Bul týraly Almatyda ótken «Transkaspıı halyqaralyq kólik baǵdary» (THKB) Halyqaralyq qaýymdastyǵy Jalpy jınalysynyń otyrysynda aıtyldy. Marshrýt qatysýshylary qaýymdastyqtyń 2022 jylǵy qyzmetin qorytyndylady. THKB boıynsha tasymaldaýdyń oń qarqyny jáne onyń qazirgi geosaıası jaǵdaıdaǵy róliniń artqany atap ótildi.
2022 jyly júk tasymaldaý kólemi aıtarlyqtaı ósip, kólemi 2 tonnaǵa taıap ta qaldy. Bul rette otandyq júk eksporty 2021 jylmen salystyrǵanda 6,5 ese ulǵaıyp, 891 myń tonnany quraǵan. Sonymen qatar konteınerlerde 33,6 myń jıyrma fýttyq ekvıvalent tasymaldanypty. Bul ótken jyldyń sáıkes kezeńimen salystyrǵanda 33 paıyzǵa artyq.
2023 jylǵa arnalǵan marshrýt boıynsha júkterdi tasymaldaý kólemin ulǵaıtý, turaqty túrde shattl-poıyzben bekitilgen keste boıynsha júrý jáne biryńǵaı tranzıttik ónimdi qurý máseleleri boıynsha ýaǵdalastyqtarǵa qol jetkizildi.
Transkaspıı halyqaralyq kólik baǵyty (THKB) Qytaı, Qazaqstan, Kaspıı teńizi akvatorııasy, Ázerbaıjan, Grýzııa, Túrkııa jáne Qara teńizi arqyly Eýropa elderine ótedi. «THKM» qaýymdastyǵy músheleriniń qatarynda temirjol ákimshilikterin, porttardy, 8 memlekettiń keme jáne logıstıkalyq kompanııalaryn qosqanda, 20 kompanııa bar.
Jalpy, 2025 jylǵa qaraı osy kólik dáliziniń kómegimen tasymaldanatyn júk kólemin 10 mln tonnaǵa jetkizý jospary bar. Buǵan deıin Transkaspıı baǵytyna qatysy bar memleketter – Qazaqstan, Ázerbaıjan, Túrkııa jáne Grýzııa memleketteriniń syrtqy ister, sondaı aq kólik máselelerine jaýapty mınıstrleri bas qosyp, naqty is-qımyldar aıqyndalǵan jol kartasyna qol qoıǵan bolatyn. Taraptar aldaǵy bes jylda ózderine qatysty aýmaqta porttardy keńeıtip, belgilengen jobalardy júzege asyrýdy kózdep otyr.
