EL JÁNE ELBASY
Meniń elektrondy poshtama túpqaraǵandyq jas oqyrmannan hat tústi. Taǵdyrdyń talqysyna tap bolǵan jas ómirine sán men mán bergen júrekjardy qýanyshyn jáne osy zor jańalyqqa sebepshi bolǵan Memleket basshysyna degen alǵysyn respýblıkalyq «Egemen Qazaqstan» gazeti arqyly jetkizýge kómektesýge ótinish bildiripti. Bir emes, birneshe jannyń sezimin arqalaǵan hatty, izgi ótinishti aıaqasty etpeı, qaz-qalpynda redaksııaǵa joldaýdy jón kórdim.
Gúlaıym ShYNTEMIRQYZY,
«Egemen Qazaqstan».
Qurmetti Elbasy Nursultan Ábishuly!
Bıylǵy Joldaýda Siz: «Árbir otandasymyzdyń júreginde elimizge degen sheksiz maqtanysh sezimin ornyqtyrdyq. Qazaqstandyqtar erteńine, eliniń bolashaǵyna senimmen qaraıdy. Halqymyz eldegi áleýmettik ahýaldyń turaqtylyǵyn jáne onyń jyl ótken saıyn jaqsara túskenin aıtady. Búginde Otanymyzdyń jetistikteri – árbir azamattyń ulttyq maqtanyshy», dedińiz. Ras, Táýelsiz Otanymyzdyń jetken jetistikteri – bizdiń ulttyq maqtanyshymyz. О́ıtkeni, bizdiń bolashaqqa degen josparymyzdyń oryndalýyna barlyq jaǵdaı jasaldy. Osylaı sóz bastap, Sizge rızashylyqpen, syr búkpeı ashyla hat jazýymyzdyń úlken sebebi bar, qurmetti Elbasy. Biz elimizdiń bas basylymy «Egemen Qazaqstan» gazeti arqyly jaqynda basymyzdan keshken baqytty oqıǵany О́zińizge baıan etýdi durys dep taptyq. Bizder Mańǵystaýdyń qarashańyraǵy sanalatyn Túpqaraǵan aýdanynda dúnıege kelip, taǵdyr tálkegimen balalar úıinde tárbıelengen jandarmyz. Bizder bir shańyraq astynda birlik pen berekede bolý degen sózderdi kishkentaıymyzdan sezinip qana emes, boıymyzǵa sińire erjettik. Bizder, Otanymyzdyń qamqorlyǵyn shyn baǵalaı bilemiz. Jasyryn emes, bizderdiń kámeletke tolǵannan keıingi ómirimiz úmit pen kúdikke toly bolady. Sebebi, balalar úıinen shyqqannan keıingi baspana máselesi biz úshin eń ózekti jaıtqa aınalady. Balalar úıiniń tóseginde jatyp: «О́skende kim bolamyn?» degen suraq sol úmit pen kúdiktiń arasynan ertip alyp, kókjıekterge talaı ret jetelep áketetin edi. Sonda, bizder memleketimizdiń qamqorlyǵynan qur qalmaıtynymyzdy sezetinbiz, soǵan senetinbiz. Sol sezim, qııalshyl balalyq ushqyr oı talaı armandarǵa bastaıtyn... Balalyq pák sezim men senim aldamapty. Dál búgingi kúni biz sol qamqorlyqtyń aıasynda baspanaǵa qol jetkizgen baqytty jandarǵa aınaldyq. Munyń bizder úshin qandaı qýanysh, qanshalyqty qymbat ekenin Siz bilesiz, jan-dúnıeńizben túsinesiz. Mańdaıymyzdan sıpap, jaǵdaıymyzdy jasar ata-anamyz bolmaǵanmen, týǵan elimiz, meıirban memleketimiz, eljandy Elbasymyz bar ekenin biz de bilemiz! Iá, biz baspanaly boldyq! Aýdanymyzdyń ortalyǵy Fort-Shevchenko qalasynan «Jumyspen qamtý-2020», «Qoljetimdi baspana-2020» baǵdarlamalary aıasynda boı kótergen jyly ári jaryq baspanaǵa árqaısymyz ıe boldyq. Osy qýanyshty, súıinshi habarymyzdy áýeli О́zińizben bóliskimiz keldi. Zor shattyqqa bólenýimizge jaǵdaı jasaǵanyńyzǵa myń alǵys! Sizdiń kezekti Joldaýyńyz: «Qazaqtyń Máńgilik Ǵumyry urpaqtyń Máńgilik Bolashaǵyn baıandy etýge arnalady. Endigi urpaq – Máńgilik Qazaqtyń Perzenti. Endeshe, Qazaq Eliniń Ulttyq Ideıasy – Máńgilik El!» degen jalyndy sózderińiz bizdi, tipti, qanattandyrdy. Erik-jigerimizge qýat qosty. Bizder úshin endigi alǵa qoıǵan maqsat, qajymaı – Otanymyzǵa eńbek etý, ony qorǵaý. Myń alǵys Sizge, Elbasy! Bul sózimdi «Jumyspen qamtý-2020» memlekettik baǵdarlamasy arqyly baspanaly bolǵan balalar úıinde tárbıelengen balalar jáne ata-ana qamqorlyǵynsyz qalǵan balalar atynan jazyp otyrmyn. Jaras QARAJANOV. Mańǵystaý oblysy, Túpqaraǵan aýdany.
