Joba «Samuryq-Qazyna» AQ kompanııalar tobynyń biryńǵaı qaıyrymdylyq operatory – «Samruk-Kazyna Trust» áleýmettik jobalardy damytý qorynyń qoldaýymen júzege asty. «Samuryq-Qazyna» kompanııalar tobyna, Qazaqstannyń basqa óńirlerindegi júıequraýshy kásiporyndar sııaqty, jergilikti «Embimunaıgaz» AQ, «Atyraý munaı óńdeý zaýyty» JShS jáne taǵy basqa da óndiris mekemeleri kiretini belgili.
«Embimunaıgaz» kompanııasy iri munaı kásiporny retinde óziniń el aldyndaǵy áleýmettik jaýapkershiligin tereń sezinedi. Osy oraıda «Samruk-Kazyna Trust» áleýmettik jobalardy damytý qorynyń qoldaýymen aımaǵymyzda qolǵa alynǵan «Áreket» jobasynyń búgingi nátıjesi bárimizdi qýantyp otyr. Sebebi barsha «Samuryq-Qazyna» AQ kompanııalar tobynyń atynan kórsetilgen qoldaýdyń arqasynda úıde otyrǵan atyraýlyq 100 jumyssyz áıelge óz kásibimen aınalysyp, tabys tabýyna múmkindik berildi. Tipti jalǵyzbasty, kópbalaly analar, erekshe bala tárbıeleýdegi 30-dan astam názik jannyń qazirdiń ózinde sharýasyn bastap áketkeni eriksiz súısindiredi!», dedi joba túlekterine sertıfıkattar tabystaý rásiminde «Embimunaıgaz» AQ Basqarma tóraǵasynyń orynbasary Rysty Tasmaǵambetova.
О́ńirdegi Isker áıelder qaýymdastyǵy muryndyq bolǵan, ótken jyly bastaý alǵan joba barysynda jumyssyz áıelderge qarjylyq táýelsizdigin qamtamasyz etý maqsatynda tegin oqytý kýrstary uıymdastyrylyp, túlekterge shaǵyn bıznesterin ashýǵa kómek kórsetildi.
Shalǵaıdaǵy aýyl turǵyndaryn, onyń ishinde Qurmanǵazy, Isataı, Inder, Mahambet, Jylyoı, Maqat, Qyzylqoǵa aýdandaryn, sondaı-aq Erkinqala, Keńózek, Almaly, Damba, Aqsaı, Qaıyrshaqty eldimekenderin jáne Atyraý qalasynyń qamtyǵan bastamaǵa «Samuryq-Qazyna» kompanııalar toby atynan 48 mln teńge qarjy bólindi.
Jobaǵa qatysýshylar «Tigin», «Aspazdyq sheberlik», «Kondıterlik is», «Shashtaraz» jáne «Tazalaý qyzmetteri» boıynsha teorııalyq bilim alǵannan keıin, is júzinde tájirıbeden ótti. Atap aıtsaq, aspazdar «Aru Plaza», «Star» meıramhanalarynda, kondıterler «Take the Cake Studio» kondıterlik sehynda, tiginshiler «DART LUX» tigin sehynda, shashtarazdar «ADIA» salonynda jáne klınıng qyzmetin úırenýshiler «V pomosh hozıaıke» klınıngtik qyzmet kompanııasynda ár kásiptiń qyr-syryn meńgerdi.
4 aptalyq oqý kýrstaryna qosymsha 2 apta «Kásipkerlik daǵdylardy oqytý», «Kontent jáne SMM – áleýmettik jelilerdi damytý», «Sheshendik óner, kópshilik aldynda sóıleý daǵdylary» boıynsha kýrstar ótkizildi. Sonymen qatar joba túlekterine 2 aı boıy tálimger jetekshileri birge júrip, qoldaý kórsetedi.
Joba túlekteri ıgi isti qoldaǵan «Samuryq-Qazyna» kompanııalar tobyna alǵysyn bildirdi. «Samruk-Kazyna Trust» bas dırektory Alfııa Adıeva bastaǵan top birneshe anaǵa granttardy úıine nemese joba arqasynda ornalasqan jumys ornyna baryp tabystady.
«Jubaıym jumystan shyǵyp qalyp, úıdiń ıpoteka bereshegi moınymyzda qalyp qoıdy. Ákimdik úıimizge qarap, bári jaqsy ǵoı degenge keltiredi. Biraq balam da múmkindigi shekteýli, synaqqa tózip otyrmyz. Qaryzǵa kirip, qatty qınalǵan edik, myna joba eńsemizdi kóterdi, úmit syılady», dep bólisti joldasy II top múgedegi Aqbota О́tepbergenova shańyraqtaryna kelgen qutty qonaqtarmen.
5 balanyń anasy Aqbota Aldasheva, búgingi tańda, shashtaraz oqýyn aıaqtaǵan soń sulýlyq salonyna turaqty jumysqa ornalasyp otyr.
«Áleýmettik jelide oqyrman jınaýdyń qyr-syryn meńgerdim. Tipti tálimgerler qalaı sóılep, júrip-turýdy úıretti. Osyndaı qadamdardyń jemisinde klıentter paıda bolyp, túrli ıdeıalardy iske asyryp otyrmyn», dep jańalyqtaryn jetkizdi ol grant tabystaýshy tarapqa.
Oqýdy aıaqtaǵan 100 túlekke taýar túrindegi granttar beriledi. Búgingi tańda tigin oqý kýrsyn bitirgen 4 ana, shashtaraz kýrsyn támamdaǵan 5 ana, klınıngtik qyzmet meńgergen 3 ana, aspazdyq sheberligin shyńdaǵan 2 ana turaqty jumysqa ornalasty. Sonymen qatar 20 ana óz kásibin úı jaǵdaıynda ashyp úlgerip, ony damytyp otyr.
