«Taǵdyrymdaǵy tulǵa»

EL JÁNE ELBASY

Erim deıtin el bolmasa, elim deıtin er qaıdan shyqsyn?! Mine, elimiz táýelsizdigin jarııalaǵaly bergi ýaqytta týǵan Otanymdy qaıtsem ósirip-órkendetemin, halyqtyń ál-aýqatyn qaıtsem jaqsartamyn, týǵan elimdi qaıtsem órkenıet kóshine ilestiremin, qaıtsem halyqaralyq qoǵamdastyqtyń beldi de bedeldi músheleriniń birine aınaldyramyn dep attan túspeı júrgen Elbasy Nursultan Nazarbaevtyń osy baǵyttardaǵy atqarǵan, atqaryp kele jatqan jumystary qaı jaǵynan alyp qarasańyz da rıza peıil bildirýge ábden laıyq. Aıqarma bette jarııalanyp otyrǵan shaǵyn-shaǵyn júrekjardy maqalalarda elimizdiń túkpir-túkpirinde turatyn otandastarymyzdyń – túrli mamandyq ıeleriniń jazǵandary Elbasyna degen rızashylyqqa toly móltek syr retinde kórinis tapqan. Bul elim deıtin erine laıyqty jaýap beretin eli bar ekeniniń aıqyn aıǵaǵy bolsa kerek. Nursultan ÁBILDAEV, Qyzylorda oblysy ákimi apparatynyń jetekshi mamany: 1986 jyldyń tamyz aıy eken. Sol kezdegi Qazaq KSR Mınıstrler Keńsesiniń Tóraǵasy Nursultan Nazarbaev Syr boıyna arnaıy saparmen kelipti. Sosıalıstik Eńbek Eri, meniń ájem Baldyrǵan Mustafaevanyń kúrish alqabyn aralaıdy. Dál sol sátte men dúnıe esigin ashyppyn. Elbasymen kúrish alqabyn aralap kele jatqan ájem Nursultan Ábishulyna nemereli bolǵanyn, oǵan sol kisiniń atyn bergisi keletinin aıtyp, ruqsat suraıdy. Solaısha, meniń atym Nursultan qoıylady. Arada bes jyl ótkende Elbasy Qyzylorda oblysyna taǵy da saparlatyp keldi. Ájemniń etegine oralyp men de aldarynan shyqtym. Bala bolsam da, bári esimde qalypty. Elbasy maǵan oıynshyq ushaq syılady. Sol kezdegi qýanyshymdy kórseńiz. Ushaqpen birge aspanda ushyp júrgendeı kúı keshtim. Ýaqyt óte berdi. Men 9-synypta oqyp júrgen edim. «Nursultan Ábishuly Qyzylordaǵa keledi. Menimen birge barasyń», dedi ájem. Osy kezdesýde Elbasynyń shyn qamqorlyǵyn kórdim. Ájem men týraly aıtyp jatqan. Prezıdent barlyǵy esinde ekenin, umytpaǵanyn aıtyp, maǵan óziniń qoly qoıylǵan saǵat syılady. Sosyn «Qaıda oqyǵyń keledi?» dep surady. Men «Astanada, L.N.Gýmılev atyndaǵy Eýrazııa ulttyq ýnıversıtetinde», dep jaýap berdim. Oqý bitirgesin habar berýdi tapsyrdy. Sóıtip júrip, mektepti de bitirdim. Astanaǵa oqýǵa baramyn dep otyrǵanda, ájem bul sheshimimdi qoldamaı qoıdy. «Elbasyn maıda-shúıde máselemen mazalaı berme. Eldiń júgin arqalap júrgen azamattyń basqa sharýasy da jetedi». Kesimdi sózi osy boldy. Qaıta baǵym bar eken, Qorqyt ata atyndaǵy Qyzylorda memlekettik ýnıversıtetine oqýǵa tústim. Ony da abyroımen bitirip shyqtym. Biraq zańger degen mamandyq alyp shyqqanymmen, jumys taba almaı tórt jyl sandalyp júrdim. Talaı sharýanyń basyn shaldym. Qurylysqa da jegilgen kúnder boldy. Sodan bir kúni Elbasynyń atyna hat jazdym. Osyǵan deıingi oqıǵanyń barlyǵyn tilim jetkenshe baıan ettim. Arada bir apta ótkende oblys ákiminiń kómekshisi habarlasty. Meniń hatym Elbasynyń qolyna tıipti. Aımaq basshysyna Astanadan tapsyrma berilipti. Solaısha, oblys ákiminiń apparatyna qyzmetke alyndym. Mine, osydan-aq meniń ómirimde Elbasynyń orny erekshe ekenin bilýge bolady. Dúnıe esigin ashqannan bastap, búginge deıin Nursultan Ábishulymen taǵdyrym etene baılanysyp ketken. Bul – meniń baqytym dep bilemin. QYZYLORDA.

