Álıhan Smaıylov Shymkentti jylýmen jabdyqtaýdaǵy kemshilikterdi atady

Qala ákimi Murat Áıtenov, ındýstrııa jáne ınfraqurylymdyq damý mınıstri Marat Qarabaev, oqý-aǵartý birinshi vıse-mınıstri Sholpan Karınova, sondaı-aq ulttyq ekonomıka vıse-mınıstri Baýyrjan Omarbekov, energetıka vıse-mınıstri Áset Maǵaýov jáne densaýlyq saqtaý vıse-mınıstri Jandos Búrkitbaev túrli salalardaǵy kórsetkishter men qabyldanyp jatqan sharalar týraly baıandady.

Baıandamashylardy tyńdaǵan Premer-mınıstr Úkimet Memleket basshysynyń Saılaýaldy baǵdarlamasynda usynylǵan keń aýqymdy reformalardy iske asyrýǵa kiriskenin atap ótti.

«Onda halyqtyń turmys sapasy men ál-aýqatyn arttyrýǵa erekshe mańyz berilip otyr. Osy mindetterge qol jetkizý úshin egjeı-tegjeıli is-qımyl jospary ázirlenip, bekitildi», dedi Álıhan Smaıylov.

Onyń aıtýynsha, qala ákimdigi ınjenerlik ınfraqurylymdy, atap aıtqanda jylý, elektr, gaz, sýmen jabdyqtaý jelilerin jáne t. b. jańǵyrtýǵa basymdyq berýi kerek.

«Shymkent eldiń ońtústiginde ornalasqannan keıin, munda qaqaǵan aıaz sırek bolady. Sonyń ózinde, qala turǵyndarynyń shaǵymdary azaımaı otyr. Mysaly, «Jańa Talap», «Turan» shaǵyn aýdandaryndaǵy kópqabatty úıler jylýsyz qalǵan. Buǵan jol berýge bolmaıdy», dedi Premer-mınıstr.

Úkimet basshysy qaladaǵy qurylys qarqynyna oń baǵa berdi. Atap aıtqanda, sońǵy eki jylda 2 mln sharshy metrden astam turǵyn úı paıdalanýǵa berildi. Sonymen qatar Úkimet basshysy osy oraıda megapolıste kólik jelisine júkteme artyp kele jatqanyn, bul júrgizilip jatqan jóndeý jumystarynyń sapasyn, sondaı-aq áleýmettik ınfraqurylymdy edáýir jaqsartýdy talap etetinin, osyǵan baılanysty jańa mektepter, aýrýhanalar men basqa da áleýmettik nysandardy ýaqytyly ashý qajettigin aıtty.

«Aldaǵy úsh jylda qalada 68 myń oqýshyǵa arnalǵan 54 mektep salý josparlanyp otyr. Bul Shymkenttegi úsh aýysymdy oqytý máselesin sheshýge septigin tıgizedi», dedi Álıhan Smaıylov. 

Premer-mınıstr ekonomıkalyq bloktyń máselelerine toqtala kele, ákimdikke ekonomıkany ártaraptandyrý jáne ımportty almastyrý boıynsha josparly jumysty jalǵastyrý qajettigin atap ótti. Bul jaǵdaıda negizinen óńdeý sektoryna nazar aýdarý kerek. Osyǵan baılanysty Úkimet basshysy tıimdilikti arttyrýdyń jáne qoldanystaǵy ındýstrııalyq aımaqtardy keńeıtýdiń, sondaı-aq jańa óndiris alańdaryn ashýdyń mańyzdylyǵyn atap ótti.

«Jalpy qalanyń 2022-2026 jyldarǵa arnalǵan ınvestısııalyq portfeli quny 2 trln teńge bolatyn 283 jobany qamtıdy. Qala ákimdigi iske asyrylyp jatqan jobalardyń merziminde iske qosylýyn, sondaı-aq josparlanǵan jobalardy pysyqtaýdy qamtamasyz etýi qajet», dedi Úkimet basshysy. 

Sonymen qatar Álıhan Smaıylov áleýmettik mańyzy bar azyq-túlik taýarlary baǵasynyń ósýin tejeý boıynsha júıeli jumysty jalǵastyrý qajettigin aıtty. Bul – sonyń ishinde naryqtyń qoljetimdi tetikterin qoldanýǵa, deldaldyq tizbekterdi anyqtaý jónindegi óńirlik komıssııanyń jumysyna jáne agrarlyq sektordy damytýǵa qatysty da másele.

Otyrysty qorytyndylaı kele, Premer-mınıstr «Saıram» turǵyn alabyn sýmen qamtamasyz etý, «Turan» shaǵyn aýdanynda magıstraldyq káriz kollektory men oqýshylar saraıyn salý, jalpy Shymkentte jol ınfraqurylymyn salýdy qarjylandyrý kólemin ulǵaıtý máselelerin pysyqtaýdy tapsyrdy.

Sonymen qatar Álıhan Smaıylov jylý jelilerin, sorǵy stansııalaryn qaıta jańartý, qazandyqtardy jańǵyrtý jáne «Qaınarbulaq» turǵyn alabyn gazben jabdyqtaý qajettigin atap ótti.