Qoǵam • 08 Aqpan, 2023

Tyń ıdeıa: úzdik bıznes jobalarǵa grant beriledi

QR Eńbek jáne halyqty áleýmettik qorǵaý mınıstrligi bıznes jobalardy iske asyrý úshin granttar alýdyń birinshi legine ótinim qabyldaý bastalatynyn málimdedi, dep habarlaıdy Egemen.kz.

Egemen Qazaqstan

Business.enbek.kz portalynda 2023 jyldyń 20 aqpanynan bastap 2021-2025 jyldarǵa arnalǵan kásipkerlikti damytý jónindegi ulttyq joba sheńberinde 1-lek boıynsha jańa bıznes-ıdeıalardy iske asyrý úshin memlekettik granttar alýǵa ótinimder qabyldaý bastalady. Joba boıynsha 2 577 adamǵa grant berý josparlanǵan.

Grant kólemi 400 AEK-ti, ıaǵnı 1 380 000 teńgeni quraıdy. Ár qatysýshy ony tek bir ret ala alady.

Granttar kásipker bıznesin ashyp ári qaraı damytyp, óz-ózin turaqty tabysben qamtamasyz etý maqsatynda beriledi.

О́tinim berý úshin:

Portalda tirkelý;
Grant alý sharttaryna sáıkestigine tekserýden ótý;
Bıznes-jospar úlgisin júktep alyp, ony toltyrý jáne portalǵa engizý;
О́tinish nysanyn toltyrý jáne ESQ kiltimen qol qoıý qajet.

Ǵalamtorǵa nemese kompıýterge qoljetimdilik bolmaǵan jaǵdaıda halyqty jumyspen qamtý ortalyqtary men halyqqa qyzmet kórsetý ortalyqtarynda ótinim berýge bolatnyn aıta ketken jón.

Jańa bıznes-ıdeıany iske asyrý úshin memlekettik grant alýǵa jumyssyz retinde tirkelgender, áleýmettik mártebesi bar (múgedektigi bar, qandas mártebesi bar, óńiraralyq qonys aýdarýshylar az qamtylǵan otbasy músheleri, kópbalaly otbasy múshesi, múgedektigi bar balany tárbıelep otyrǵan adam, asyraýshysynan aıyrylý boıynsha járdemaqy alýshylar) jeke kásipkerler úmitker bola alady.

Úmitkerdiń «Bastaý Bıznes» jobasy boıynsha kásipkerlik negizderine oqytý týraly 3 jyldan aspaıtyn merzimge sertıfıkaty bolýy tıis.

Rásimderdiń ashyqtyǵyn qamtamasyz etý, adamı faktordy azaıtý, ótinish berýshilerge yńǵaıly bolý úshin granttar berýdiń búkil prosesi elektrondyq formatqa aýystyryldy. Grant alýǵa ótinimderdi qabyldaý biryńǵaı tereze – «Business.enbek.kz» portaly arqyly júzege asyrylady.

Grant qarajatyna qajetti qural-saımandardy, eńbek quraldaryn, tehnologııalyq jabdyqtar men mal bastaryn, janýarlardy, qustardy, kóshetterdi, butalardy, tuqymdardy satyp alýǵa, oryn-jaılardy jalǵa alýǵa bolady.

Qarajat tutynýshylyq maqsattarǵa, kredıttik qaryzdardy óteýge, jyljymaıtyn turǵyn úı satyp alýǵa jáne salýǵa, jer ýchaskelerin satyp alýǵa, aksızdeletin ónimder óndirý úshin berilmeıdi.

Grantqa úmitkerlerdi arnaıy komıssııa tekserip, sheshim shyǵarady.

Komıssııa sheshimi úmitkerdiń portaldaǵy jeke kabınetine jiberiledi. Komıssııanyń oń sheshimi bolǵan jaǵdaıda úmitker bank derektemelerin usynady, shartqa qol qoıady jáne odan ári toqsan saıyn qarajattyń paıdalanylýy týraly esep beredi. Munyń bári elektrondyq formatta jasalatynyn eske sala keteıik.

Aıtolǵan JÚNISHAN,

L.N.Gýmılev atyndaǵy EUÝ stýdenti