Elbasy men elorda egiz uǵym»

Amangeldi ǴUMAROV, «Ardagerler uıymy» respýblıkalyq qoǵamdyq birlestiginiń Mańǵystaý oblystyq fılıalynyń tóraǵasy:« Halqymyz aıtatyn «Elý jylda – el jańa» degen tirkestiń aına-qatesiz rastyǵyna, tipti, osy alyp qubylystyń bas-aıaǵy 15-20 jylda-aq jyldamdyqpen ózgeriske túsip, qýattylyqpen qalyptasa alatynyna kýá bolyp otyrmyz. Ata-babalarymyzǵa birneshe ǵasyrlar boıy arman bolǵan táýelsizdik qazaqqa qonǵaly 20 jyldan asyp barady, sheksiz ýaqyt ólshemimen qaraǵanda az ǵana ýaqytta orasan ózgeristerdi bastan keshtik. Tarıhy tereń, mádenıeti qalyptasqan, jaýynger babalarynan muraǵa qalǵan keń-baıtaq jerdiń ıesi – qazaq degen el baryn álem tanydy. Táýelsizdik alǵaly bergi taǵdyrymyzǵa qarap otyryp, aýyz toltyryp aıtatyn jańalyqtarymyzdyń kóp ekendigin moıyndaımyz, sol jańalyqtardyń biri – Qazaqstannyń eńseli elordasy – Astana qalasynyń zamanaýı úlgide jańadan boı kóterýi. О́tken jyly barsha Qazaq eli jańa elordamyz Astananyń 15 jyldyq mereıtoıyn dýmandatyp saltanatpen atap ótken bolatyn. Elbasymyz Nursultan Ábishuly Nazarbaevtyń elordany aýystyrý týraly ıdeıasyn jarııa etkenine bıyl týra 20 jyl bolypty. Tórt jyldan soń Qazaqstan halqy jan-jaqty qoldap, ortalyq memlekettik organdardy Almatydan uıymdasqan túrde kóshirý júzege asyryldy. Táýelsiz elimiz tarıhyndaǵy Astananyń uly dáýiri bastalǵan sol dúbirli oqıǵadan beri endi, mine, 16 jyl ótti. Bul – bizdiń aıbyndy da aıshyqty Astanamyz kámelettik jasqa toldy degen sóz. Osy jyldardyń ishinde elordamyz kórkeıip kemeldene tústi, sonymen birge elimizdiń ekonomıkasy da qaryshtap damyp, nyǵaıýda. Astana men Qazaqstandy búkil dúnıejúzi tanyp, moıyndap otyr. Nursultan Nazarbaev pen Astana egiz uǵym desek, artyq aıtpaǵanymyz. О́ıtkeni, Astana – Elbasymyzdyń eren erligi, qoltańbasy. Endeshe, Prezıdent pen Astananyń týǵan kúnderi birge atalýy da zańdy qubylys der edik. «Bizdiń elordamyzdyń aty qazirdiń ózinde Eýrazııa men Sol­tústik Amerıkadan 56 el­diń memleket pen úkimet basshy­laryn jınaǵan Eýropadaǵy qaýipsizdik jáne yntymaqtastyq uıymynyń HHI ǵasyrdaǵy alǵashqy sammıti ótkizilgen jer retinde jahandyq tarıhqa endi», degen bolatyn N.Nazarbaev ótken jyly Astananyń 15 jyldyǵyna arnalǵan saltanatty jınalysta sóılegen sózinde. Astananyń asqaqtaǵan sol dańqy jyl saıyn dúbirli tarıhı oqıǵalarmen odan saıyn sharyqtap keledi. Beıbitshilikti, dostyqty, ymyralasyp-yqpaldasyp tirlik keshýdi kóksegen túrli deńgeıdegi aýqymdy jıyndardyń ordasyna aınaldy. Basqasyn aıtpaǵanda, kúni keshe ǵana elordamyzda 170 mln. halyqty quraıtyn úsh eldiń memleket basshylary Eýrazııalyq ekonomıqalyq odaq qurý týraly shartqa saltanatty túrde qol qoıdy. Bul bizdiń Elbasymyzdyń osydan 20 jyl buryn usynǵan ıdeıasy bolatyn. Qazaqstan ardagerleri men aqsaqaldary qashanda tynyshtyqty, elimizdiń damyp, búgingi de, keler de urpaqtyń baqytty bolǵanyn qalaıdy. Elbasy júrgizip otyrǵan saıasat bizdiń halqymyzdy osy baqytqa jetkizedi dep senemiz. Sondyqtan, ardagerler qaýymy árqashan Elbasymen birge. Biz aıbyndy Astanamyzdyń týǵan kúnin jyl saıyn qýana qarsy alamyz. Elde júrse qýana qarap, bilim, óner qýyp shetelderge shyqqan perzentterimizdiń maqtanyshyna, arqasúıer qorǵanyna aınalǵan Astanamyz asqaqtaı bersin! Qazaqty Máńgilik Elge jetkizemin degen Elbasy muraty bar, endeshe, qazaq ta, onyń astanasy da máńgilik qalaǵa aınalǵaı!

