Keshegi kúnniń keshine deıin Brazılııada maýsymnyń 12-si kúni bastalǵan álem chempıonatynda 11 oıyn oınalyp qoıdy. Bir qyzyǵy, tolassyz tartyspen órnektelgen osy kezdesýlerdiń birde-birinde teń nátıje tirkelgen joq. Munyń ózi bul jolǵy jahandyq jarystyń esh ymyrasyz ótip jatqanyn, alań tórinde oıqastaǵan oıynshylardyń eshbiriniń mámilege kelýge yqylasty emes ekendikterin kórsetip otyr. Endi biz maýsymnyń 14-16-sy kúnderi oınalǵan oıyndarǵa qysqasha sholý jasap óteıik.
Ázirge álem dop dodasynyń barlyq matchtary qyzyqty da este qalatyndaı bolyp ótip jatyr. Budan biz munyń aldyndaǵy habarda oınalatynyn aıtyp ótken Chılı men Avstralııa arasyndaǵy kezdesý de shet qalǵan joq. Buǵan qosa, osynyń aldyndaǵy matchtardyń bárinde kórinis kórsetken tóreshilerdiń júgensizdigi munda baıqala qoımady. Sondyqtan Kot-d`Ivýar eliniń Nýmandez Dýe bastaǵan qazylarynyń osy ónegeli isteri keıingilerge juǵysty bolatyn shyǵar degen úmittemiz. Al ádildik saltanat qurǵan kezdesý 3:1 degen nátıje ákeldi. Álbette, onda kúshi de, tájirıbesi de basym chılılikter jeńiske jetti. Áıtkenmen, «la roha» aral-kontınent jasaǵyn eshbir qıyndyqsyz utyp shyqty dep taǵy aıta almasaq kerek.
Kezdesýdiń basynda Horhe Sampaolıdiń shákirtteri qarsylastaryn taptap óte shyǵatyndaı bolyp kóringen. Olar osy basymdylyqtaryn eki mınýttyń ishinde eki golǵa aınaldyryp, birden alǵa ketken. Goldardy 12-mınýtta Aleksıs Sanches jáne 14-mınýtta Horhe Valdıvııa saldy. Ras, avstralııalyqtar birinshi taımda-aq munyń bir dobynyń qarymtasyn qaıtaryp úlgergen (Tım Kehıll, 35-mınýt). Biraq olardyń qarqyny sonymen bitti. Al ekinshi taımda osy esep oıyn sońyna deıin ózgermegen kúıi turdy. Munyń áletinde Avstralııa fýtbolshylary shabýyldy údetti. Eger olardyń Tım Kehıll men Mark Breshıano sekildi forvardtarynyń sońǵy soqqylary durys shyqqanda, oıynnyń qalaı aıaqtalaryn kim bilsin! Degenmen, chılılikter osy esepti ustap qaldy. Buǵan qosa, qosymsha ekinshi mınýtta olar taǵy bir gol soǵyp (Jan Bosejýr) jeńistiń júgin jeńildete tústi.
Munyń sońyn ala dýmany qyzǵan Kolýmbııa – Grekııa arasyndaǵy oıynda bulardyń aldyńǵylary aıtarlyqtaı alymdylyq tanytty. Olar chempıonattyń fınaldyq bóligine irikteý jarysynda óz tobynda Argentınadan keıingi ekinshi oryn alǵandarynyń beker emes ekenin kórsetti.
Kolýmbııalyqtar bul oıynda esepti 6-mınýtta ashty. Ony Pablo Armero degen qorǵaýshy túsirdi. Kelesi taımda Teofılo Gýterres (58) esepti 2:0-ge jetkizdi. Al oıynǵa qosylǵan úshinshi mınýtta Hames Rodrıges sońǵy núkteni qoıdy.
