«Byltyrǵy qorytyndy boıynsha baǵanyń qymbattaýy 23 paıyzǵa jetken. Bul – respýblıkadaǵy eń tómengi kórsetkishterdiń biri. Astanada azyq-túlik bir jylda orta eseppen 25 paıyzǵa qymbattady. Ákimdik turaqtandyrý qorynda rezerv jınaýdy qoıyp, «aınalym shemasy» aıasynda saýda jelilerine jeńildikpen zaım berýge kóshti.
14 mıllıard teńge bólindi. Bul – óńirler arasyndaǵy eń joǵary kórsetkish. Qabyldanyp jatqan sharalardyń tıimsiz ekeni anyq. Jyldar boıy elordanyń aınalasynda azyq-túlik beldeýin damytý týraly aıtyldy, biraq jumys oryndalmady», dedi Prezıdent.
Prezıdenttiń aıtýynsha, Astana azyq-túlikti Almatydan 4 ese, al Shymkentten 2 ese az óndiredi. Jalpy barlyq óńirmen salystyrǵanda qala bul kórsetkish boıynsha kósh sońynda kele jatyr.
«Keıingi 8 jylda elordaǵa ákelingen azyq-túlik ımporty 3 esege artty. Negizinen osy jerde shyǵarýǵa bolatyn ónimder týraly sóz bolyp otyr. Bul rette jergilikti qaıta óńdeý kásiporyndary tek jarym-jartylaı jumys istep tur.
Kókónis saqtaıtyn qoımanyń jetispeýi saldarynan jaǵdaı qıyndap otyr. Sondyqtan 2025 jylǵa deıin qalada 13 myń tonnadan astam kókónis saqtaıtyn qoımalar salý kerek. Aýyl sharýashylyǵy mınıstrligine Astana qalasy men Aqmola oblysynyń ákimdikterimen birlesip, elordanyń aınalasynda azyq-túlik beldeýin qalyptastyrý jóninde pármendi sharalar qabyldaýdy tapsyramyn», dedi Memleket basshysy.