«Arqalandyrǵan qoldaý»

Aqtaý. Qobylandy TURDYBEKOV, hımııa ǵylymdarynyń doktory: Búginde otandyq farmasevtıka óner­kásibiniń kóshbasshysyna aınalyp otyrǵan bizdiń «Fıtohımııa» halyqaralyq ǵylymı-óndiristik holdınginiń jemisti is-qyzmeti eń aldymen Tuńǵysh Prezıdentimiz N.Á.Nazarbaevtyń udaıy kómek-qoldaýy arqasynda ekenin ujym músheleri mereı tutady. Buǵan dálel jetkilikti. Sonaý ótpeli qıyn kezeńde bul baǵyttaǵy izdenisterdi jańa bastaǵanymyzda kedergilerdi jeńýge jigerlendirip, jumysty jetildirýge tapsyrma berip, tikeleı óz qaraýyna alǵan 1995 jyldan beri Elbasy jergilikti tabıǵı shópterden dári-dármekterdi jasaý, óndirý isin nazardan tys qaldyrǵan emes. Aımaqqa jumys saparlarynda birneshe ret ǵalymdar men mamandarymyzben áńgimelesip, jaǵdaıǵa kózbe-kóz qanyqsa, mekeme basshysyn qabyldaý arqyly da barlyq máselelerdi sheshýge kómektesip otyrdy. El múddesine, halyq muqtajyna degen naqty qamqorlyq óndiris áleýetin kóterýge, atap aıtqanda, farmasevtıkalyq zaýyt 3 kezeginiń birinen soń biri iske qosylýyna zor áserin tıgizdi. Memleket basshysynyń kómek-qoldaýyna oraı ujym músheleriniń de óz mindetterine jaýapkershiligi joǵary. Qaterli isik aýrýyna qarsy qoldanylatyn «Arglabın» preparaty jasaldy. Ol kóptegen elderde tirkelip, patentke ıe boldy. Qazir ishki jáne syrtqy rynokta ótimdi dárilerdiń 43 túri shyǵarylady. Taıaý jyldarda otandyq preparattar óndirýde úles salmaqty 50 paıyzǵa deıin kóterýge múmkindik bar. Mundaı jetistikterge Elbasy­nyń qamqorlyǵy arqasynda jetip otyrmyz. Sondyqtan Memleket basshysyna degen rızalyǵymyz shek­siz. Senimge laıyq bolý – maqsa­tymyz. QARAǴANDY.