«Prezıdent qamqorlyǵy men qoldaýyn tabıǵı apat kezinde de sezindik»
Maıra BOZOVA, kópbalaly ana:
Apat aıtyp kelmeıdi. Budan úsh jyl buryn júzdegen, myńdaǵan batysqazaqstandyq turǵyndar men otbasylar kútpegen jerden tabıǵı apatqa tap boldy. Sol jyly Oral qalasynyń mańaıy men oblystyń Zelenov jáne Tasqala aýdandary aýmaqtaryn kóktemgi tasqyn sý basyp qaldy. Osy kezde, álginde aıtqanymdaı, myńdaǵan turǵyn baspanalarynan aıyrylyp, qıyn kúı keshti. Árıne, dalada qalǵanymyz joq. Bizge ýaqytsha panalaıtyn oryndar usynyldy.
Eń bastysy – baspanasyz qalǵan joqpyz. Biz sekildi turmystyq deńgeıi tómen otbasylar men kópbalaly analarǵa úsh aıdyń ishinde kirse shyqqysyz, syńǵyrlaǵan jańa úıler salynyp paıdalanýǵa berildi.Tasqyn sý apatynan zardap shekkenderge arnalyp aýdan ortalyǵy irgesinen turǵyzylǵan bul turǵyn úı kesheni búginde «Munaıshy» shaǵyn aýdany dep atalady. Bul tamasha mekenjaıdan maǵan da bir úıdiń kilti tapsyryldy.
Baspanasyz qalý kez kelgen adamǵa materıaldyq turǵydan ǵana emes, sonymen birge, moraldyq-psıhologııalyq turǵydan da óte aýyr tıedi. Bárimiz de sol sátte osyndaı kúıreýik kóńil kúı aýanyn bastan keshtik. Osy kezde kóp keshikpeı Elbasy Nursultan Nazarbaevtyń batysqazaqstandyqtarǵa sóz arnap, tabıǵı apatqa tap bolǵan birde-bir otbasy dalada qalmaıtyny jóninde aıtqany bárimizge úlken dem berdi.
Sóıtip, 2011 jyldyń kókteminde Oral óńirinde Elbasynyń tikeleı tapsyrmasy boıynsha alyp qurylys alańdary qanat jaıdy. Bul asa jaýapty da kúrdeli, áleýmettik máni men mańyzy óte joǵary is ýaqytynda aıaqtaldy.Biter istiń basyna, jaqsy keler qasyna degendeı, kúzdegi mızam shýaǵy kezinde Nursultan Ábishulynyń ózi bizdiń aýdanǵa arnaıy kelip, qýanyshymyzdy bóliskenin eshýaqytta umyta almaıtyn shyǵarmyz.
