Iran Islam Respýblıkasynyń bas konsýly Mohsen Faǵanı qonaqtarǵa ystyq yqylasy men memleket úshin mańyzdy keshke qatysqandary úshin alǵys bildirdi. «Dúnıe júzi halqynyń shamamen 1 paıyzyn quraıtyn 85 mln halqy bar Iran búginde dúnıe júzindegi paıdaly qazbalar qorynyń 7 paıyzyna ıe. Shyǵys pen batys, soltústik pen ońtústik arasyndaǵy erekshe geografııalyq jaǵdaıynyń arqasynda úlken ulttyq jáne aımaqtyq naryǵy, uzyn teńiz jaǵalaýlary, ártúrli aýylsharýashylyq ónimderge baı qunarly jeri bar Iran jahandyq qoǵamdastyqpen yntymaqtastyqta aıtarlyqtaı nátıjege qol jetkizip otyr», dedi bas konsýl.
Saltanatty is-sharaǵa Syrtqy ister mınıstrliginiń ókilderi de qatysty. Mınıstrliktiń Almaty qalasyndaǵy ókildiginiń basshysy Baqytjan Bólegenov Iran Islam Respýblıkasyn Ulttyq kúnimen jáne Islam revolıýsııasynyń 44 jyldyǵymen quttyqtady. О́tken jyly Qazaqstan men Iran arasyndaǵy dıplomatııalyq qatynastardyń ornaǵanyna 30 jyl toldy.
«2022 jyldyń maýsym aıynda Qazaqstan Prezıdenti Qasym-Jomart Toqaev Iran Islam Respýblıkasyna alǵashqy resmı saparyn jasady. Bul sapar Qazaqstan-Iran qatynastaryn jańa deńgeıge kóterip, ekijaqty yntymaqtastyqty damytýǵa oń serpin berdi. Sapar qorytyndysy boıynsha 2022 jylǵy shildede Iran azamattary úshin 14 kúnge deıingi merzimge vızasyz rejim kúshine endi, al qarashadan bastap Qazaqstan azamattary úshin de osyndaı jeńildik engizildi. Samarqandta ótken Shanhaı Yntymaqtastyq Uıymynyń sammıti aıasynda memleketter basshylarynyń kezdesýi ótti, al 2022 jyldyń qazan aıynda Iran Prezıdenti Ibrahım Raısı Qazaqstannyń elordasy Astana qalasynda boldy. Bıyl qańtar aıynda ótken saýda-ekonomıkalyq, ǵylymı-tehnıkalyq jáne mádenı-gýmanıtarlyq yntymaqtastyq jónindegi úkimetaralyq komıssııanyń 18-otyrysynyń qorytyndylary barlyq saladaǵy ózara is-qımyldyń odan ári ósýin óte joǵary senimmen boljaýǵa múmkindik beredi», dedi Baqytjan Erǵalıuly.
ALMATY