«El kóshi irkilmeı, alǵa qaraı júre bermek»

Saqypjamal ALPAROVA, ustaz:

Biz Almaty oblysynyń ortalyǵynan tym shalǵaıda, Balqash kóliniń boıyndaǵy Qaraoı aýylynda turamyz. Kógildir ekran arqyly el jańalyǵyn jiti qarap otyrǵandyqtan, Elbasy Nursultan Nazarbaevtyń bıylǵy jylǵy Qazaqstan halqyna arnaǵan Joldaýyndaǵy «XXI ǵasyrdaǵy damyǵan el degenimiz – belsendi, bilimdi jáne densaýlyǵy myqty azamattar. Bul úshin biz ne isteýimiz kerek?» degen suraǵy árbir ustazǵa júktelgen jaýapty mindet ekenin túısinemiz. Árbir jeke tulǵanyń bolashaǵy mektebinde shyńdalady. Erteń osy elge ıe bolyp, táýelsiz elimizdiń tizginin ustar azamattar – búgingi aldymyzda otyrǵan shákirtterimiz. Sondyqtan, ár oqýshynyń sapaly bilim alyp, ulttyq mentalıtetimizge saı tárbıelenýine ýaqyt talabyna saı ustaz biliktiligin arttyrý qajettiligi týyndap otyrǵany ras. Osy oraıda, muǵalimderdiń biliktiligin arttyrýda «Nazarbaev zııatkerlik mektebi» janyndaǵy bilim berý sapasyn kóterý sekildi ıgi sharalar sonyń aıǵaǵy. Shyny kerek, elimizde memlekettik saıasatqa saı biz sekildi alystaǵy aýyldar da Elbasy nazarynan tys qalmaýda. Olaı deıtinim, Elbasynyń aıtqan sózi men bizdiń aýylymyzda atqarylyp jatqan oń ister qabysyp, halyq múddesi úshin júrgizilip jatqan jumystardyń ıgiligin el kórýde. Ony men osynaý ıgilikterdiń naqty kýágeri ári ustaz retinde ashyq aıta alamyn. Álemdik jańa tehnologııalar engizile otyryp, bolashaǵymyzdyń jarqyn bolýyna jol ashyldy. Elbasymyz Qazaqstannyń basty baılyǵy – adam kapıtaly, onyń densaýlyǵy, bilimi kezek kúttirmeıtin negizgi másele ekendigine de úlken mán berdi. Búgingi kópultty memle­ke­timizdi beıbit jolmen basqarǵan suńǵyla saıasatker Elbasymyz barda eldiń kóshi irkilmeı, alǵa qaraı júre bermek. Almaty oblysy, Balqash aýdany, Qaraoı aýyly.

«Gaz Elbasy shapaǵatynyń arqasynda keldi»