Bizder dál sol kúni qos birdeı qýanysh seziminiń qushaǵynda júrgen edik. О́ıtkeni, eń alǵash Elbasy qamqorlyǵy men qoldaýyn tabıǵı apat oryn alǵan kezde sezinsek, budan keıin bizderge arnalyp jańa baspanalar salynyp, onyń paıdalanýǵa berilý rásimine Memleket basshysynyń ózi arnaıy kelgende qýanysh pen rızashylyqtan taǵy da júregimiz jarylyp kete jazdady.
О́z halqyna qashanda qamqor bola biletin, ony kóleńkesimen qorǵaı alatyn, el basyna kún týǵanda onyń qasynan tabylyp qoldaý kórsete alatyn kóshbasshysy men kósemi bar eldiń týy eshýaqytta jyǵylmaıdy dep bilemin.
Batys Qazaqstan oblysy,
Zelenov aýdany.
«Armanym – atyma laıyq azamat bolý»
Nursultan NAZARBAEV, stýdent:
О́zim oqıtyn Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń mashına jasaý fakýltetinde Nursultan Nazarbaev atty stýdenttiń bilim alatynyn alǵash estigende qatty tańdanatyndar az emes. Elbasymen attas stýdentpen júzdesip, áńgimeleskendi jón kóretinder de kóp kezdesedi. Jalpy, kezdesken adamnyń barlyǵy da esimime baılanysty kóp suraqtyń astyna alatynyn da jasyrmaımyn. Keı adamdar, tipti, senbeı de qalyp jatady.
Táýelsizdiktiń alǵashqy jyldary dúnıege kelgen nemeresiniń esimin Nazarbaı atam tuńǵysh Prezıdentimizdiń qurmetine ári halyqtyń qamyn oılaıtyn, el basqaratyn úlken azamat bolsyn dep yrymdap qoıypty. Osydan birneshe jyl buryn Aqtóbe qalasynan qonys aýdarǵan meniń otbasym qazir Oral qalasynda turady. Raıla, Bulbul esimdi apalarym, Ásem atty erke qaryndasym bar. О́zim týraly aıtqandy asa kóp unatpaımyn. Ázirshe aıtatyndaı úlken ister tyndyra qoımaǵanym da túsinikti bolsa kerek. Aıta ketetin nársem, sportqa jaqynmyn. Kúrespen, taekvondomen aınalysamyn.
El basyna kún týǵan almaǵaıyp zamanda qan maıdanǵa attanyp, keıin aman-esen elge oralǵan ardager atam bizden, nemerelerinen úlken úmit kútkeni aqıqat. El tizginin qolyna ustap, halyq amanatyn arqalaǵan Elbasymyzdyń esimine saı bolý zor jaýapkershilik júkteıdi. Úıdegi ata-anamnyń, ýnıversıtet qabyrǵasynda tálim beretin ustazdarymnyń úkilegen úmitin aqtap, egemen elimizdiń mańdaıaldy azamaty bolý úshin umtylyp baǵamyn.
ORAL.
«Elimizdiń erteńi – bilimdi jas»
Danııar ÝÁLIEV, «Jas Otan» jastar qanatynyń múshesi:
Táýelsiz Qazaqstannyń irgesin qalap, shańyraǵyn qurysqan aǵa býyn jasampazdyq estafetasyn jalyndy jalǵastyrýshy retinde óskeleń urpaqqa úlken senim artyp otyr. Iá, biz – úlken kúshke, zor áleýetke ıemiz. Elbasymyz «Qazaqstan joly–2050: bir maqsat, bir múdde, bir bolashaq» Joldaýynda elimizdiń erteńi jastardy zamanaýı ilim-bilimdi meńgerýge, halqymyzdyń ıgiligi jolyndaǵy uly maqsattarǵa belsene qatysýǵa shaqyrdy. Jas býynǵa qarata aıtqan «Bul Strategııa sizderge arnalǵan. Ony júzege asyratyn da, jemisin kóretin de sizder. О́z jumys oryndaryńyzda otyryp, osy jumysqa árqaısyńyz atsalysyńyzdar. Nemquraılylyq tanytpańyzdar», degen atalyq sózderi jigerimizdi janyp, asyl murattarǵa jeteleri sózsiz. Endi, mine, osydan jıyrma jyl buryn usynǵan onyń ıdeıasy is júzinde oryndalyp, elordamyz Astanada Eýrazııalyq ekonomıkalyq odaqty qurý jónindegi shartqa qol qoıyldy. Bul sharttyń mańyzdylyǵyn uǵyp, odaqtyń qyzmetin memleketimiz úshin tıimdi paıdalana bilý jastar aldyndaǵy zor mindetterdiń biri ekenin jaqsy túsinemiz.
