Kúıik shalǵandar laıyqty em aldy

Oblys ákimdigi densaýlyq saqtaý basqarmasy keltirgen derekterge sensek, eki azamattyń beti, moıny, aıaǵy qatty zaqymdanǵan eken. Zerdeleý barysynda III-a, III-b jáne IV dárejeli jaraqat belgileri anyqtalǵan. Keń termııalyq magıstraldy kúıikpen aýrýhananyń qabyldaý bólimine jetkizilgen turǵyndarǵa jergilikti dárigerler jedel kómek kórsetýge kirisken. Árıne, gaz ballonynyń jarylýy saldarynan oryn alǵan jaraqatty birden jazý múmkin emes.

Mamandardyń aıtýynsha, denesiniń 85 paıyzyn kúıik shalǵan azamattarǵa úshinshi dárejeli kúıik shok emi shuǵyl túrde jasalǵan. Tynys joldarynyń termoıngalıasııalyq terapııasy jedel qoldanylǵan. Keıinnen naýqastar jansaqtaý bólimine ornalastyrylǵan. Ondaǵy mamandar da jergilikti azamattarǵa qoldan kelgen kómekti aıamaǵan. Barlyq tıisti em-sharalar men kómekter tolyqtaı kórsetilgen.

Oblystyq densaýlyq saqtaý basqarmasy baspasóz qyzmetiniń habarlaýynsha, Taraz qalasynan shuǵyl jetken kombýstıologtiń qajetti sharalardy jedel qabyldaýynyń nátıjesinde ómir men ólim arasyndaǵy arpalysta jatqan naýqas esin jıǵan. Osylaısha, ómirge jańadan kelgendeı kúı keshken.

Turǵyndardyń aıtýynsha, úıdegi gaz ballonynan shyqqan tútindi eshkim ańǵarmaǵan kórinedi. Az ǵana ýaqyt buryn ózderi tutatqan gaz sútpisirim ýaqytqa jetpeı atylǵan. Dál sol sátte naýqas azamattar sol bólmege kirgen eken. Atylǵan ballonnan kelgen zardap saldarynan ekeýiniń de denesin tolyqtaı derlik kúıik shalǵan.

Álbette, búgingi tańda naýqas azamattardyń jaǵdaıy birshama jaqsara túsken. Áıtkenmen olardyń qazirgi jaǵdaıyn eskergen aq jeleńdiler ortalyq aýrýhanada terapııalyq emdi jalǵastyryp jatyr. Turǵyndar tolyq saýyqqansha baqylaýda bolmaq. О́ıtkeni olardyń denesindegi jaraqattyń aýyr ekeni anyq.

Hırýrgııa bólimshesiniń meńgerýshisi Medet Muqashevtyń aıtýynsha, eki azamat ta der kezinde sanavıasııa jelisi boıynsha mamandandyrylǵan Taraz qalalyq kópsalaly aýrýhanasynyń kúıik bólimine jetkizilgen eken. Búgingi tańda naýqas­tardyń jaǵdaıy jaqsarýy úshin mamandar qoldan kelgen kómekti aıap jatqan joq.

«Turmystyq gazdan keletin barlyq zardaptan abaı bolǵan jón. Tótenshe jaǵdaılardyń qaıǵyly aıaqtalýy ádette turmystyq gaz qurylǵylaryn qoldanbaý jáne erejelerdi buzý saldarynan oryn alyp jatady. Naqtyraq aıtar bolsaq, kóbinese gaz ballon jarylýy  adam ómirine zor qaýip tóndiredi. Sondyqtan turǵyndar qaýipsizdik erejelerine barynsha abaı bolǵany jón», deıdi M.Muqashev jaǵdaıdy túsindirip.

Moıynqum aýdany óńirdiń úshten bir bóligin alyp jatqan alyp aýdan ekeni málim. Tipti keıbir aýyldar aýdan ortalyǵynan 200 shaqyrym qashyq­tyqta jatyr. Mundaı jaǵdaı álgindeı alystaǵy aýyldardyń birinde oryn alǵanda dárigerlerdiń der kezinde kómek kórsetýiniń ózi muńǵa aınalar ma edi, kim bilsin?! Qysqasy, óńirdegi kógildir otyn­men qamtylmaǵan jalǵyz aýdan sanalatyn Moıyn­qumdaǵy jaǵdaıdan kópshilik sabaq alsa deısiń...

Jambyl oblysy,

Moıynqum aýdany