Abyroıly Aǵzam aqsaqal

Erikti túrde osyndaı saýapty is atqarǵan aqsaqaldyń soıy – Mınnıagzam Avlııarov. Mınnıagzam aqsaqaldy el ishi «Saryózenniń sýpermeni» dese, aýyldastary «Aǵzam aǵa» deıdi eken. Bashqurtstanda dúnıege kelgen. Biraq tyń ıgerý jyldary Qazaqstanǵa qonys aýdarypty. Sodan osynda sińip ketse kerek. Kóp jyl aýylda mehanızator bolǵan. Bes balasynyń bári – uıa men qııada. Aýyldastarynyń aıtýynsha, Aǵzam aqsaqal qys túse «shynjyr tabanyn» taqymynan bosatpaıtyn kórinedi. Aýyl ishindegi qarmen kúreske bi­lek sybana kirisedi eken. Kóktemde aryqtardy, sý arnasyn tazalaıdy. Bógetterdiń buzylyp ketpeýin qadaǵalaıdy. Jazda bel jazbaı shóp shabady. Al qysta qar kúreıdi.

– Qazaqstanǵa 1958 jyly 19 jasymda tyń jerlerdi ıgerýge keldim. 1961 jyly osynda jiberdi. Ol kezde myna jerler qý dala bolatyn. Keńshar qurylysyna qatystym. Sodan beri men osynda turamyn. Tikenekti – bul meniń Otanym. Men aýyldastaryma shyn júrekten kómektesemin. Alla taǵala maǵan kúsh bergendikten, men adamdarǵa kómektesýim kerek dep sanaımyn. Sonymen qatar qazir bizdiń aýylda kóbine qarttar ǵana qaldy. Aýylymyzdy qar basyp qalǵanda olarǵa júrip-turý qıyn, – deıdi aqsaqal.

Bútin aýyl tóbesine kóterip qurmet kórsetedi. Bir jyl emes, attaı qyryq jyl boıy aýyldastaryna jaqsylyq jasaýdan jalyqpaǵan aqsaqalǵa aýyl jurty dán rıza.

– Aǵzam aqsaqaldy bárimiz qur­met­teımiz. Ol kisi jergilikti halyqqa qyryq jyl boıy kómektesip keledi. Onyń shaǵyn sharýa qojalyǵy bar. Qysta qar tazalaıdy, jazda jergilikti turǵyndarǵa shóp jınaýǵa kómektesedi. Bıyl qonys aýdarý baǵdarlamasy boıynsha Pavlodar oblysynan osynda kóship keletin otbasyna kómek kórsetýge daıyn. Keletin otbasy – kópbalaly. Olarǵa sharýa qojalyqtarynyń basqa basshylary da kómek kórsetedi. Al aqsaqalǵa zor densaýlyq tileımiz. Dál osyndaı adamdar bizdiń jastarymyzǵa úlgi, – deıdi Saryózen aýyldyq okrýgi ákimi Erlan Ospanov.

Qaraǵandy oblysy