Memleket basshysy Qazaqstannyń Táýelsizdigi eń basty qundylyq ekendigin únemi aıtyp júr. Sol sebepti de Máńgilik Elge aınalý, el ekonomıkasyn damytý, Jalpyǵa Ortaq Eńbek Qoǵamyn qalyptastyrý jolynda jasalyp jatqan batyl qadamdar bárimizdi qýantady. Elbasy ónerkásipti damytýda, ındýstrııalyq bazany, qýatty kadrlyq rezervti qalyptastyrýda, ıntellektýaldyq, mádenı áleýetti kúsheıtýde Eýrazııalyq ekonomıkalyq odaq jumysyn tıimdi paıdalana otyryp, bilimdi urpaq tárbıeleý kerektigin qadap aıtty. Al bilimi men biligi joǵary azamattardy tárbıeleý – árqaısymyzǵa júkteler basty mindet ekeni sózsiz. О́ıtkeni, bilim – ulttyń básekege qabilettiligin arttyrýdyń basty quraly.
Mektebimizde oqýshylardyń qazaq, orys jáne aǵylshyn tilderin jetik bilýine aıryqsha mán beriledi. Oqytý baǵdarlamasy oqýshylardyń synı oılaý, ózindik izdenis pen aqparatty tereń taldaý mashyǵyn meńgerýge baǵyttalǵan. Sondaı-aq, oqýshylardyń tehnıkalyq mamandyqtarǵa degen qyzyǵýshylyǵyn arttyrý maqsatynda kóptegen sharalar júzege asyrylyp keledi. Memleket basshysy 2050 jylǵa deıingi ekinshi jáne odan keıingi besjyldyqtarda mobıldi, mýltımedııalyq, nano jáne ǵaryshtyq tehnologııalar, robotty tehnıka, gendik ınjınerııa salalaryn damytý, bolashaqtyń energııasyn izdeý men ashýdyń negizin salý qajettigin atap kórsetken bolatyn. Osy talapqa oraı, elimizde robotty tehnıkanyń órkendeýine aıryqsha kóńil bólinip kele jatqanyn baıqaýǵa bolady. Bizdiń bul salada tabystarymyz, jańalyqtarymyz barshylyq.
Arnaıy úıirme uıymdastyryp, Qazaqstan ǵylymyna ózindik úlesin qosyp, áleýetin arttyratyn izbasarlar daıyndaý, olardyń ǵylymı jobalarǵa úzbeı atsalysyp, ǵylymǵa degen júıeli kózqarasyn qalyptastyrý jaıy tynymsyz izdenisti qajet etetini túsinikti. Shákirtterim Reseıdiń birqatar kórmelerine, baıqaýlaryna qatysyp, jeńispen oraldy. Olar «Mektep qabyrǵasynan – ǵylymǵa!» atty halyqaralyq ǵylymı-praktıkalyq forýmda jaqsy qyrynan tanylsa, Baıqońyr qalasynda ótken ǵaryshtyq zertteýler boıynsha H halyqaralyq ǵylymı dodada birinshi oryndy ıelendi. О́zim de Prezıdentimiz alǵa qoıǵan talaptar údesinen kórinýdi árkez basty maqsat sanaımyn. «Jas Otan» jastar qanatynyń sharalaryna belsene qatysamyn. Robotty tehnıka boıynsha LEGO Education b Instagram halyqaralyq konkýrsynyń, «Jastardyń kadrlyq rezervi» respýblıkalyq jobasynyń jeńimpazy boldym.
Aldaǵy ýaqytta úıirme músheleri óz ónimderin shetelge de shyǵarýdy maqsat etip otyr.
Petropavl.
