Sofııadaǵy saıysta 66 kılo salmaqta beldesken Ǵumar Qyrǵyzbaev kúmispen kúptelse, 81 kılodaǵy Rýslan Musaev qolaǵa qol jetkizdi. Bastapqy básekelerde Bolgarııa, Germanııa, Ulybrıtanııa jáne Italııa sportshylarynan basym túsken Qyrǵyzbaev fınalda ýkraınalyq Mıkıta Holoborodkomen bas júldeni sarapqa saldy. Eki sportshy arasyndaǵy tartysty kúres 9 mınýtqa deıin jalǵasty. Negizgi ýaqytta teń túsken sportshylar jeńimpazdy golden skorda (qosymsha ýaqyt) anyqtady. Bul synda 20 jastaǵy Ýkraına dzıýdoshysynyń baǵy jandy.
Al týrnırdiń jartylaı fınalynda jeńilgen Rýslan Musaev qola júlde úshin kúreste byltyrǵy Eýropa ashyq kýboginiń kúmis júldegeri Nıkon Zaboroshýkti (Moldova) tize búktirip, úshinshi orynǵa ıe boldy. Sofııa tatamıinde Qazaqstan quramasynyń 9 balýany baq synady.
