Fýtbol. Álem chempıonaty: Gana – AQSh 1:2

ASTANA. 17 maýsym. Búgin tań aldynda Natal qalasynda chempıonattyń G tobyndaǵy Gana jáne AQSh quramalary ózara kezdesti. Tartysty ótken oıyn 2:1 esebimen amerıkalyqtardyń paıdasyna sheshildi. Bul týraly egemen.kz habarlady. Amerıka quramasy osynda kelgen óziniń kóp sandy jankúıerleriniń kóńilderinen shyǵa bildi. Ol birinshiliktegi birinshi kezdesýinde Ganadan kelgen «qara juldyzdardyń» aptyǵyn ádemi basty. Osy oıynda amerıkalyqtar chempıonattaǵy eń tez goldy da soqty. Ony 1-mınýtta Klınt Dempsı aıyp alańynyń syrtynda turyp, uryp túsirdi. Afrıkalyqtar birinshi taımda dopqa kóbirek ıelik etti. Alaıda, odan Tım Hovard qorǵaǵan qaqpaǵa naqty qaýip tónetin sátti kóp uıymdastyra almady. Ekinshshi taımda Gana quramasy oıynshylarynyń belsendilikti kúrt arttyra túsýimen jaǵdaı kúrt ózgerip ketti. Uzaqqa sozylǵan bul shabýyl 82-mınýtta Andre Aııýdyń esepti teńestirýimen aıaqtaldy. Endi qısyn boıynsha osyǵan jigerlengen Afrıka fýtbolshylary muny jeńisti núktege deıin jetkizýge tıisti edi. Biraq sońǵy sátterde shalttyq tanytqan amerıkalyqtar bul joly da olardyń aldyn orap ketti. Olar 86-mınýtta kezekti buryshtama dobyn oryndaý kezinde alǵa shyqty. Dopty aıyp alańyna qaraı Grem Zýsı áýelete jetkizdi. Oǵan buryn jetken Djon Brýks qaqpaǵa baspan uryp túsirdi. Kútpegen jerden bolǵan bul soqqydan ganalyqtar oıyn sońyna deıin esterin jınaı almady. Osylaısha AQSh quramasy «amerıkalyq armannyń» oryndlaýy jolyndaǵy alǵashqy qadamyn jasady. Damır Qojamqul. Derekkóz: Chempıonat.Rý. Foto: Sportbox.ru.