«Memleket basshysy senim bildirgen ókildiń birimin»
Álııa BEKQOJIEVA,
Atyraý oblysy kásipkerler jáne jumys berýshiler odaǵynyń tóraıymy, oblystyq máslıhattyń depýtaty:
Elimiz táýelsizdik alǵan kezdegi ekonomıkalyq qıyndyqtar alynbaıtyn qamaldaı kórinýshi edi. Onyń ústine jalaqy men zeınetaqy, balalar járdemaqysy aılap berilmeı, zaýyttar, túrli kásiporyndar birinen soń biri bankrottyq qamytyn kıip, jumyssyzdyq órship bara jatty. Táýelsiz eldi basqarý tizginin qolyna alǵan Nursultan Nazarbaev osynaý shyrmaýyqtaı shyrmaǵan qıyndyqtardy buzyp-jara batyl iske kiristi. Burynǵysha el basqarý ádisin shıyrlamaı, aldymen Qazaqstannyń ekonomıkalyq áleýetin jahan jurtyna tanytý úshin álemniń biraz eline saparlady. Maqsaty – álemdik naryqta kósh bastaǵan alpaýyt kompanııalardy Qazaqstannyń keleshegine senýge, ekonomıkasyna qomaqty ınvestısııa salýǵa ılandyrý. Sóıtip, «Shevron» sekildi kóptegen kompanııalardy qolynan jetektegendeı etip, Qazaqstanǵa ınvestısııa salýǵa ákeldi.
Shyndyǵyn aıtqanda, Nursultan Nazarbaev «...aldymen – ekonomıka» saıasatyn ustanbasa, bizdiń táýelsiz elimiz búgingi qýatty damý bıigine kóterile almaǵan bolar edi. Shetel ınvestorlary Qazaqstan ekonomıkasyna ınvestısııa quıýmen birge, jańa dáýirdiń eń ozyq tehnologııalaryn kóptep ákeldi. Al shetel ınvestorlaryna san alýan servıstik qyzmetter kórsetetin, san alýan otandyq ónimder shyǵaratyn kásiporyndar qurylyp, búginde elimizdiń ár óńirinde kásipkerliktiń keń tynysy ashyldy. Munyń bári biz úshin aıtýǵa ǵana jeńil bolǵanymen, Nursultan Ábishuly úshin áste ońaı bolmaǵanyn bilemiz. О́ıtkeni, memleket basqarý, ásirese, shıkizattyq resýrsynan ózge jańa tehnologııamen jabdyqtalǵan zaýyt, fabrıkalary bolmaǵan Qazaqstandaı kópetnosty, ári táýelsizdigin endi ǵana qolyna alǵan jas memleketti ekonomıkalyq órkendeýdiń dańǵyl jolyna túsirip, eńsesin tikteý isine ekiniń biriniń batyly bara bermeıdi.
Qazir táýelsizdiktiń eleń-alań shaǵyndaǵy qıyndyqtyń bári kórgen tús sekildi. El ekonomıkasynyń ár salasy yrǵaqty damý ústinde, jyl saıyn jumys oryndary kóptep ashylýda. Qurylys ındýstrııasy keń qanat jaıdy. Nursultan Nazarbaev tek ekonomıkany ǵana órkendetip qoımaı, qazaq eliniń ilim-bilimge qushtar jastarynyń álemniń ár elinde alańsyz bilimin jetildirýine jaǵdaı jasady. Jańa dáýirdiń tynysyn sezgen Tuńǵysh Prezıdentimiz Qazaqstannyń elordasyn Astanaǵa kóshirýge de batyl qadam jasady. Astananyń erekshe sáýlettik pishinmen damýy elimizdegi soltústik óńirler ekonomıkasyn jańasha qarqynmen órkendetýge tyń serpin berip qana qoımaı, ózge de oblystar ortalyqtarynyń jańa elordaǵa qarap, boı túzeýine yqpal etti.
