Adyıaman provınsııasynda qulaǵan úılerdiń astynan 54 saǵattan keıin qutqarylǵan 28 jastaǵy farmasevt Gızem Ozkan jer silkinisinen keıingi alǵashqy bir saǵat - eń qıyn ýaqyt ekenin aıtty.
Qazir boıjetken Izmır qalasyndaǵy Býdja Seıfı Demırsoı oqý jáne zertteý aýrýhanasynda emdelip jatyr. Onyń aıtýynsha jer asty dúmpýleriniń saldarynan alty qabatty ǵımarat qıraǵan, al ol otbasymen birge tórtinshi qabattaǵy páterde turǵan.
Gızemniń otbasy qıyndylardyń astynda qalyp qoıǵan, qýanyshqa oraı barlyǵy aman. Tek sol túni bolǵan qorqynyshty sátter máńgi esterinde qalatyny anyq deıdi Ozkan.
«Sondaı sharasyz kúıge túsesiń. Ústińnen úlken birnárse basyp turǵan soń tynys ala almaısyń. Tórt jaǵyńnan keptelip qalǵasyn aýa kiretin jer de qalmaıdy. Men ústimnen de, astymnan da qysylyp jattym», deıdi jábirlenýshi artta qalǵan aýyr estelikterimen bólisip.
Boıjetkenniń aıtýynsha ol ózin tynyshtandyrý úshin óziniń súıikti ánderin aıtyp, jan-jaǵyna tastardy laqtyryp, óziniń tiri ekenin dybys arqyly kórsetkisi kelgen.
«Eń qıyny alǵashqy saǵatta sezildi. Sen bar janyńmen ólýdi qalaısyń. Jer asty dúmpýleri de qaıtalanyp turdy. Bir saǵattan keıin esińdi jınaısyń. Múmkin meni eshkim estimegen bolar, biraq men únemi daýys shyǵaryp jattym», deıdi ol.
Qutqarýshylar qyzdy taýyp alǵanda ol es-tússiz jatqan. Keıin aýrýhanaǵa túrli jaraqattarmen jetkizildi. Boıjetkenniń aıtýynsha, ol basynan ótken jaǵdaılardan keıin ómirdiń qadirin eki ese túsingen.
«Men adamdardy qandaı jaǵdaı bolsada, úmitterin úzbeýge shaqyramyn», dep ol suhbatyn aıaqtady.
Aýrýhananyń bas dárigeri professor Iekta О́njel medısınalyq mekemege Qahramanmarash pen Adyıamannan 40-qa jýyq jaraly túskenin aıtty. Onyń aıtýynsha, aýrýhanaǵa jetkizilgen barlyq adamdarǵa psıhologııalyq kómek kórsetiledi.
Eske salaıyq, 6 aqpanda Túrkııanyń ońtústik-shyǵysynda eki joıqyn jer silkinisi boldy: jergilikti ýaqyt boıynsha 04:17-de – 7,7 ball jáne 13:24-te – 7,6 ball. Qaıtys bolǵandar sany 35 myńnan asty.
Túrkııa prezıdenti Rejep Taıyp Erdoǵan Túrkııada jeti kúndik ulttyq aza tutý jarııalady.
