ASTANA. 19 maýsym. Búgin tún ortasy aýa V tobyndaǵy Ispanııa jáne Chılı quramalary arasyndaǵy oıyn oınalyp bitti. Match 2:0 esebimen chılılikterdiń paıdasyna sheshildi. Bul týraly egeven.kz habarlady.
Ispanııa – Chılı 0:2 (0:2).
18 maýsym. Rıo-de-Janeıro. «Marakana» stadıony. 74 101 kórermen. Tóreshi – Mark Geıger (Chılı).
Ispanııa: Iker Kasılıas, Sesar Aspılıkýeta, Serhıo Ramos, Havı Martınes, Hordı Alba, Habı Alonso (Koke, 46), Serhıo Býskets, Davıd Sılva, Andres Inesta, Pedro (Santı Kasorla, 76), Dıego Kosta (Fernando Torres, 64).
Chılı: Klaýdıo Bravo, Maýrısıo Isla, Gonsalo Hara, Garı Medel, Eýhenıo Mena, Charlz Arangıs (Felıpe Gýterres, 64), Fransısko Sılva, Artýro Vıdal (Karlos Karmona, 88), Marselo Dıas, Edýardo Vargas (Horhe Valdıvııa, 85), Aleksıs Sanches.
Goldar: Edýardo Vargas (20), Charlz Arangıs (43).
Eskertýler: Habı Alonso (41) – Artýro Vıdal (26), Eýhenıo Mena (61).
Osy jeńilisimen birge, álem chempıony Ispanııa quramasy óziniń ókilettigin merziminen buryn toqtatty. Munymen qosa, Eýropanyń chempıony degen de ataǵy bar komanda mýndıaldy abyroısyz aıaqtady. Birinshi oıynynda Gollandııa fýtbolshylarynan 1:5 esebimen oısyraı utylǵan «qyzyl fýrııa» bul oıynda sol joly alǵan aýyr soqqydan áli esin jınaı almaı júrgen adamnyń keıpin kórsetti. Ol quddy bir osynyń aldyndaǵy oıynǵa bar kúsh-qýatyn sarqa jumsap qoıǵandaı áser etti. Buǵan qaraǵanda, chılılikter keskekti kúreske birshama daıyn bolyp shyqty. Olar ıspandardyń burynǵydaı dopty erkin meńgerýlerine jol bermedi, bul úshin pressıngti qatty paıdalandy, aýmaqtardyń bárin jaýyp tastap, qarsylasyn óz mánerimen oınaýǵa májbúr etti. Alańdaǵy oqıǵanyń bulaı órbýine ıspannyń myqty degen fýtbolshylarynyń ózi kedergi keltire almady.
Jalpy, Chılı quramasynyń oıynshylary ejelden ózderi keremet bir jarqyrap kórinbegenderimen, qaısybir qarsylasyna batyl toıtarys berýge kelgende alǵan betinen qaıtpaıtyn bolyp kelýshi edi, bul joly olar sol qaısarlyqtaryn shyrqaý shyńyna jetkizdi. Sóıtip, birinshi taımnyń ózinde kezdesýdiń taǵdyryn tolyq derlik sheship qoıdy. Bul komanda birinshi oıynda Avstralııa quramasyn da emin-erkin utyp shyqqan. Sondyqtan osy matchtyń aldynda jeńistiń Chılıdi kelesi kezeńge ótkizip, Ispanııany merziminen buryn jarys jolynan shyǵaryp tastaıtyny anyq belgili boldy.
Aıta ketýimiz kerek, bul qarsylastardyń buǵan deıingi kezdesýlerinde Chılı komandasy buryn bir ret jeńip kórmepti. Munyń aldyndaǵy, 2010 jylǵy álem chempıonatynda Ispanııa 2:1 etip utqan eken. Sodan keıin olar eki ret joldastyq kezdesý ótkizipti. Olardyń birinde ıspandar taǵy da utsa (3:2), ekinshisi teń (2:2) nátıje ákelipti.
Mýndıaldaǵy sóz etilip otyrǵan matchty chılılikter óte belsendi bastady. Aldymen Artýro Vıdal dop alyp, ony qarsy qaqpa jaqtaǵy Edýardo Vargasqa jetkizdi. Al shabýylshynyń soqqysynan keıin dop torǵa baryp top etýdiń sál ǵana aldynda qaldy. Osydan keıin berilgen buryshtamadan tastalǵan dopty Gonsalo Hara qaqpaǵa baǵyttaýǵa umtyldy. Biraq soqqysy dál bolmady. Munyń sońyn ala ıspandar qarsylastarynyń ekpinderin basyp, oıyn tizginin qaıtaryp alýǵa talasyp baqty. Sol maqsatta birer ret alǵa shapqylady. Alaıda, Klaýdıo Bravo qorǵaǵan qaqpa mańyna jaqyndap bara almady. Bul tusta olar tym jaıbaraqat qımyldady, oıyndarynda oılylyq pen tapqyrlyq jetispedi. Shırek saǵattyń shamasynda álem chempıondary qaqpaǵa jaqyn tustan aıyp dobyn urý múmkindigin aldy. Sol kezdegi Habı Alonsonyń soqqysyn chılılikter tez qaıtardy. Eýropalyqtar budan keıin qaýyrt joryqqa uqsaıtyn shapqyn uıymdastyrdy. Sonyń áletinde Dıego Kosta oń qanattan quıǵytty. Biraq onyń kólbeýlete jibergen dobyna áriptesterinen eshkim ıe bola almady. Ispandar shabýyldy taǵy jalǵastyrmaq bolǵanda, ofsaıdqa túsip qaldy.
Osydan keıin chempıondardyń páti qaıtyp qalǵandaı boldy. Munymen de tynbaı, olar ońdy-soldy qatelikter jibere bastady. Solardyń birinde ıspandar alańnyń ortasynda kútpegen jerden doptan aıryldy. Ony ile qashqan Chılı fýtbolshylary bir-birine tez qaqpaqyldap jetkize otyryp, qarsy aıyp alańynan bir-aq shyqty. Kombınasııany bastaǵan Vıdal edi, jalǵastyrǵan Charlz Arangıs pen Vargas boldy. Bulardyń sońǵysy áriptesi bergen dopty qaqpashy Iker Kasılıastyń janynan qaqpaǵa tastaı saldy – 1:0! Al taımnyń sońynda Alonso óz aıyp alańy mańynda tártip buzdy. Oǵan belgilengen aıyp dobyn Aleksıs Sanches «qabyrǵalyqtan» asyra urdy. Týralaı barǵan dopty Kasılıas keri qaıtaryp úlgerdi. Biraq dop Arangıstiń aıaǵyna baryp tura qaldy. Jaǵdaıdy tez paıymdaǵan Charlz sosyn kidirmesten qaqpaǵa qaraı qaıtadan baǵyttady. Gol! Osymen esep 2:0-ge jetti. Sóıtip, 20 jáne 43-mınýttarda gol jiberip alǵan Ispanııa quramasy sheshýi qıyn jumbaqtyń qoınaýyna qoıdy da ketti. Olar bul túıindi ekinshi taımda da tarqata almady. Chempıonnyń ókilettilikten aıyrylý oqıǵasy osylaı órnekteldi.
Damır Qojamqul.
Derekkóz: Chempıonat.Rý.
Foto: Sportbox.ru.