Orynǵalı ERMEKQALIEV, Qaratóbe aýdandyq ardagerler keńesiniń tóraǵasy: Oral óńiriniń shalǵaı aýdandaryna kógildir otyn jetkizý jobasy ózge óńirlermen salystyrǵanda erterek bastal­ǵanymen, 2005 jyldary Jaı­yq­tyń sol jaǵalaýyndaǵy turǵyndar bul ıgilikti kóre almady.Tipti, Qarashyǵanaq kenishi ornalasqan Bórli aýdanynyń birqatar eldi mekenderinde, osy endiktegi Terekti aýdanynda turǵyndardyń qı, kómir jaǵyp otyrýy múldem kelispeıtin qısynsyz jaǵdaı edi. Bul kereǵarlyqty osydan toǵyz jyl buryn Aqjaıyqqa kelgen saparynda elimizdiń Prezıdenti Nursultan Nazarbaev birden ańǵaryp, baıqap qalǵan eken. Sol kezde Elbasy Úkimet pen joǵary memlekettik organdarǵa bul máseleni kesheýildetpeı shuǵyl sheshý qajettigi jóninde tapsyrma bergeni buqaralyq aqparat quraldary arqyly da jurtshylyqqa málim boldy. Sodan keıin kóp keshikpeı maǵan sol kezdegi Qaratóbe aýdanynyń ákimi, búgingi Batys Qazaqstan oblysy ákiminiń orynbasary Arman О́teǵulov habarlasyp: «Oreke, erteń Aqsaıǵa júrip ketýimiz kerek. Jolǵa jınala berińiz. Elbasy tapsyrmasyna baılanys­ty onda shuǵyl keńes ótkiziledi.Soǵan qatysýymyz kerek», dep ún qatty. Bardyq, qatystyq. Kún tártibine qoıylǵan másele boıynsha sol kezdegi Energetıka jáne mıneraldyq resýrstar mınıstri Vladımır Shkolnık jáne «QazMunaıGaz» ulttyq kompanııasynyń prezıdenti Uzaqbaı Qarabalın sóz sóıledi.Sheteldik kompanııalar basshylary qatysqan jumys keńesinde máseleler qyzý, jan-jaqty talqylandy. Bul máseleler, maǵan aýdan ákimi aıtqandaı, Elbasy tapsyrmasyna oraı Qarashyǵanaq – Oral magıstraldi gaz qubyryn tartyp, ony Jympıty, Qaratóbe óńirlerine deıin jetkizý jóninde eken. Elbasy bul aýqymdy áleýmettik jobany KPO.b.v sheteldik kompanııalar alıansy qarajaty esebinen júrgizýdi júktepti. Búginde Jaıyqtyń sol jaǵalaýynda ornalasqan óńir turǵyndary kógildir otynnyń paıdasyn túgelge jýyq kórip otyr. Bul qashanda qarapaıym adamdarǵa jaqyn júretin, olardy tolǵandyratyn áleýmettik-turmystyq máselelerdi sheshý joldaryn qalt jibermeıtin Elbasymyzdyń tikeleı tıgizgen shapaǵatynyń nátıjesi edi. Osy oraıda bizder, aǵa urpaq ókilderi Nursultan Ábishulynyń elge shyqqan saparlarynda qarapaıym turǵyndarmen, soǵys jáne eńbek ardagerlerimen kezdesip, oı-pikir almasýǵa ylǵı da jyly yqylas-peıil tanytyp turatynyna tántimiz. Qashanda el, halyq qamyn kózdegen Memleket basshysy ǵana osylaı jasaıtyny anyq. Bul naǵyz Elbasyna tán qasıet dep bilemiz. Eń bastysy – el-jurt pen Elbasy arasynda aıtylǵan ózekti máselelerdiń jerde qalmaıtyny, óziniń kezi men kezegi jáne ýaqyty kelgende Nurekeńniń el múddesin kózdegen sheshimder qabyldaıtyny barsha qazaqstandyqtarǵa belgili. Al Bórli, Terekti jáne Jympıty men Qaratóbe sekildi irgeli tórt aýdannyń basyn biriktirgen gaz jobasy Elbasynyń halyqqa tıgizgen kómegi men qoldaýynyń tek tıtimdeı bir bólshegi dep sanaımyz. Batys Qazaqstan oblysy, Qaratóbe aýdany.

«Adamdy kórkeıtetin – eńbek»

Nıkolaı ShÝLS, jeke kásipker:

Elbasymyzdyń paıdaly qoǵamdyq eńbekke yntalandyratyn, jańasha ómir súrýge úndeıtin jalyndy sózderin muqııat tyńdap, kerekti jerlerin qoıyn dápterime jazyp júremin. Mysaly, halyqqa arnaǵan qaı Joldaýyn alsaq ta mańyzdy, halyqtyń jaǵdaıyn, turmysyn jaqsartýdy ditteıtin máselelerdi sheshýge arnalyp jatady. Osynyń ózinen-aq sarabdal saıasat pen bekem birliktiń belgisi bir-birimen tyǵyz sabaqtasyp, elge, jerge, elimizdi mekendeıtin ulttar men ulystardy ortaq maqsatqa jeteleýdiń naqty tájirıbesi qalyptasqanyn anyq baıqaýǵa bolady. Buǵan ekpin túsirip, bóle-jara nege aıtyp otyrmyn? О́ıtkeni, aldymyzda álemniń eń damyǵan órkenıetti elderi qataryna qosylý sekildi asqaraly mindet, san taraý jol tur. Ony eńserýdiń birden-bir baıandy baǵyty – jasampaz eńbek! Prezıdentimizdiń «Qazaqstan-2050» Strategııasy – qazaqstandyqtardyń eki-úsh býyny oryndaýǵa tıisti mańyzdy mindet. Álemniń barynsha damyǵan 30 eliniń qataryna ený joly ońaı emes, osyny árkim túsinýi kerek», degen baılamdary ózgeler sııaqty meniń de jigerimdi janyp, jasym kelse-daǵy jeke kásipkerlikpen aınalysýǵa túrtki saldy. Osylaısha, boıymyzdaǵy kúsh-qýatymyzdy Otanymyzdy gúldendirýge, otbasylyq bıznesti órkendetýge jumsap, jastardan qalyspaı jumys istep kelemiz. Bastapqyda qoıdyń Romanov tuqymyn ósirý jónindegi bastamalyq jobama kúdiktene qaraýshylar bolmaı qalǵan joq. «Kóz – qorqaq, qol – batyr» demeı me? Atalǵan tuqymnyń ósimtaldyq, soltústik óńirge tózimdilik qasıetterin jan-jaqty zerttep, birqatar bıologııalyq artyqshylyqtaryn ábden qanyqqannan keıin qoılardy Bashqurtstannan satyp aldyq. Bul qalaı múmkin boldy degen saýalǵa Elbasynyń «Adamdy ómir úıretedi, eńbek kórkeıtedi», degen sózderimen jaýap bergen bolar edim. Jáne de memleketimizdiń tıimdi baǵdarlamalar usynyp, kásibine qaraı násibin tabýdy rettep otyrýy da qanattandyrady. Otbasymyzǵa «Jumyspen qamtýdyń jol kartasy-2020» Úkimettik jobasy boıynsha berilgen jeńildikti nesıege satyp alǵan otyz bas saýlyq qoı búginde úsh esege kóbeıip, qotan tólge toldy. Asyltuqymdy Shopanata túliginiń 12 basyn mal ósirýge nıet qylǵan jandarǵa sattyq. Kásipkerlik jumysymyzdy odan ári sátti jalǵastyra bilip, mal basyn 300-ge jetkizýdi josparlap otyrmyz. Keleshekte «Aýyl sharýashylyǵyn qoldaý qory» arqyly alynǵan qarajatqa sharýashylyq irgesin keńeıtsek pe degen maqsatymyz bar. Túbinde úlken mal fermasyna aınalyp jatsaq, tańyrqaýdyń esh reti joq. Maqsat etken adamǵa elimizde jumys isteýge barlyq jaǵdaı jasalǵanyn bizdiń mysal arqyly-aq kóz jetkizýge bolady. Osylaısha, Memleket basshysynyń te­geýrindi talaptary jáne ornyqty saıasaty arqasynda asyltuqymdy mal asyraý mol­shy­lyq, yrys tasqynyna aınalǵan. Soltústik Qazaqstan oblysy, Aqqaıyń aýdany.

«Otbasymnyń quty – Elbasy syılaǵan traktor»

