ASTANA. 19 maýsym. Búgin tún ortasy aýa A tobyndaǵy Kamerýn jáne Horvatııa quramalary Manaýs qalasynda ekinshi týrdyń oıyndaryn ótkizdi. Match 4:0 esebimen horvattardyń jeńisimen aıaqtaldy. Bul týraly egeven.kz habarlady.
Kamerýn – Horvatııa 0:4 (0:1).
19 maýsym. Manaýs. «Amazonııa» stadıony. 39 982 kórermen. Tóreshi – Pedrý Proensa (Portýgalııa).
Kamerýn: Sharl Itandj, Stefan Mbıa, Orelen Shedjý (Danı Nýnkeý, 46), Nıkolıa Nkýlý, Benýa Assý-Ekotto, Aleksandr Song, Joel Matıp, Eıong Eno, Erık Shýpo-Motıng (Edgar Sallı, 75), Vensan Abýbakar (Per Vebo, 70), Bendjamın Mýkandjo.
Horvatııa: Stıpe Pletıkosa, Darıo Srna, Vedran Chorlýka, Deıan Lovren, Danıel Pranıch, Ivan Rakıtıch, Lýka Modrıch, Ivan Perıshıch (Ante Rebıch, 78), Sammır (Mateo Kovachıch, 72), Ivısa Olıch (Edýardo, 69), Marıo Mandjýkıch.
Goldar: Ivısa Olıch (11), Ivan Perıshıch (48), Marıo Mandjýkovıch (61, 73).
Eskertýler: Aleksandr Song (40) – Edýardo (86).
Áý bastan kvartettegi aýtsaıder sanalǵan Kamerýn quramasy sol boljamnyń beker emes ekenin birden bildirip, týrnırdiń ekinshi matchynan keıin-aq pleı-off shaıqastaryna shyǵý quqyǵynan aıryldy. Eger «asaý arystandar» munyń aldynda Meksıkamen ótken matchta Dıego Dos Santostyń eki golyn sanamaı tastaǵan tóreshiniń júgensizdigi arqyly ǵana qarsylasyna oıyn sońyna deıin qarsylasyp baqsa, Horvatııamen kezdesýde ekinshi taımnyń basynan bastap, shylparadaı shashylyp qaldy. Biraq Fınkeniń komandasy oıyndy jaman bastaǵan joq. Kamerýn fýtbolshylary arbıtrdiń ysqyryǵy estilisimen, dúrkirep alǵa shapty. Olar horvattardy jan-jaqtan qysymǵa alyp, standartty jaǵdaılarǵa júgindi de... «qyzyl sharshyly jeıdelilerdiń» birinshi qarsy shabýylynda-aq óz qaqpalaryna dop jiberip aldy. Ony Reseı fýtbolyna jaqsy tanys Ivısa Olıch túsirdi. Al kombınasııany Darıo Srnadan dop alǵan Marıo Mandjýkıch bastady. Ol dopty kelesi kezekti Ivan Perıshıchke asyrdy. Odan pas alǵan Ivısa bar kúshimen solqyldata soqty. Esep osylaı ashyldy.
Horvattar budan keıin alańda dopqa egelik ete bastady. Ara-tura qarsy qaqpany nysanaǵa alyp turǵan olardyń esepti ulǵaıtýǵa da múmkindikteri az bolǵan joq. Oıyn osylaısha óz aýanymen jyljyp, úziliske taıap qalǵanda, alań ústinde jurtty eleń etkizgen taǵy bir oqıǵa oryn aldy. «Asaý arystandardyń» jartylaı qorǵaýshysy Aleksandr Song 40-mınýtta qaraptan-qarap turyp Mandjýkıchke qarsy dóreki áreket jasady. Muny kórgen portýgal tóreshisi Pedrý Proensa oǵan oılanbastan «qyzyl qaǵaz» kórsetti.
Kamerýn qaqpasy toryn búlk etkizgen ekinshi dop ekinshi taımnyń bastalǵan shaǵynda salyndy. Ol dopty qarsylastar shabýylshysynyń aldyna laqtyryp tastaǵan qaqpashy Itandjdyń qateliginen múmkin boldy. Ony alǵan Perıshıch birden tórt baǵannyń ortasyn kózdeýge asyqpady. Ol birneshe qadam ilgeri kelip, ózine qolaıly sát jasalǵansha shydap baqty. Sondaı mezet jasalǵanda, dopty qaqpashynyń janynan zý etkizdi. Osymen match taǵdyry da sheshilip qoıylǵandaı boldy. Sebebi, alańda on oıynshymen qalǵan afrıkalyqtardyń eki doptyń aıyrmasyn qaıtara alatynyna endi eshkim de sengen joq. sonyń ishinde fýtbolshylardyń ózderi de ondaı nıette bolmasa kerek. Olar osydan keıin múldem basylyp qaldy. Munyń esesine, horvattar qaıtadan kúsh aldy. Arada eki mınýt ótkende, Mandjýkıch taǵy bir gol salyp kete jazdady. Ol Itandjben jekpe-jek shyǵyp, qaqpaǵa dop baǵyttaı almaı qaldy. Al qarsy shabýyl kezinde Danı Nýnkeý bar kúshin salyp soqqy jasady. Biraq dop qaqpadan qıys ketti. Osydan keıin Horvatııanyń shabýyly keń qanatpen órbı tústi. Sonyń birinde Danıel Pranıch ózi qol jetkizgen buryshtama dobyn alańǵa ózi jetkizdi. Ol Mandjýkıchtiń basyna týralap keldi. Sol kezde «Bavarııanyń» shabýylshysy bul múmkindikti qur jibermedi. Arada 12 mınýt ótkende bul forvard taǵy bir gol soǵyp, chempıonatta dýbl jasaýshylar qataryn túzdi. Bul jolǵy shabýyldy oıynǵa tyńnan qosylǵan oıynshylar uıymdastyrdy. Áýeli qaptaldan jeke joryqqa shyqqan Mateo Kovachıch tegi brazılııalyq Edýardoǵa dop berdi. Onyń soqqysyn Itandj qaıtaryp úlgerdi. Biraq sodan keri qaıtqan dopty Mandjýkıch qaıtadan qaqpaǵa baǵyttaǵanda, oǵan golkıper de, qorǵaýshylar da kedergi jasaı almady.
Damır Qojamqul.
Derekkóz: Chempıonat.Rý.
Foto: Sportbox.ru.