Nursultan Nazarbaevtyń táýelsiz Qazaqstandy álemdegi básekege qabiletti 30 eldiń biri deńgeıine jetkizýdegi tabandylyǵyna ár kez tánti bolyp kelemiz. Sol sebepten de Elbasynyń alǵash Prezıdent saılaýyna túsken kezinen beri senim bildirgen ókili bolyp kelemin. Nursultan Ábishulyndaı kóshbasshylyq, kóregendilik qasıetimen El dep emirene eńbek etýdi paryz sanaǵan Erge senimdi ókil bolǵanymdy udaıy maqtan tutamyn. Tuńǵysh Prezıdentimizdiń erekshe bir qasıeti – ár óńirdiń kásipkerlerin, bir kórgen adamyn umytpaı, únemi jaǵdaıyn surap, oryndy ázilimen baýrap júredi. Atyraýǵa kelgen ár saparynda «Álııa, amansyń ba? Atyraý kásipkerleriniń jaǵdaıy qalaı? Kásipterińdi damytýda kezdesetin qandaı kedergi bar?» dep jylyushyraı áńgimege tartady. Biz de Nursultan Ábishulyn qamqorshymyzdaı, qoldaýshymyzdaı sezinip, únemi arqa tutyp júremiz. О́ıtkeni, Elbasy elimiz táýelsizdik alǵan sátten bastap kásipkerlerge zor qoldaýyn bildirip, kezeń-kezeńmen kásipkerlikti zańsyz tekserýge moratorıı jarııalap keledi. Bul kásibin násibim dep uǵynatyn, sóıtip, jańa jumys oryndaryn ashyp, el ekonomıkasynyń órkendeýine laıyqty úlesin qosý ústindegi kásipkerlerdiń jańa bıikterdi baǵyndyrýyna septigin tıgizip otyr.
Atyraý oblysy.
«El berekesiniń kepili»
Aıagúl MIRAZOVA,
Y.Altynsarın atyndaǵy №159 gımnazııa dırektory,
Qazaqstannyń Eńbek Eri:
Bul kúnderi aǵalyq dáýirden asyp qalǵan urpaqtyń kóz aldynda osydan bar bolǵany 23 jyl buryn Keńes Odaǵy ydyrap, onyń quramyndaǵy respýblıkalar egemendikterin jarııalady. Qazaqstan da arman bolǵan Táýelsizdikke qol jetkizdi. Qazirde jarqyn tarıhymyz bolyp tabylatyn sol kúnder týraly aıtý jeńil, al, shyn máninde, ol kezde dúnıege jańa kelgen sábıdeı kúıde edik.
Alaıda, sábı – alańsyz jaratylys. Ony qorektendiretin anasy bar, pana bolatyn ákesi bar. Al egemen bolǵan elge sheshe bolatyn da, áke bolatyn da eshkim joq. Bárin ózi jasap, ózi taýyp, ózin-ózi asyraýy, qorǵaýy kerek. Odaq buzylǵan soń, búkil Odaq boıynsha bir-birimen tyǵyz baılanysqan ekonomıka da, eldi qarjylandyrý júıesi de, halyq ómirin qamtamasyz etý de, óndiris te, saýda da, ǵylym da, tehnıka da, mádenıet te – bári-bári buzylyp, kúretamyrlar qıylyp qalǵanyn bárimiz bilemiz.
Mine, osyndaı kók tıynsyz qalǵan memlekettiń ózine de, onyń halqyna da durys jol taýyp, durys júıe quryp, durys baǵytqa salyp, durys bastaı bilý kerek. Bulardy aıtyp otyrǵan sebebim, sol bir syndarly, asa qıyn da kúrdeli shaqta Qazaqstan Respýblıkasynyń Tuńǵysh Prezıdenti Nursultan Ábishuly Nazarbaev eline sara jol taýyp berip, halqyn tez arada-aq aıaqtandyryp, óz qolyn óz aýzyna jetkizip, aman-esen saqtap, álemdegi damýshy elder qatarynan da ozyq qarqyndaǵy memleketke aınaldyrdy.
Osyny aıtý arqyly el Prezıdenti Nursultan Ábishuly Nazarbaevtyń osynaý teńdessiz tarıhı eńbeginiń qudirettiligin kóz aldymyzǵa kishkene ǵana elestetsem dep edim.