Sodan keıin Ýrýgvaı men Kosta-Rıka quramalary kezdesýinde chempıonattaǵy ekinshi sensasııa ómirge keldi. Onda kostarıkalyqtar 3:1 esebimen jeńiske jetti. Biraq oıynnyń bas jaǵy mundaı nátıje ákeletinge uqsamady. Alańda barynsha baıaý da tepe-teń kúres júrip jatty. Ýrýgvaılyqtar aıryqsha basymdylyq ta tanyta qoıǵan joq. Al Kosta-Rıka meılinshe qatqyl oınady. Onyń qorǵaýshylary qarsy jaqtyń shabýylshylaryn óz shepterine qaraı kóp asa asyrmady. Sondyqtan qarsy jaq olardy sheberlikteri deńgeıimen alýǵa umtyldy. Osy sheberlik aqyrynda birinshi golǵa da apardy. Ýrýgvaı shabýylshylary kezekti buryshtama soǵý quqyǵyna qol jetkizdi. Al dop aıyp alańyna tastalǵanda, qarsylastar qorǵaýshylary tártip buzdy. Mine, osyǵan oraı belgilengen penaltıdi Edıson Kavanı 24-mınýtta dál túsirdi. Osymen birinshi taımnyń nátıjesi de ózgermedi.
Kosta-Rıka jigitteriniń úıirip soqqan daýyldary ekinshi taımda turdy. Onyń basyn shabýylshy Joel Kempbell bastap berdi. Keıin kezdesý sońynda úzdik oıynshy ataǵyna ıe bolatyn osy forvard budan keıin de jasyndaı jarqyldady. Sońǵy gol da onyń tikeleı aralasýymen soǵyldy. Degenmen, osy arada taǵy bir gol salynǵan edi. Aldymen 54-mınýtta esep teńestirilse, arada 3 mınýt ótkende, Oskar Dýarte kútpegen jerden Kosta-Rıkany alǵa shyǵardy. Ol aıyp alańynda qulap bara jatyp, dopty qaqpaǵa qaraı baǵyttap úlgerdi. Al úshinshi goldy Markos Ýrenıa 84-mınýtta Kempbelldiń jeke-dara alǵa shyǵarýy arqyly túsirdi. Budan keıin Ýrýgvaı fýtbolshylary qarsylasýlaryn qoıdy. Yzadan jarylardaı bolǵan olar tártip buzýshylyqty da jıiletti. Sonyń biri Maksı Pereıranyń Joeldiń aıaǵyn qyrqa tebýine aparyp soqtyrdy. Osy qasaqana jasaǵan áreketi úshin ýrýgvaılyq fýtbolshy alańnan qýyldy.
Maýsymnyń 15-indegi oıyndardy Anglııa jáne Italııa quramalary bastady. Tartysty ótken oıyn 2:1 esebimen ıtalıandardyń paıdasyna sheshildi. Kezdesýdi aǵylshyndar ekpindi bastady. Alaıda, ýaqyt uzaǵan saıyn ıtalıandardyń ústemdigi arta túsip, aqyrynda olar oıyn tizginin túgel qoldaryna alyp qoıdy. Sol ekpinderimen Apennın túbeginiń jigitteri buryshtamadan gol soǵyp ketti. Ony 35-mınýtta Klaýdıo Markızıo saldy. Áıtkenmen, Italııanyń bul basymdylyǵy eki mınýttan artyqqa barǵan joq. Aǵylshyndar Ýeın Rýnı men Danıel Starrıdjdiń qatysýymen jasalǵan kombınasııanyń aqyrynda esepti teńestirip te úlgerdi. Al taımnyń sońynda Marıo Balotellı men Antonıo Kandreva eki múmkindikti bosqa jiberip aldy.
Bul tandem osy qatelikterin ekinshi taımnyń basynda birlesip qaıtardy. Atap aıtqanda, Kandrevanyń jetkizgen pasyn Balotellı golǵa aınaldyra bildi.
