Túrkııanyń Ádilet mınıstrligi jer silkinisine baılanysty qylmystardy tergeý úshin arnaıy bólimder ashty. Bul týraly Túrkııanyń vıse-prezıdenti Fýat Oktaı málimdedi.
Onyń aıtýynsha, ǵımarattardy salý erejelerin buzǵan 131 adam anyqtaldy. Ǵımarattar talapqa saı salynbaǵandyqtan, jer silkinisi kezinde qırap qalǵan. Vıse-prezıdenttiń aıtýynsha, kúdiktilerdiń biri qamaýǵa alynyp, taǵy 113 adamdy qamaýǵa alý týraly buıryq berilgen.
Sońǵy málimetter boıynsha, jer silkinisi saldarynan qaza tapqandar sany 33 myńnan asty. Tek Túrkııada apattan 6500 ǵımarat qıraǵan. Oqıǵa ornynda 32 071 izdeý-qutqarý toby jumys istep jatyr. Túrkııa prezıdenti Rejep Taıyp Erdoǵan bundaı jer silkinisi 1939 jyldan beri bolmaǵanyn aıtty. Eldiń on provınsııasynda tótenshe jaǵdaı rejımi jarııalandy.
