Fýtbol. Álem chempıonaty: Anglııa – Italııa 1:2

ASTANA. 15 maýsym. Búgin tań aldynda Manaýs qalasynda chempıonattyń D tobyndaǵy Anglııa jáne Italııa quramalary ózara ushyrasty. Tartysty ótken oıyn 2:1 esebimen ıtalıandardyń paıdasyna sheshildi. Bul týraly egemen.kz habarlady. Kúsh-qýattary shamalas komandalardyń arasynda tájirıbesi kópteýi jáne sheberligi birshama óoǵarysy basym tústi. Bylaıynsha, aǵylshyndar da qarsy qaqpa aldyndaǵy qaýipti sátterdi az jasaǵan joq. Biraq sheshýshi sátte olar osy múmkindikterdi aǵyndy sýdaı shashyratyp aldy. Al onsyz da alǵa shyqqan ıtalıandardyń «fýtbol otanynan» kelgenderdi tas-talqan etip jeńip shyǵýǵa tolyq múmkindikteri boldy. Basqasyn aıtpaǵanda, olardyń soqqylaryn eki ret Djo Harts qorǵaǵan qaqpanyń baǵany qaıtardy. Kezdesýdi aǵylshyndar ekpindi bastady. Alaıda, ýaqyt uzaǵan saıyn ıtalıandardyń ústemdigi arta túsip, aqyrynda olar oıyn tizginin túgel qoldaryna alyp qoıdy. Sol ekpinderimen Apennın túbeginiń jigitteri buryshtamadan gol soǵyp ketti. Ony 35-mınýtta Klaýdıo Markızıo saldy. Áıtkenmen, Italııanyń bul basymdylyǵy eki mınýttan artyqqa barǵan joq. Aǵylshyndar Ýıenı Rýnı men Danıel Starrıdjdiń qatysýymen jasalǵan kombınasııanyń aqyrynda esepti teńestirip te úlgerdi. Al taımnyń sońynda Marıo Balotellı men Antonıo Kandreva eki múmkindikti bosqa jiberip aldy. Bul tandem osy qatelikterin ekinshi taımnyń basynda birlesip qaıtardy. Atap aıtqanda, Kandrevanyń jetkizgen pasyn Balotellı golǵa aınaldyra bildi. Italııa quramasynyń oıynshylary budan keıin de esepti ulǵaıtýdyń birneshe qolaıly sátin ońtaıly paıdalana almady. Dál fınaldyq ysqyryq estiler aldynda Andrea Pırlo 30 metr jerden aıyp dobyn uryp, dopty mańdaıshanyń astyna qaraı zaýlatty. Ony aǵylshyndar qaqpaǵa kirip bara jatqan jerinen qaıtardy. Damır Qojamqul. Derekkóz: Chempıonat.Rý. Foto: Sportbox.ru.