Kóshi-qonnyń jańa tártibi kúshine endi

О́ńirlik jumyspen qamtýdy úılestirý jáne áleýmettik baǵdar­lama­lar basqarmasynyń basshysy Almıra Dısıýpovanyń málimetinshe, ázirshe bosqyn már­tebesi eshkimge berilgen joq. 27 qańtardan bastap Eýrazııalyq ekonomıkalyq odaqqa múshe mem­leketterdiń azamattary úshin Qazaqstan Respýblıkasy aýmaǵynda bolý merzimin shekteýdi kózdeıtin ózgerister kúshine engeni málim. Oǵan sáıkes, endi sheteldikter úshin ár alty aıda 90 táýlik lımıt beriledi. Buǵan deıingi tirkeý rásimderiniń bereketsizdiginen ekonomıkalyq odaq elderiniń azamattary ár 90 kún saıyn shekaradan árli-berli ótip, Qazaqstanda turaqtap qalyp júretin. Endi shekarada jańa tártip ornady. Sheteldikter Qazaqstan kirip-shyǵa beretin ashyq qaqpa emes ekenin uǵynǵany jón.

– Bizdiń elden pana izdep kelgen ózge memleketterdiń azamattary oblysymyzda barshylyq. Atap aıtqanda, ondaı sheteldikterdiń sany – 54 adam, negizinen Reseı men Germanııanyń jáne Ýkraınanyń azamattary. Olar Ertistiń Pavlodar óńirinde turady jáne jumys oryndarynda eńbek etip júr. Al jyl basynan pana surap kelgen bógde el azamattarynyń jalpy sany 87-ni quraıdy. Adamdar tutas otbasymen kelip jatqan jaǵdaılar da tirkeldi, – deıdi A.Dısıýpova.

Byltyr Reseıde mobılızasııa jarııa­lan­ǵanda Qazaqstanǵa aǵylǵan nópir­diń kóbi Pavlodar aýmaǵyn basyp ótti. Sol ýaqytta jergilikti kásip­ker­ler qaıyrymdylyq astaryn uıymdas­tyryp, reseılikterge tegin baspa­na da usynǵan jaǵ­daı­lar kezdesti. Tipti «Aza­mat­tar­ǵa arnalǵan úkimet» korpo­ra­sııa­synyń halyqqa qyzmet kórse­tý ortalyqtarynda JSN alý úshin uzyn-sonar kezekke turǵandarǵa tegin das­tarqan jaıylǵanyn da kóz kórdi. Mun­daı jalpaqshesheılik bizdiń otandas­tary­myzdyń basym bóligine unamaǵa­ny málim. Jergilikti bılik ókilderi joǵa­rydaǵy qaıyrymdylyq shara­lary­nyń barlyǵy jeke azamat­tardyń óz bastamalary boıynsha júzege asqa­nyn aıtady. О́zge elden ýaqyt­sha kel­genderdi áleýmettik qoldaý bizdiń memle­ke­timizdiń zańnama­synda qarastyrylmaǵan.

Oblystyq polısııa departamenti kóshi-qon qyzmeti basqarmasynyń basshysy Dáýlet Ysqaqovtyń sózine súıensek, byltyrǵy qyrkúıek pen jeltoqsan aılary aralyǵynda óńirimizde bolǵan reseılikter qazir Qazaqstan aýmaǵyna taǵy kele alady. Olarǵa 90 kún osynda turýǵa ruqsat etiledi. Odan soń pana izdep kelgender elderine qaıtyp, arada 3 aı ótkende ǵana shekaradan beri ótýine ruqsat. Ertis-Baıan aýmaǵynda búginde shamamen 2 myńdaı reseılik azamat jumys isteıdi. О́tken kúzde kelgen 440 azamat Qazaqstanda turý yhtııarhatyn rásimdep úlgergen.

Esterińizge sala keteıik, 27 qańtar­­dan bastap Qazaqstanda jańar­tyl­ǵan kóshi-qon erejeleri kúshi­ne endi. Engizilgen ózgeristerge sáı­kes, endi elimizge vızasyz kelgen shet­eldikter elde 30 kún ǵana bola alady. Al 6 aı ishinde vızasyz kelgen shetel azamattarynyń elde bolý merzimi 90 kúnnen aspaýy kerek. Elimizge kelgen EAEO aza­mat­tary úshin 180 kún ishinde 90 kún­nen aspaıdy. Burynǵy talapta bul máse­le rettelmegen, ıaǵnı shetel­dikter Qazaq­standa júrip-turý merzi­mi aıaq­tal­ǵannan keıin elden ketip, qaıta kelip, merzimdi jańarta alatyn edi.

Pavlodar oblysy