Áleýmettik jobalardyń áleýeti

A.Kólginov Aqkól aýdanynda balalardy qoldaý ortalyǵynda boldy. Onda elde alǵash ret «Fosterlik otbasylar» kásibı bala asyrap alý otbasylaryn qurý jónindegi qanatqaqty joba iske qosyldy.  

– Bul – óte mańyzdy joba jáne ony sapaly iske asyrý úshin barlyq kúsh-jigerimizdi jum­saýymyz qajet. Bizdiń mindetimiz – balalardy áleýmettendirý. Ata-anasynyń qamqorlyǵynsyz qalǵan balalar otbasynda turyp tárbıelenýge tıis. Oqý-aǵar­tý mınıstrligi tarapynan da, normatıvtik bazalar boıynsha da qoldaý kórsetiledi, – dedi vıse-premer.

Sondaı-aq A.Kólginov «Aýyl­dyq densaýlyq saqtaýdy jań­ǵyrtý» jobasy aıasynda Aqkól aýdandyq aýrýhanasynyń qyz­metimen tanysty. Ǵımarat kúrdeli jóndeý men jańǵyrtýdy qajet etedi. Aqmola oblysynda ulttyq joba aıasynda medı­sı­nalyq-sanıtarlyq alǵashqy kómek kórsetýdiń 38 obektisi salynady, birqatar aýdanaralyq aýrýhanada kúrdeli jóndeý men jańǵyrtý jumystary júrgiziledi. Sonymen qatar medısınalyq kómekke qoljetimdilikti arttyrý maqsatynda Kókshetaý qalasynda 630 orynǵa arnalǵan kópbeıindi oblystyq aýrýhana salynady.

Jalpy 2023-2025 jyldary el óńirlerinde jáne shalǵaı aýyldarda 650 medısınalyq-sanıtarlyq alǵashqy kó­mek kórsetý obektisi salynady. Bıyl medısınalyq-sanı­ta­r­lyq alǵashqy kómek kór­setýdiń 300-den astam nysa­nynyń qurylysy bastalady, sondaı-aq 30-dan astam ortalyq aýdandyq aýrýhanada kúrdeli jóndeý jáne rekonstrýksııalaý jumystary júrgiziledi. Bul sharalar «altyn saǵat» qaǵıdaty bo­ıynsha jergilikti jerlerde me­dısınalyq kómek alýǵa múm­kindik beredi.

Kókshetaý qalasynda Altaı Kólginov «Eurasia Group Kazakhstan» JShS bazasynda dýaldy oqytý baǵdarlamasyn júzege asyrý barysymen tanys­ty. Agrotehnıkalyq kolledj stýdentteri ózara yntymaqtastyq jónindegi memorandým aıasynda kásiporynda kásibı tájirıbeden ótip, odan ári jumysqa ornalasady. Aqmola oblysy ákimdiginiń aqparaty boıynsha dýaldy oqytý nysany 28 kolledjde qoldanylady, atalǵan tehnologııa boıynsha 4 myńnan astam stýdent bilim alady. 

«Aýyl amanaty» baǵdar­la­ma­syn júzege asyrý aıasynda A.Kólginov sút ónimderin shyǵa­­ratyn «Gormolzavod» JShS-da bolyp, jobanyń al­ǵashqy qatysýshylarymen kezdesti. Baǵdarlama aıasynda kásip­oryn shıkizatty jobaǵa qatysýshylardan satyp alady. Aqmola oblysynyń ákimi Ermek Marjyqpaevtyń aıtýynsha, bıyl baǵdarlamaǵa qatysýshylardy nesıeleý úshin memleket tarapynan Aqmola oblysyna 1,2 mlrd teńge bólindi. Osy qarajat aıasynda aýyldyq eldi mekenderde jáne shaǵyn qalalarda jańa bıznes-jobalardy ashýǵa jáne qoldanystaǵy jobalardy keńeıtýge shamamen 250 nesıe berý josparlanyp otyr.

A.Kólginov Memleket bas­shysynyń tapsyrmasy boıynsha aýyl turǵyndarynyń tabysyn arttyrý jónindegi joba 2023 jyldan bastap óńirlerdiń erekshelikteri men áleýmettik-ekonomıkalyq damýyn eskere otyryp, barsha el tóńireginde keńeıtiletinin atap ótti. Osy maqsatta respýblıkalyq bıýdjetten 50 mlrd teńgeden astam qarjy bólindi.  

Sondaı-aq oblysta «Jaıly mektep» ulttyq jobasyn júze­ge asyrý boıynsha jumys júrgi­­zi­lýde. Aqmola oblysynda 2023-2025 jyldary 26 500 oqýshyǵa arnalǵan 20 mektep salý kózdelgen.

Jumys saparynyń sońynda Soltústik Qazaqstan, Pavlodar, Qostanaı oblystary ákimderi orynbasarlarynyń, Densaýlyq saqtaý, Eńbek jáne áleýmettik qorǵaý, Oqý-aǵartý, Aýyl sha­rýa­­shylyǵy, Mádenıet jáne sport, Ulttyq ekonomıka vıse-mı­nıstr­­leriniń qatysýymen keńes ótti. Onda áleýmettik memle­ket­­tik baǵdarlamalardy sapaly júzege asyrý boıynsha birqa­tar tap­syrma berildi.