AО́SShK tóraǵalyǵy – Beıjińde

Keshe Prezıdent janyndaǵy Ortalyq kommýnıkasııalar qyzmetinde Syrtqy ister mınıstriniń orynbasary Erjan Ashyqbaevtyń qatysýymen brıfıng ótti. Ol Shanhaıda ótken tórtinshi AО́SShK sammıtiniń qorytyndysy týraly baıandap berdi. Bıylǵy jyldyń 20-21 mamyrynda Qytaıdyń Shanhaı qalasynda Azııadaǵy ózara is-qımyl jáne senim sharalary jónindegi keńestiń tórtinshi sammıti ótken bolatyn. «Búgingi tańda AО́SShK – tolyqqandy qalyptasqan halyqaralyq uıym. Uıymnyń 4-shi sammıtinde birqatar erekshelikter bar. Onyń ishinde, eń aldymen sammıtke 47 memleket pen halyqaralyq uıymdardyń ókilderi qatysqandyǵy bolyp otyr. Sondaı-aq, alǵash ret Azııa keńesiniń jumysyna BUU-nyń Bas hatshysy Pan Gı Mýn qatysty. Jańa eki memleket – Katar men Bangladesh Keńeske tolyqqandy múshe retinde qosylyp, forýmnyń qatysýshy memleketteriniń sanyn 26 memleketke deıin jetkizdi. Sondaı-aq, 6 memleket pen 4 halyqaralyq uıym baıqaýshy retinde jumys istep otyr. Uıymnyń Azııadaǵy qatysýshylarynyń úlesi, aýmaq jaǵynan qurlyqtyń 90 paıyzǵa jýyǵy bolsa, al halqy jaǵynan dúnıejúziniń jartysyna teń memleketterdi biriktirip otyrǵandyǵy onyń qanshalyqty mańyzdy uıym ekendigin bildiredi. Aıta keterlik jáıt, bıyl forýmnyń tóraǵalyǵy Túrkııadan Qytaıǵa ótti. Bul da mańyzdy úrdis. О́ıtkeni, resmı Beıjińniń kópjaqty forýmdarda mundaı belsendilikti jıi óz moınyna ala bermeıtinin esepke alsaq, forým tóraǵalyǵynyń Azııanyń batysyndaǵy memleketten shyǵysyndaǵy alpaýyt elge ótýi forýmnyń panazııalyq sıpatqa ıe bolǵanynyń dáleli. Taǵy bir mańyzdy nátıje, Elbasy Nursultan Nazarbaevtyń AО́SShK-ni Azııadaǵy qaýipsizdik pen damý uıymy retinde qaıta qurý nemese órkendetý usynysy bolyp otyr. Bul, árıne, Azııa keńesiniń damýyndaǵy erekshe kezeń bolmaq. Osy kezeńde biz Qytaı Halyq Respýblıkasynyń tóraǵalyǵyna úlken úmit artyp otyrmyz. Sammıtke qatysýshy múshe-memleketter Shanhaıda ótken jıynda «qazaqstandyq faktordy» jıi aýyzǵa alyp, erekshe atap otyrdy. «Qazaqstandyq faktor» degendi naqtylasaq, Elbasy engizgen saıası aktıv pen kapıtaldy aıtar edik. Halyqaralyq arenada moıyndalyp, birqatar álemdik úrdister boıynsha óziniń jeke kózqarasyn bildire alatyn úlken kóshbasshy pikirleri jıynǵa qatysýshy memleketterdiń de pikir-ustanymyna saı keledi», dedi E. Ashyqbaev. AО́SShK-niń Qazaqstandaǵy Hatshylyǵy jýyq arada Al­ma­tydan Astanaǵa kóshirilmek. E.Ashyqbaevtyń aıtýynsha, hatshy­lyqtyń jańa jetekshiligine qytaılyq dıplomat taǵaıyndalǵan. Ol Astanada ótetin hatshylyqtyń arnaıy sessııasyna qatysyp, QHR-dyń AО́SShK-ge tóraǵalyǵy barysynda júzege asyrýdy jos­parlap otyrǵan basymdyqtar baǵdarlamasymen tanyspaq. Negizgi baıandamadan soń jýrnalıster Syrtqy ister mınıstriniń orynbasaryna taqyryptan tys, ózderin qyzyqtyrǵan suraqtaryn qoıyp, tıisti jaýaptaryn aldy. Venera TÚGELBAI, «Egemen Qazaqstan».