Sırek kezdesetin aýrýlardy anyqtaý men emdeýdiń tásilderi talqylandy

Pedıatrııa jáne balalar hırýrgııasy ǵylymı ortalyǵy men QR Pedıatrlar Odaǵynyń uıymdastyrýymen ótken sharaǵa elimizdiń ár óńirinen 80-nen asa maman: pýlmonologtar, pedıatrlar, dıetologtar, gastroenterologtar, fızıoterapevt-dárigerler, rezıdentter, medısınalyq JOO stýdentterimen qatar, Qazaqstan respýblıkasynyń barlyq aımaqtarynan sırek (orfandyq) aýrýlar boıynsha óńirlik úılestirýshileri men ár oblystyń Densaýlyq saqtaý basqarmalarynyń ókilderi qatysty.

Sheberlik dáristerin Reseıdiń jetekshi dárigerleri – professor, «N.P.Bochkov atyndaǵy MGǴO» FMBǴM-niń genetıkalyq epıdemıologııa zerthanasynyń bas ǵylymı qyzmetkeri Natalıa Kashırskaıa, RF Densaýlyq saqtaý mınıstrliginiń «Ulttyq medısınalyq balalar densaýlyǵyn zertteý ortalyǵy» FMAM-nyń bilikti mamandary – mıkrobıolog Anna Lazareva, professor, joǵary  sanatty pýlmonolog dáriger,  pýlmonologııa bóliminiń meńgerýshisi Olga Sımonova, pedıatr, nýtrısıolog Inna Sokolov, endoskopııalyq zertteýler bóliminiń meńgerýshisi  Maksım Lohmatov ótkizdi. Bul adamdardyń barlyǵynyń tájirıbesi, ǵylymı ataq-dárejeleri bar.

«Osynaý shara Ortalyqtyń pýlmonologııa bóliminiń 60 jyldyq mereıtoıyna arnalýymen mańyzdy. Bólimniń qurylýy men damýyna akademık Kamal Ormantaev, professor Kúlán Omarova, Mýnıra Baıjanova syndy basqa da mamandar úlken úles  qosty. Pýlmonologııa bóliminiń alǵashqy meńgerýshisi Ten Olga Denısovna boldy. Bólim qurylǵaly beri  mýkovıssıdozben aýyratyn balalarǵa erekshe kóńil bólinip, gendik aýrýlardy anyqtaý jaqsaryp keledi. Jańa emdeý tehnologııalaryn engizýdiń arqasynda naýqastardyń jaǵdaıy jaqsaryp, ómiri uzardy. Eger buryn mýkovıssıdozdy balalyq shaq kezdegi aýrý dep sanalsa, qazirgi tańda bul dertke shaldyqqan balalar eseıip, ǵumyrlary  uzaryp jatyr», deıdi Pedıatrııa jáne balalar hırýrgııasy ǵylymı ortalyǵynyń Dırektorlar keńesiniń tóraıymy Marııam Omarova.

«Pedıatrııa jáne balalar hırýrgııasy ǵylymı ortalyǵy» AQ Basqarma tóraǵasynyń ǵylymı-ınnovasııalyq qyzmetter jónindegi orynbasary Lıazat Manjýova: «Jyl saıyn aýrýhanada ártúrli bronh-ókpe patologııasy bar 600-den astam balaǵa kómek kórsetiledi, 200-den astam telemedısınalyq keńester júrgiziledi. Bizdiń mamandar elimizdiń barlyq aımaǵynda sheberlik sabaqtar, medısınalyq, konsýltatıvtik, ádistemelik kómek kórsetip keledi. Emdeý-dıagnostıkalyq jumystar halyqaralyq standarttarǵa saı joǵary deńgeıde júrgiziledi. Pýlmonologııa bólimi búginde jas mamandardy daıyndaıtyn jaqsy mektep bolsa, bizdiń Ortalyq respýblıka boıynsha balalar pýlmonologtaryn daıyndaıtyn bazaǵa aınaldy. Búgingi shara osy salany damytýǵa, kórkeıtýge óz úlesin qosady dep senemin», deıdi.

Eki kúndik  sharada  reseılik mamandar mýkovıssıdozdy emdeý men dıagnostıkalaý, ókpe asqynýlary, fızıoterapııa men targetti terapııa, durys tamaqtaný jáne mýkovıssıdozǵa shaldyqqan balalarǵa durys kútim jasaý boıynsha keńesterin berdi. Ekinshi kúni mamandar ortalyqtaǵy jáne aımaqtardan kelgen mýkovıssıdozben aýyratyn 6 balany qarap, emdeý is-sharalaryn birge talqylady.

Qazir Qazaqstanda resmı túrde mýkovıssıdozǵa shaldyqqan 173 naýqas tirkelgen. Sırek kezdesetin orfandyq aýrýlar múgedektikke, ómirdiń qysqarýyna alyp kelýi múmkin. Búgingi kúni sırek kezdesetin aýrýlardyń 7 myńnan astam túri belgili. Kóp jaǵdaıda bul genetıkalyq aýrý, alaıda sırek kezdesetin aýrýlar arasynda ınfeksııalyq, aýtoımmýndyq nemese ýytty sıpattaǵy aýrýdyń túrleri de bar. О́kinishke qaraı, sırek aýrýlardyń  paıda bolý sebepteri áli de qupııasyn tolyq ashpaı keledi. Aýrý belgileri týa sala, ıakı júre kele bilinýi múmkin. О́ıtkeni, sırek aýrýlardyń kópshiliginiń basty belgileri basqa aýrýlarǵa da uqsaıdy.