«Baǵalaı bilgenge baq turaqtaıdy, qadirleı bilgenge qut turaqtaıdy», deıdi dana halqymyz. Táýelsizdigimizdiń birinshi kúninen bastap respýblıkany kemeńgerlikpen basqaryp kele jatqan Elbasynyń danalyǵyn laıyqty baǵalaı bilý de, qurmettep, qadirleı alý da azamattyǵymyzǵa – syn. Shúkirshilik, Qazaq elin jatsynbaı, qazaq halqynyń meıirbandyǵyna baýyrmaldyqpen jaýap berip, bir kisiniń balasyndaı ómir súrip jatqan, respýblıkamyzdy ortaq Otanym dep tanyp, onyń kemeldenýine aıanbaı úles qosyp otyrǵan júzden asa ulys ókilderiniń tatý-tátti dáýreni – Elbasynyń tarazy basyn teń ustaıtyn sarabdal saıasatynyń danalyǵy ekenin álem baǵalaýda, tórtkúl dúnıe úlgi tutýda.
О́zim eńbek etetin bilim berý salasy da ózge salalar sııaqty memleketimiz damýynyń jemisi. Ol qanshalyqty kúrdeli bolsa, sonshalyqty qymbat. Elimizdiń kúsh-qýatynyń halyq ıgiligine jumsalyp, áleýmet múddesine qyzmet etetininiń aıqyn bir aıǵaǵy. El ómiriniń basqa salalary sııaqty bilim berý salasynyń da álemdik damý talaptaryna saı órkendeýin Elbasy qalt jibermeı jiti qadaǵalap, únemi qamqorlyq basshylyǵymen serpin berip otyrady.
Prezıdenttiń bıylǵy Joldaýy Jalpy Eýropa biliktilik standartyna (EBS) saı quzyretti tulǵa qalyptastyrýdyń joldaryn aıqyndaıdy. Bul oraıda, Elbasy jalpy bilim beretin mektepterimizdi Nazarbaev zııatkerlik mektepteri deńgeıine jetkizýge baǵdarlaıdy.
Osy tusta EBS-tyń basty-basty segiz biligin eske sala ketý artyq bolmaıdy dep oılaımyn. Olar: ana tilinde qarym-qatynas jasaı bilý; shetel tilderinde qatynas jasaı bilý; elementarly matematıkanyń daǵdylaryn jáne ǵylym men tehnologııada biligin tanyta bilý; dıjıtaldy-aqparattyq biliktilikti kórsete bilý; oqý iskerligi, tulǵaaralyq, mádenıetaralyq, áleýmettik jáne azamattyq biliktilikterdi kórsete bilý; kásipkerlik daǵdylaryn tanyta bilý; álemdik jáne ulttyq mádenıet negizinde qundylyqtardy qalyptastyra bilý («21 ǵasyr pedagogıkasy mektep tabaldyryǵynda», A.A.Jaıtapova, G.A.Rýdın jáne t.b.).
Bir sózben qarapaıymdap aıtqanda, Elbasy bilim berýdegi negizgi maqsat ulttyq, adamgershilik beınesin saqtaı otyryp, ómir súre bilýge úıretý ekenine nusqaıdy. Bul jol ári qoǵam talabyna ári árbir tulǵanyń turmys sapasyn kóterý múddesine saı keledi. О́zgermeli ómirge sáıkes quzyretti tulǵa qalyptastyrý keleshek urpaq aldyndaǵy, ultymyzdyń bolashaǵyn kemeldendirý aldyndaǵy mindetimiz ekenine Elbasy kózimizdi jetkizýde.
«Han – halqynyń uly, bı – ádildik quly», deıdi halqymyz. Ádildiktiń, erkindiktiń, el berekesiniń kepili bolyp tabylatyn Elbasy, Tuńǵysh Prezıdent Nursultan Nazarbaevtyń týǵan kúnine oraı halqynyń uly bolyp otyrǵan mártebesin kóppen birge tanýdy ult aldyndaǵy paryzym dep bilemin. Kóregen basshy eldi ósiredi, kúshti maıdan erdi ósiredi degendeı, álemdegi eń damyǵan 30 eldiń qataryna enýge umtylys maıdanynda elimizdiń órkendeýine, onyń erleriniń óskenine Elbasymen bir sapta qatysýdan, ony kórip baǵalap, qadirine jetýden artyq baqyt bar dep oılamaımyn.
ALMATY.