Qarqynbek AHMETBEK, «Ańsar» sharýa qojalyǵynyń jetekshisi: Men 2004 jyly Qytaı Halyq Respýblıkasynan atajurtymyzǵa qonys aýdardym. Bir memleketten bir memleketke kóshýdiń, jańa turmysqa beıimdelýdiń ońaı emes ekeni belgili. Otanyna oralǵan oralmandarǵa da ońaı tıgen joq. Alaıda, babalarymyz ot jaqqan atamekenimizge kelgenimizge qýanyshty edik. 2009 jyly ómirimde óshpes iz qaldyrǵan erekshe oqıǵa boldy. Elbasy Nursultan Nazarbaev Semeı qalasyna kelgen saparynda óz qolymen birqatar sharýa qojalyqtarynyń jetekshilerine aýyl sharýashylyǵy tehnıkalaryn syılady. Prezıdenttiń kez kelgen qazaqstandyqqa týǵan ákesindeı qamqorlyq kórsetetinin sol kezde baıqadym. Men de Nursultan Ábishulynyń óz qolynan «MTZ-80» traktorynyń kiltin aldym. Meniń shańyraǵymda alty bala ósip keledi. Elbasy syılaǵan traktor qazir baldyrǵandarymnyń nesibesi men rızyǵyna aınaldy. Atamekenine oralǵan qandasyn ózekke teppeı, el ekonomıkasyn damytýǵa úles qosýǵa shaqyrǵan Elbasy sózi únemi qýattandyryp, jumysqa jigerlendirip turady. Búginde ózim jetekshilik etetin sharýa qojalyǵynda 120 gektar egistik, 70 gektar shabyndyq, 1800 gektar jaıylymdyq jer bar. Iri qaranyń basyn – 192, jylqyny – 12, qoı men eshkini 150 basqa jetkizdik. Jyl saıyn dándi daqyldyń ár gektarynan 20-25 sentner, maıly daqyldyń ár gektarynan 11-12 sentner, kópjyldyq shóptiń ár gektarynan 35-40 sentner ónim alamyz. Prezıdent syılaǵan tehnıkanyń qadamy qutty boldy. Otbasymyzdyń ál-aýqaty artty. Qazir mektep jasyndaǵy tórt balam alańsyz bilim alýda. Olar Amankeldi atyndaǵy orta mektepte úzdik oqyp, aýdandyq pán olımpıadalarynda júldeger bolyp júr. Zaıybym «Kúmis alqa» ıegeri atandy. Jahandyq saıasatta dúıim álem moıyndap otyrǵan Elbasyǵa alǵysym sheksiz. Shyǵys Qazaqstan oblysy, Zaısan aýdany, Birjan aýyly.

«Ormandaı tutastyǵymyzdyń kepili»

Seıfolla MUHAMADIEV, ormanshy: Kóksheniń kórkem búıi­rindegi Qypshaq ormanshylyǵynda otyz jylǵa jýyq eńbektenip ke­lemin. Bizdiń aýyl jasyl jelek qushaǵynda. Jastaıymyzdan jelegi jelbiregen qaraǵaı, qaıyń­darmen qııal jarystyryp óstik. Ata-babalarymyz ormandy qalyń qazaqtyń tutastyǵymen baılanys­tyryp, kóp pálsapa aıtqanyn bilemiz. Bul naqyldyń mazmuny búgingi kúni barynsha keńeıip otyr. Elbasymyz Nursultan Nazar­baevtyń kez kelgen sózinen osy ulaǵatqa qatysty jańa mindetter ańǵarylyp turady. Keýdemizge qýat paıda bolyp, jumysymyzǵa asyǵa túsetinimiz sondyqtan bolar. Biz óz aınalamyzdaǵy 1450 gektar jasyl jelekti kútip-baptap, baqylaý jasaımyz. Orman qanshama qalyń bolǵanymen, jany názik. Onyń eńsesin tikteýine septesip, birge syrlasyp, birge erkelep júremiz. Masterimiz Baıbolat Kamalıev, onyń ormanshy baýyry Meırambek, tájirıbesi tolysqan Serik Muqanov, órt sóndirýshi Oralbek Boranbaev, jalpy, ujymdaǵy segiz ormanshynyń barlyǵy kásibine myǵym jandar. О́z balam Talǵat ta osynda 13 jyl eńbektenip, jýyrda Aıyrtaý orman sharýashylyǵynyń bas ormanshysy bolyp joǵarylatyldy. Elbasy Nursultan Na­zar­­­­baev­­tyń jasampaz bastama­lary búginde barlyq salalarda jemisin tógip, halqymyzdyń ıgiligine aınalýda. Máselen, «Jasyl aımaq» keń aýqymdy qozǵalysqa ulasty. Bizdiń ormanshylyǵymyzda jyl saıyn 30 gektarǵa balǵyn kóshetter otyrǵyzý dástúri qalyptasqan. Aınalamyzdaǵy aýyldardyń turǵyndary da qut mekenderin jasyl jelekke toltyra bastady. Sondaı-aq, oqýshylar men stýdentter jasaqtary tyndyrǵan jumystarǵa rızamyz. Osyǵan qarap Elbasymyzdyń sarabdal saıasatyna, ormandaı tu­tas­ty­ǵymyzdyń baıandylyǵyna qýanamyn. Aqmola oblysy, Zerendi aýdany.