń eýroǵa deıin bólingen, Majarstan, Polsha, Chehııada shamamen 4,5 myń eýro bólindi, Ońtústik Koreıada – 13 myń AQSh dollaryna deıin, Reseıde 25 myń rýbl shamasynda bólingen», dedi. Sondaı-aq T.Muqashev depýtattardy byltyr Aqtóbede qabyldanǵan, jýyrda Shymkentte alqalanǵan Úndeýdi qoldaýǵa shaqyrdy.
Al oblys ákimi apparatynyń basshysy Erkeǵalı Álimqulov saılaýaldy baǵdarlamanyń ekinshi qaǵıdaty – ádiletti ekonomıka qurý el ekonomıkasynyń damý modelin túbegeıli ózgertý arqyly halyqtyń, bıznestiń jáne memlekettiń múddesin birdeı qorǵaýǵa negizdeletinin aıta kele óńirde atqarylyp jatqan jumystarǵa keńinen toqtaldy. Mysaly, tikeleı sheteldik ınvestısııalardy tartý boıynsha óńirde ótken jyldyń III toqsanynyń qorytyndysy boıynsha sheteldik ınvestısııalar kólemi 331,1 mln AQSh dollaryn qurap, jospar tolyǵymen oryndalǵan. О́tken jyldyń qorytyndysymen 831 eldi mekenniń 719-y nemese 87,0%-y aýyz sýmen qamtamasyz etildi. Sondaı-aq turǵyn úı, bilim, densaýlyq salalarynda atqarylǵan jumystarǵa toqtalǵan apparat basshysy oblysta saılaýaldy baǵdarlamada kórsetilgen mejeler josparǵa saı iske asyrylýda ekenin málimdedi. Oblystyq máslıhattyń agrarlyq sala, jer qatynastary jáne tabıǵatty paıdalaný máseleleri jónindegi turaqty komıssııa tóraǵasy Nuraly Ábishov baıandamasynda elimizdegi sýarmaly jerlerdiń 4-ten 1 bóligi Túrkistan oblysyna tıesili ekenin atap ótti.
– Aýyl sharýashylyǵy jalpy óniminiń 12 paıyzy oblysqa tıesili, onyń ónim kólemi 996,3 mlrd teńgeni quraıdy. Aýyl sharýashylyǵynyń negizgi kapıtalyna 59,8 mlrd teńge, tamaq óndirisiniń negizgi kapıtalyna 7,2 mlrd teńge ınvestısııalar tartyldy. Aýyl sharýashylyǵy daqyldarynyń egis alqaptary 859,9 myń gektarǵa ornalastyryldy, ótken jyldan 14,4 myń gektarǵa artty. Jańadan 101 gektarǵa jylyjaılar salynyp, jalpy kólemi 1 569 gektarǵa jetti. Bul respýblıkalyq kórsetkishtiń 71 paıyzyn quraıdy, – dedi N.Ábishov.
Jıyn sońynda T.Muqashev qoǵamdyq birlestik atynan belsendi depýtattyq qyzmeti jáne oblystyń áleýmettik-ekonomıkalyq damýyna qosqan eleýli úlesi úshin birqatar oblystyq máslıhat depýtatyn «Qurmetti depýtat» tós belgisimen jáne Gramotamen marapattady.
Túrkistan oblysy