Resıfı qalasyndaǵy stadıonda shaıqasqan Kot-d`Ivýar jáne Japonııa quramalary arasyndaǵy oıyn shıelenisi moldyǵymen este qaldy. Degenmen, bul matchty bir-birine uqsamaıtyn eki bólikke bólip qarastyrýǵa bolady. Onyń alǵashqy bir saǵattyq kóleminde «samýraılar» qarsylastarynan áldeqaıda áleýetti kórindi. Olar 16-mınýtta Keısýke Hondanyń kómegimen alǵashqy bolyp esepti de ashty. Osydan keıin de Alberto Dzakkeronıdiń shákirtteri oıyn tizginin ýystarynan shyǵara qoımady. «Qara qurlyqtyń» ókilderi osy tusta dopqa kóbirek egelik etkenderimen, qaqpaǵa qaraı soqqy jasaýda azııalyqtardan kóp qalyp qoıdy. Alaıda, sońǵy jarty saǵattyń ishinde bári túbegeıli ózgerip ketti. Ol Sabrı Lıamýshıdiń 62-mınýtta shaıqasqa Dıde Drogbany qosyp jiberýinen bastaldy. Onyń kelýimen «pilder» kúrt ózgerip sala berdi. Sonyń arqasynda olar bar-joǵy eki mınýttyń ishinde esepti teńestirip qana qoımaı, alǵa da shyǵýǵa múmkindik aldy. Aldymen 64-mınýtta Vılfrıd Bonı birinshi jaýap dopty soqsa, artynsha Jervıno pil súıegi jaǵalaýy eliniń quramasyn jeńiske bastady.
Kelesi kezekte Shveısarııa Ekvadordy 2:1 etip tize búktirdi. Bulardyń sońynan Fransııa Gondýrasty 3:0 etip oısyrata utty. Onda Karım Benzema birin penaltıden, birin oıynnan soǵyp, dýbl jasady. Al 16 maýsym kúngi Argentına – Bosnııa kezdesýinde bulardyń aldyńǵylary 2:1 esebimen basym tústi.
Bet qattalyp jatqanda Germanııa komandasy Portýgalııa quramasyn 4:0 esebimen utyp ketkeni belgili boldy. Osy matchta chempıonattaǵy eń alǵashqy het-trık ómirge keldi. Ony 11-mınýtta penaltıden, 45 jáne 78-mınýttarda oıynnan gol soqqan Tomas Mıýller jasady. Tórtinshi dopty 32-shi mınýtta Mats Hýmmels túsirdi.
P.S. Oqyrman qaýym «Egemen Qazaqstannyń» Brazılııadaǵy álem birinshiliginen berip jatqan materıaldarynyń arasynan bizdiń elimizde ýaqyt tańǵy saǵat 4-ke jaqyndaǵanda aıaqtalatyn oıyndardan da reportajdar jarııalanǵanyna nazar aýdarǵany anyq. Olarda sol matchtardyń gol soǵý sátterin kórsetetin fotolar da qosa berilip júrdi. Bul úshin tańǵy saǵat 5-ke deıin gazetke materıal jazý, gazetti qaıta betteý qajet etiletinin bizdiń áriptesterimiz jaqsy biledi. Alaıda, gazet basyp shyǵarý da óndiristik prosess ekenin, baspahanalarǵa jiberiletin better oblys ortalyqtaryna joldanyp, basylyp shyǵyp, «Qazposhta» mekemelerine ýaqtyly jetkizilýi kerektigin, áıtpese gazet jazylýshylar qolyna keshigip túsetinin eskermeı taǵy tura almaımyz. Sondyqtan, fýtbol súıer qaýymnyń Brazılııadaǵy dúnıeniń dop dodasynan jazylatyn shuǵyl reportajdardy endi gazet saıtynan (egemen.kz) oqyp otyrýyna týra keletinin aıtamyz.
Saıtty ashyńyzdar, reportajdarǵa ún qosyńyzdar, oıyndardyń nátıjesi týraly boljamdaryńyzdy aıtyńyzdar, chempıonat týraly pikir bildirińizder!
Serik PIRNAZAR,
«Egemen Qazaqstan».