«Elbasy eki kompıýter syılap edi»
Nurqanat QIIаQBAEV, A.Pýshkın atyndaǵy orta mekteptiń 10-synyp oqýshysy:
Men alys aýylda turamyn. Ákem Elaman aýyl klýbynda ádisker bolyp jumys isteıdi, anam Anargúl «Qazposhta» AQ aýyldyq bólimshesinde eńbek etedi. О́zim bıyl onynshy synypty bitirdim. Otbasynda bıyl mektep bitirgen apam jáne kishkentaı qaryndasym bar.
Men – Elbasy Nursultan Nazarbaevtyń tikeleı qamqorlyǵyn kórgen kóp balanyń birimin. Ony maqtan tutamyn jáne Elbasynyń bala dep qaramaı, ótinishimdi jerge tastamaǵanyna rızashylyǵymdy bildiremin. Bul bir aıaq astynan oıyma kelgen is boldy. Ol kezde Elbasy kim, onyń el ómirindegi tarıhı róli qandaı degenge oı jiberetin jasta emes edim. Alaıda, elden «Prezıdent tikeleı efırde sóıleıdi, halyqtyń suraqtaryna jaýap beredi», degendi estip qandaı suraq qoısam eken dep qııaldaǵanym ras. Sóıtip, sol kezde aýyldyq jer úshin qat dúnıe – kompıýter surasam qaıtedi degen oı sanama sap ete qaldy. Biraq, ata-anama tis jaryp, eshteńe aıtpadym, olardyń qarsy bolatynyn túsindim.
Úıdegiler túski asqa otyrǵanda telefon shaldym, bir qyz kóterdi tutqany. Shamasy, jaýapty adam bolsa kerek. Men ákemniń azǵantaı aılyǵy kompıýter alýǵa jetpeıtinin, anamnyń sol kezde jumyssyz ekenin, otbasymyzda apam men qaryndasym bar ekenin jetkizip úlgerdim. Prezıdentten kompıýter alýǵa kómektesýin ótindim. Sol boıda ata-anama ne istegenimdi jetkizdim, olar senbedi. Men de bildeı bir eldi basqaryp otyrǵan Prezıdent alys aýylda jatqan oıyn balasynyń ótinishine kóńil aýdarady dep senimdi bola qoıdym desem, artyq bolar edi.
Qyzyq bolǵanda, 2009 jyly jeltoqsanda Prezıdenttiń atynan bir emes, eki kompıýter kelgende Elbasynyń asqan meıirban adam ekenine kózimiz jetti. Meniń kishkentaı júregimdi terbegen armanymnyń oryndalýyna úlken basymen mán berip, el basqarýdaǵy san taraý jumystarynyń arasynda ýaqyt taýyp, kóńil bólgen, bizdiń otbasymyzdy qýanyshqa bólegen Memleket basshysy Nursultan Nazarbaev kókeme alǵysym sheksiz. Elbasy syılaǵan eki kompıýter – bizdiń otbasymyzdaǵy eń baǵaly dúnıe, qundy eskertkish.
Qazir Elbasy týraly oıym keńeıdi. Qazaqstan halqynyń baqýatty turmysyn, tatýlyǵy men birligin qamtamasyz etip otyrǵan sarabdal saıasaty úshin, «Máńgilik El» bolý baǵytyndaǵy is-qımyldary úshin Elbasy Nursultan Nazarbaevqa degen rızashylyǵymyz sheksiz. Jyl ótken saıyn aýyldyń da ajary kirip, turmysy túzelip keledi. Men Elbasynyń qamqorlyǵyn kórgendigimdi ózime baqyt sanaımyn jáne ony oryndy maqtanysh tutamyn. Sondyqtan da jaqsy oqyp, joǵary oqý ornyna túsip, temirjolshy bolsam dep armandaımyn. Men Elbasynyń senimin aqtap, ózim qalaǵan mamandyq alyp, elimniń erteńine eleýli úles qosýǵa talaptanyp júrmin.
Prezıdenttiń alys aýyl balasyna degen osyndaı qamqorlyǵynyń ózi Nursultan Ábishulynyń jany jumsaq, halqynyń qamyn oılaıtynyna naqty dálel ekeni sózsiz. Bul meni jańa bıikterge umtyldyrady.
Aqtóbe oblysy,
Baıǵanın aýdany,
Altaı aýyly.
