Jańa oqý orny Yessenov University bastamasymen qurylǵan nemis ýnıversıtetteri ortaq konsorsıýmy nátıjesinde ashylady. Atalǵan konsorsıým bilim, ǵylym salasynda bilikti, bilimdi maman daıarlaý boıynsha 2022 jyly júrgizilgen jumystar nátıjesinde nemistiń 7 ýnıversıtetimen birge qurylǵan.
Germanııadan Aqtaýǵa arnaıy kelgen qonaqtar Yessenov University-in ekijaqty kelisimderdi bilim múddesine toǵystyrǵan halyqaralyq seriktesterdiń alańyna aınaldyrdy. Seriktester úsh kún boıy jobany talqylap, keńesip, dóńgelek ústel men konferensııalarda pikir almasty. Konferensııa aıasynda Yessenov University prezıdenti B.Ahmetovtiń, Qazaq-nemis ýnıversıtetiniń prezıdenti Volrad Rommeldiń, Gambýrg ýnıversıtetiniń professory Raıner Savatskıdiń jáne basqa da ǵalymdardyń baıandamasy tyńdalyp, stýdentterge arnalǵan semınarlar men pikirtalas uıymdastyryldy. Sondaı-aq Germanııa ýnıversıtetterimen birlesken baǵdarlamalardyń jaı-japsary talqylandy. Kezdesýlerde germanııalyq bilim berýdiń júıesi, Qazaq-nemis ınjınırıng ınstıtýty jobasynyń barysy, óńirge qajettiligi men mańyzy, uıymdastyrý jumystary men kezeńderi, kútiletin nátıje týraly aıtyldy.
Yessenov University bazasynda qurylyp, bıyl qyrkúıek aıynan bastap stýdentterdi qabyldaıtyn jańa oqý orny qandaı bolmaq? Týrıstik qana emes, óndiristik áleýeti de mol Mańǵystaý oblysynda jaqsy jobalardy júzege asyrýǵa bolady. Qýanyshtysy, aımaqtyń strategııalyq josparynda 2025 jylǵa deıin Jasyl sýtegi zaýytyn salý mejelengen. Jańa ónerkásipke, jańa zaýytqa joǵary bilimdi salalyq mamandar kerek. «Qys shanańdy jaz saıla» demekshi, kásibı tehnıkalyq qajettilik boıynsha mamandar daıarlaý oqý baǵdarlamasyna jańa baǵyttar qosýǵa suranys týyndatyp otyr.
– Yessenov University bazasynda Nemis ınjınırıng ınstıtýty ashylatyny týraly jańalyq eldi eleń etkizdi. Aldaǵy jańa oqý jylynan bastap logıstıka jáne energetıka mamandyqtarynyń alǵashqy top stýdentteri qabyldanyp, aǵylshyn, nemis tilderinde oqytyla bastaıdy jáne bilim alýshylar úsh dıplomǵa ıe bolady. 2030 jylǵa deıin 8 bakalavrıat pen 6 magıstratýra boıynsha 1 myń stýdentti oqytyp, oblystaǵy Green Hydrogen jobasyna jáne basqa ınjınırıng salalaryna qajetti kadrlar daıyndap shyǵarýdy josparlap otyrmyz, – dedi B.Ahmetov.
Onyń aıtýynsha, Ǵylym jáne joǵary bilim mınıstrligi otandyq ýnıversıtetterde Eýropa men AQSh-tyń tehnıkalyq joǵary oqý oryndarynyń fılıalyn ashyp, solardyń oqý baǵdarlamasymen mamandar daıarlaý isine bastamashy bolyp keledi.
– Osy oraıda biz, Qazaqstan-Germanııa ýnıversıtetiniń basshylyǵy Berlın tehnıkalyq ýnıversıtetiniń, Gambýrg ýnıversıtetiniń, Martın Lıýter Galle-Vıttenberg ýnıversıtetiniń, Anhalt ýnıversıtetiniń ókilderi jáne Germanııanyń Qazaqstandaǵy vıse-elshisi, sondaı-aq ınvestorlar men jumys berýshi kompanııalardyń resmı ókilderimen ortaq jobalarymyzdy jan-jaqty talqyladyq. Bul joly suranysqa saı perspektıvalardy anyqtaýǵa tyrystyq. О́lkemizdiń óndiris salalaryna nemistiń úzdik tájirıbelerin engizý, qajettilikke qaraı ınjenerııa mamandaryn daıarlaý boıynsha keń otyryp keńestik. Birlesken baǵdarlamalarymyzdy egjeı-tegjeıli talqylap bolǵan soń, seriktes kásiporyndarymyzǵa barýdy da josparlap otyrmyz, – dedi ol.
Jaqsy jańalyq qashanda qýanysh pen qoldaýǵa ıe. Qazaqstannyń jas túlekteri Aqtaýdan-aq germanııalyq úlgidegi hám sapadaǵy bilim alyp, mamandyq meńgerip, el damýyna úles qosatyny qýanysh emes pe?! Jańa ınstıtýt qyrkúıekten bastap stýdentter qabyldaǵanmen qurylymy, ózge de joǵary oqý ornyna tán qajettilikter men máseleleri birtindep sheshile bermek.
– Elimizdiń joǵary bilim berý salasynda el Prezıdentiniń tapsyrmasy boıynsha sheteldik jetekshi ýnıversıtettermen akademııalyq yntymaqtastyq nyǵaıyp keledi. Otandyq joǵary oqý oryndarynyń bazasynda Ulybrıtanııa, Germanııa, Kanada, Nıderland, Ońtústik Koreıa jáne AQSh-tyń aldyńǵy qatarly ýnıversıtetteriniń fılıaldary ashylatyn boldy. Ásirese, Qazaqstan men Germanııa arasyndaǵy tyǵyz qarym-qatynas joǵary bilim men ǵylym baǵyttaryna aıryqsha basymdyq beredi. Sol maqsatta nemis ýnıversıtetterimen birge kóptegen iri joba qolǵa alynyp jatyr. Yessenov University bazasynda Qazaq-nemis ınjınırıng ınstıtýtynyń qurylýy sonyń dáleli, – dedi Mańǵystaý oblysy ákiminiń orynbasary U.Tnalıev.
Yessenov University-degi tyń jańalyq tek bir oqý ornynyń etistigi emes, memlekettik deńgeıdegi jetistik deýge bolady. Aqtaýlyq oqý ornynan da ózge qazaqstandyq joǵary oqý oryndary Germanııanyń Gambýrg, Berlın tehnıkalyq jáne Berlın erkin ýnıversıtetteri, Anhalt ýnıversıteti, Vıldaý tehnologııalyq, Galle-Vıttenberg, Darmshtadt ýnıversıtetterimen birge áriptestik baılanysty arttyrýǵa yntaly. Qazirgi tańda Yessenov University tájirıbe almasý, akademııalyq utqyrlyq, qos dıplom baǵdarlamalary boıynsha professor-oqytýshylardyń birigip ǵylymı-zertteý jobalarymen aınalysýy maqsatynda yntymaqtastyq ornatýǵa kúsh salyp jatyr.
Jańa oqý orny alyp maqsatty arqalap otyr. Uıymdastyrýshylardy, seriktesterdi alda áli úlken jumystar kútip turǵany da belgili. Joba oıdaǵydaı júzege asyp, otandyq óndiriske bilikti mamandar daıyndaýdaǵy belsendi isimen qýantady dep senemiz.
Mańǵystaý oblysy
