Aqparat jáne qoǵamdyq damý mınıstrligi janyndaǵy MediaLab jýrnalıstıka ortalyǵy qoǵamdyq medıa men kommýnıkasııalardyń qoǵamǵa áseri taqyryptary sheńberinde qoldanbaly ǵylymı zertteýler júrgizýmen aınalysady.
Kezdesý barysynda vedomstvo basshylary medıa-mamandyqtar úshin ádebıet daıarlap, basyp shyǵarýdy, «Bolashaq» baǵdarlamasy sheńberinde jýrnalısterdi oqytýdy uıymdastyrýdy, jýrnalıstıka fakýlteti stýdentteriniń oqý merziminde tájirıbeden ótý merzimin esepke alý men ındýstrııadaǵy dýaldy bilim júıesin talqylady.
«Esterińizde bolsa, Astana MediaWeek forýmynda biz medıa ındýstrııany zertteýmen, jýrnalıstıka jáne kommýnıkasııa salasyndaǵy mamandardyń biliktiligin arttyrýmen júıeli túrde aınalysatyn ortalyq ashamyz degen edik. Endi, mine sonyń oraıy búgin kelip otyr. MediaLab ortalyǵy medıa tutyný patternderin ǵylymı turǵyda zertteýdi, jýrnalısterdiń, ásirese aımaqtaǵy jýrnalısterdiń biliktiligin arttyrýdy, salalyq jýrnalıstıkany jetildirýdi, baspasóz hatshylarynyń kásibı daǵdylaryn damytýdy kózdeıdi», dep atap ótti Darhan Qydyráli.
Ortalyqta jýrnalıstıka mamandyǵy boıynsha oqyp jatqan stýdentterge de ádistemelik qoldaý kórsetiledi.
«Biz álemdegi jýrnalıstıka mektepteriniń ozyq degen oqý baǵdarlamalaryn «Ashyq sıllabýs» jobasy aıasynda Qazaqstanǵa ákelip, úzdik kitaptar men oqýlyqtardy qazaq tiline aýdarýdy josparlap otyrmyz», dedi D. Qydyráli.
Sondaı-aq ǵylym salasyndaǵy suraqtar, onyń ishinde ǵylymı jýrnalıstıka jáne BAQ-taǵy ǵylymı zertteýler qarastyryldy. Is-shara sońynda mınıstrler birlesken jobalardy júzege asyrý týraly ýaǵdalastyqqa qol jetkizdi.
